СДСМ денеска преку соопштение побара од Државната комисија за спречување на корупцијата (ДКСК) без одлагање да го проследи предметот за генералниот секретар на Владата, Игор Јанушев, до Јавното обвинителство, поради, како што тврдат од партијата, сомнежи за прикривање имот.
Од СДСМ наведуваат дека постојат јавно достапни податоци кои покажуваат поврзаност на Јанушев со компанија регистрирана во Бугарија, а која, според нив, не била наведена во неговите анкетни листови.
Според партијата, доколку се утврди дека станува збор за прикривање имот, законот предвидува прекршочни и кривични санкции, вклучително и парична казна, затворска казна, конфискација на имотот и дополнително оданочување.
„ДКСК нема право да остане нем набљудувач. Доколку постојат основи на сомневање дека е извршено кривично дело, Комисијата е должна без одлагање да го проследи предметот до надлежниот јавен обвинител“, соопштија од СДСМ.
Од опозициската партија сметаат дека Јанушев не треба да остане на функцијата генерален секретар на Владата додека трае евентуална истрага, повикувајќи го да поднесе оставка или Владата да го разреши.
Во партиското соопштение, СДСМ упати критики и кон владејачката ВМРО-ДПМНЕ, обвинувајќи ја за лицемерие во однос на политиките кон Бугарија и европските интеграции.
„Јавното обвинителство мора да реагира. Јанушев мора да сноси одговорност. Време е за вистина и правда. Никој не е над законот“, наведуваат од СДСМ.
