Од денеска задолжителна зимска опрема во возилата, казната е 45 евра

Од денеска, 15 ноември, стапува на сила обврската за задолжително поседување зимска опрема во возилата што учествуваат во јавниот сообраќај. Возачите кои нема да ја почитуваат законската обврска ризикуваат казна од 45 евра.

— реклама —

Според Министерството за внатрешни работи, патничките возила со маса до 3.500 килограми треба да имаат зимски пневматици на сите четири тркала, со најмалку четири милиметри длабочина на шарата. Како алтернатива дозволени се летни пневматици со иста минимална длабочина, но само доколку возилото поседува синџири за снег со соодветна големина за погонските тркала.

— реклама —

За возилата со погон на четири тркала важат посебни правила. Зимските пневматици треба да имаат шара од најмалку шест милиметри, додека летните треба да имаат најмалку четири милиметри, со задолжително поседување синџири за снег.

Кај возилата потешки од 3.500 килограми се потребни зимски пневматици на погонските тркала со најмалку шест милиметри шара или летни пневматици со најмалку четири милиметри, доколку возилото има соодветни синџири за снег или други помагала. Автобусите и товарните возила кои поради технички причини не можат да постават синџири мора да имаат зимски пневматици и лопата.

— реклама —

Од МВР појаснуваат дека како зимски се сметаат пневматиците со ознаки „MS“, „M+S“, „M & S“ или симбол на снегулка на стилизирана планина. Употребата на пневматици со клинци е забранета.

— реклама —

Од Министерството апелираат до возачите да ја почитуваат законската обврска заради побезбедно и непречено одвивање на сообраќајот во зимски услови.