„Очекуваме инфлацијата кај храната и безалкохолните пијалаци да биде меѓу 1,5 и 2 отсто на годишно ниво“, рече Мицкоски

Премиерот Христијан Мицкоски очекува инфлацијата кај храната и безалкохолните пијалаци да биде меѓу 1,5 и 2 отсто на годишно ниво. Тој посочи дека конечните податоци за вкупната инфлација треба да ги објави Државниот завод за статистика.

Одговарајќи на новинарско прашање, Мицкоски рече дека очекува да продолжи трендот Македонија да биде меѓу земјите со најниска годишна стапка на инфлација во регионот.

— реклама —

Тој посочи дека во јули годишната стапка на инфлација изнесувала 2,3 отсто, додека просекот во Европската Унија и еврозоната бил 2,9 отсто. Во август, инфлацијата во Македонија била 2,6 отсто, во услови кога просекот во ЕУ и еврозоната бил 3,2 отсто.

— реклама —

Мицкоски оцени дека податоците за третиот квартал покажуваат дека состојбата е под контрола и дека Македонија, според споредбата што ја направи, е на второ место во регионот според нивото на инфлација, анализирајќи ги земјите од Словенија до Турција.

За септември, тој се повика на проценките на Европската Унија, според кои инфлацијата во еврозоната би изнесувала 3,8 отсто.

— реклама —

Во однос на цените на храната и безалкохолните пијалаци, Мицкоски рече дека врз основа на проценките и анализите на Државниот пазарен инспекторат се очекува годишната стапка да биде меѓу 1,5 и 2 отсто.

„Што ќе претставува најниска во регионот и една од најниските во Европа“, рече Мицкоски.

За конечната вкупна стапка на инфлација за септември, тој посочи дека треба да се почека објавувањето на официјалните податоци од Државниот завод за статистика.