ОБСЕ со позитивни оценки за Кривичниот суд Скопје: Единствен во судската мрежа со функционална ПР-канцеларија

Основниот кривичен суд Скопје доби позитивни оценки од ОБСЕ за транспарентноста и комуникацијата со јавноста, при што во регионален извештај е посочен како единствена институција во судската мрежа со функционална канцеларија за односи со јавноста, соопштија од судот.

Оценките се дел од Извештајот на ОБСЕ за набљудување на судските процеси во Западен Балкан, презентиран на регионална конференција во Будва, Црна Гора, посветена на спроведувањето на правосудните реформи во предметите од областа на организираниот криминал и корупцијата.

— реклама —

Според соопштението, во извештајот како позитивна практика е издвоена редовната комуникација на Кривичниот суд со јавноста преку објавување соопштенија и одговарање на прашања од новинари и граѓани.

Посебно е истакнато започнувањето со издавање квартален билтен, кој содржи статистички податоци, резимеа на позначајни пресуди и информации за активностите насочени кон поголема транспарентност.

— реклама —

Позитивно е оценет и брифингот со медиумите од септември 2026 година, на кој биле опфатени прашањата за транспарентноста, дигитализацијата и ефикасноста во работењето на судот.

— реклама —

На конференцијата, која се одржува на 26 и 27 октомври, учествуваат претседателката на Основниот кривичен суд Скопје, судијката Даниела Димовска, раководителката на специјализираното одделение за организиран криминал и корупција, судијката Фанка Јанчулева-Михаиловска, и судијата Илија Трпков од истото одделение.

Настанот се одржува на покана на Организацијата за безбедност и соработка во Европа, во рамките на Регионалниот проект за набљудување судски процеси во Западен Балкан, кој се спроведува со финансиска поддршка од Европската Унија.

На конференцијата учествуваат претставници на правосудните институции од регионот, кои разговараат за практичните резултати од реформите, предизвиците во судењето предмети за организиран криминал и корупција и потребата од поголема ефикасност и јавност во судските постапки.

Од Основниот кривичен суд Скопје посочуваат дека ќе продолжат со активностите за унапредување на транспарентноста, соработката со медиумите и јакнењето на довербата во правосудството.