Околу 200 лица кои останале отсечени во планинската долина Каунертал во австриската покраина Тирол биле евакуирани откако обилните врнежи од дожд предизвикале неколку одрони од кал и камења.
Австриската армија ангажирала два хеликоптера за евакуација на излетниците од живописната долина, која се наоѓа во близина на границата со Италија.
Според локалните власти, по силните дождови што го зафатија регионот во неделата, три одрони се урнале врз главниот пристапен пат, целосно блокирајќи го со кал, камења и земја.
Поради прекинот на патната комуникација, околу 200 лица кои биле на еднодневен излет не можеле да го напуштат подрачјето и биле принудени да преноќат во планинарски дом и во планински ресторан.
Од здравствени причини, десетина лица биле евакуирани со хеликоптер уште во неделата, изјави Елмар Рицоли од кризниот штаб на Тирол за агенцијата ДПА.
Тој посочи дека во одроните нема повредени лица.
Државниот метеоролошки завод „Геосфера Австрија“ предупреди дека и во наредните денови постои опасност од нови грмежливи невремиња во Тирол, како и можност за дополнителни одрони, локални поплави и нарушувања во патниот и железничкиот сообраќај.
