ВМРО-ДПМНЕ обвини дека СДСМ, Венко Филипче и Зоран Заев молчат и избегнуваат да одговорат на прашањата поврзани со промената на деталниот урбанистички план во Тетово.
Од партијата тврдат дека случајот отвора сериозни сомнежи за можно ставање на приватниот интерес пред јавниот, во врска со урбанистичките измени за просторот на ШИК Јелак, каде, според нив, биле предвидени околу 2.000 станбени единици со вкупна вредност од 200 милиони евра.
ВМРО-ДПМНЕ прашува дали поранешниот премиер Зоран Заев добил 4 милиони евра од бизнисменот Дака за промената на ДУП-от, оценувајќи дека јавноста има право да знае како и врз основа на што биле носени одлуките што директно влијаат врз урбаниот развој на Тетово.
„Кој и колку профитираше од промените на ДУП во Тетово?“, прашуваат од партијата, додавајќи дека постои сомнеж оти урбанистичките измени не биле правени според потребите на граѓаните и стручни анализи, туку поради бизнис интереси.
Во реакцијата се споменува и Венко Филипче, со прашање дали и тој, заедно со Заев, го ставиле приватниот интерес пред јавниот интерес.
Од ВМРО-ДПМНЕ бараат Јавното обвинителство да ги испита сите наводи, сомнежи за судир на интереси и евентуална злоупотреба на функцијата, нагласувајќи дека граѓаните заслужуваат транспарентност, отчетност и владеење на правото.
Партијата повика СДСМ да не молчи, а надлежните институции, како што велат, темелно да го истражат случајот.
