Обвинителите бараат итна одлука од Уставниот суд за намалените плати

Советот на јавните обвинители, Јавното обвинителство и Здружението на јавните обвинители бараат Уставниот суд итно да се произнесе за иницијативите со кои се оспоруваат законските измени за третото намалување на коефициентите за пресметување на платите на обвинителите.

— реклама —

Од институциите посочуваат дека поминале повеќе од осум месеци, а сè уште нема конечна одлука. Според нив, намалувањето на платите може да ја загрози самостојноста на обвинителството и да придонесе за одлив на стручниот кадар.

— реклама —

Во решението со кое е поведена постапката, Уставниот суд изразил сомнеж дека измените може да навлегуваат во уставно загарантираната самостојност и независност на јавното обвинителство, како и во правото на соодветен надоместок.

— реклама —

Обвинителите тврдат дека платите во Македонија се најниски во регионот. Истовремено, предупредуваат на долготраен недостиг од административен и стручен кадар, недоволни буџетски средства и несоодветни услови за работа.

Тие очекуваат овие проблеми да бидат опфатени и во претстојниот извештај на Европската комисија. Од Уставниот суд бараат внимателно да ги разгледа изнесените аргументи, вклучително и споредбите со состојбите во регионот и Европа, и да донесе одлука без натамошно одложување.