Во Кривичен суд е намален заостатокот на предмети, решени над 86 проценти од случаите, Транспаренси го издвои како пример во правосудството

Основниот кривичен суд Скопје е издвоен како еден од „бистрите“ примери во априлскиот извештај „Бистро-Матно“ на Транспаренси Интернешнл-Македонија, со акцент на објавените резултати за работата на судот и зголемената транспарентност.

Според извештајот, Кривичниот суд го објавил првото издание на својот е-весник, преку кој ја презентира работата на институцијата, статистиките и судската практика, со цел поголема отвореност кон јавноста.

Во првиот квартал од 2026 година, судот донел 620 пресуди за полнолетни сторители, 60 пресуди за малолетници и дури 6.534 пресуди во прекршочна постапка.

Во делот за организиран криминал и корупција, биле определувани ефективни притвори, куќни притвори и мерки на претпазливост, а носени биле и пресуди врз основа на спогодби.

Транспаренси наведува и дека според податоците за 2025 година, Основниот кривичен суд Скопје го совладал приливот на предмети и го намалил заостатокот. Судот решил 86,19 проценти од предметите што биле во работа, поради што е оценет како ажурен суд.

Овие податоци се дел од редовниот мониторинг „Бистро-Матно“, преку кој Транспаренси Интернешнл-Македонија ги следи состојбите поврзани со корупцијата, транспарентноста и функционирањето на институциите.