опрема

Аква паркот кај „Борис Трајковски“ не работи со години, има големи загуби, стара опрема и затворени врати

Една од најголемите инвестиции во рамки на спортскиот центар „Борис Трајковски“ – скопскиот Аква парк – годинава не е во функција. Според извештајот од Државниот завод за ревизија, објектот во 2023 година остварил приходи што биле за 41 отсто пониски од предвиденото, а во 2024 целосно е затворен.Проблемите се бројни и сериозни – од слаб интерес на посетители, преку нерешени технички и инфраструктурни дефекти, до фактот дека на целата вградена опрема и реквизити веќе им е истечен гарантниот рок. Тоа значи дека изведувачите не одговараат повеќе за евентуални дефекти или оштетувања, поради што објектот не може да биде отворен без ризик и дополнителни трошоци.Во 2023 година, Аква паркот инкасирал само 4,29 милиони денари. За разлика од него, базенот, лизгалиштето и кугланата при „Борис Трајковски“ бележат континуиран раст на приходите.Ревизорите констатираат дека Аква паркот, од некаогашна атракција, прераснал во сериозен финансиски товар, а целиот проект се посочува како пример за слабо планирање и неадекватно одржување.Долг стар една деценија подмирен од државниот буџетСпортскиот центар „Борис Трајковски“ бил изграден во 2011 година преку заем од Град Скопје во износ од 260 милиони денари, со договорена исплата во три рати уште истата година. Но, поради финансиски потешкотии, објектот не започнал со отплата сè до 2019 година.Во периодот од 2019 до 2022 година, управителот не успеал да обезбеди средства за самостојно сервисирање на обврските, па долговите биле покриени преку државниот Буџет. Министерството за финансии го зголемило основниот влог на државата во друштвото, со што биле покриени сите три рати. Последната била исплатена во 2023 година.Ревизијата укажува дека оваа ситуација отвора сериозни прашања за одржливоста на јавните инвестиции и транспарентноста во финансирањето на вакви капитални објекти. И покрај тоа што „Борис Трајковски“ е клучна спортска и конгресна локација, неговото управување покажува дека и национално важни проекти можат да западнат во финансиски проблеми и да зависат од државна интервенција.

Скопје | пред 4 месеци

Македонија може да остане без 13 сеизмолошки станици, МОН најавува можно решение преку научен проект

Ако не се обезбедат средства и нова опрема, државата од почетокот на 2026 година ризикува да остане без телеметриската мрежа од 13 сеизмолошки станици што ја покриваат територијата на цела Македонија и пограничниот регион. Причината – истекувањето на меѓународниот проект AdriaArray, по чие завршување германската влада ќе ги повлече инструментите со кои во моментов се врши мониторингот на сеизмичката активност.Со ова, Сеизмолошката опсерваторија при Природно-математичкиот факултет во Скопје ќе остане без функционална опрема, а мрежата за следење земјотреси во реално време ќе биде практично нефункционална. Институцијата веќе алармираше за тешка состојба, поради недостиг на опрема, кадар, софтвери и сеизмометри.Министерката за образование и наука, Весна Јаневска, денеска изјави дека постои надеж оти преку тековен конкурс за научно-истражувачки проекти може да се обезбедат барем дел од неопходните средства.– „Ова прашање е актуелно и е многу значајно бидејќи ние сме трусно подрачје. Германската влада ќе си ги повлече инструментите затоа што завршува проектот“ – изјави министерката на денешната прес-конференција.Таа додаде дека веќе неколку пати имала средби со директорката на Сеизмолошката опсерваторија и разговарале за можностите за решавање на проблемот.– „Односно да се обезбедиме, тоа не е помош, тоа е сигурност на сите граѓани на оваа земја. Јас сум многу среќна што кога ги разгледував апликациите на научно-истражувачките проекти, видов дека Сеизмолошката опсерваторија конкурирала на овој конкурс и, според информациите кои ги добивам од комисијата, многу се големи изгледите тие и да го добијат овој проект, со што ќе се обезбедат дел од средствата за да се набават одреден број инструменти. Ако тоа биде така, не можам да прејудицирам, но се надевам дека ќе биде така, малку од малку нешто ќе покриеме, а потоа продолжуваме да го решаваме проблемот за кој сметам дека ургентен и многу значаен“ – рече Јаневска.Организацијата ORFEUS, која стои зад проектот AdriaArray, од 2023 година инсталираше 13 привремени сеизмолошки станици во земјава. Мисијата е насочена кон подобро разбирање на движењата на Јадранската микроплоча и следење на сеизмичноста во регионот и глобално. Но, веќе во март 2026 година тие ја напуштаат Македонија и продолжуваат во други земји.Опсерваторијата предупредува дека за минимално ниво на сеизмички мониторинг во реално време потребни се барем десет нови станици, лиценциран софтвер и модерна компјутерска опрема. Во моментов, дополнителен сеизмички надзор се врши и на стратешки точки – браните Козјак и Св. Петка, како и на локацијата Белица кај Кнежево.

Македонија | пред 4 месеци

„Стојанче ќе им плаќа по пиво, тие ќе јавуваат за пожари – нов модел за заштита и спасување”

Во отсуство на системски одговор и транспарентност за вложувањата во противпожарната опрема и ресурси, јавноста сè почесто реагира со сарказам и револт. Социјалните мрежи се преплавени со коментари, а меѓу нив е и објавата на Ина Многу Фина.-Никој не излезе да објасни зошто не се купува опрема за пожари секоја година. По изјавите на бескрајно харизматичниот и духовит Стојанче во кого некој гледа менаџер ја гледам сериозноста на пристапот. Возила од паркинг на АРМ сочувани левел баба ги возела, пожарникари бараме во јули за 24к плата, пилоти ќе обучуваме од септември веројатно за пожарите во јануари да се спремни и најјакото од се не требало дронови туку Стојанче кој до пред некоја година не го интересирало дали постои ДЗС, сега, пазете ова, ќе им плаќал по едно пиво на селаните пред кооперации и они ќе биле место дронови единица за брзо алармирање за пожари.Демек оние 5 луѓе што се собираат "Кај Миле" на гајбите во Благодарево после 5 пива кога ништо не гледаат ќе го видат пожарот во планината, исто ко дрон, ќе го извадат телефонот и ќе му ѕвонат на Стојанче ваљда да му кажат. И он изгледа ќе дојде со гранката и ќе го истепа огинот кој што го регистрирале кооперација единиците за известување.Ама среќа за пратениците за трошоци и за службени коли немаме ваков проблем. За пожарите нека се засрамат овие што не донирале, буџетот си има свои приоритети. И не треба многу со недоверба да се гледа, треба и вие да им верувате ко тие што му веруваат на народот. Еве во Битола, два месеци стара фирма добила тендер од 2.5 милиони евра од ЕСМ со „жими мајка“ уверување дека има 330 работници на лагер. Келнер не можеш да најдеш за 2 месеци не па 330 работници ама ете му верувале. Значи треба да се има доверба и со Господ напред некој нешто ќе донира и се ќе биде ок. Добро?, пишува во нејзината објава.

Македонија | пред 4 месеци