Долгогодишниот угандски новинар и телевизиски водител Едвард Рукиди Кијанангома Њабонго I е избран за нов крал на историското кралство Тооро во Уганда. Неговото именување, сепак, предизвика спор околу наследувањето на престолот по смртта на досегашниот крал Ојо Њимба Кабамба Игру Рукиди IV.
Педесет и шестгодишниот Кијанангома е познато лице во Уганда, каде што повеќе од две децении работел како новинар во Руанда и на државната телевизија УБЦ. Тој го наследува кралот Ојо, кој минатиот месец почина од рак на 34-годишна возраст.
Тооро е едно од четирите официјално признати историски кралства во Уганда. Ојо бил поставен на престолот во 1995 година, кога имал само три години, по смртта на неговиот татко, со што тогаш бил најмладиот монарх во светот.
Изборот на Кијанангома не поминал без несогласувања. Блиски членови на кралското семејство тврдат дека Ојо оставил малолетен син и тестамент во кој го определил детето за свој наследник. Сепак, синот никогаш не бил јавно претставен, а неговото постоење не било потврдено од 21-члената комисија на владејачкиот клан Бабиито, која го избира кралот.
Мајката на покојниот крал, кралицата Бест Кемигиса, инсистирала на почитување на тестаментот на нејзиниот син. Таа го опишала изборот на Кијанангома како „прогласување на втор крал“ и изразила незадоволство поради начинот на кој бил спроведен процесот.
Од комисијата за наследување, пак, соопштиле дека изборот бил направен во согласност со обичаите и традицијата на кралството. Министерот за информирање на Тооро, Чарлс Мвангуња, изјавил дека синот на Ојо не се појавил, поради што сè повеќе се прифаќа ставот дека покојниот крал можеби не оставил син.
Кијанангома бил еден од неколкуте кандидати за престолот. Меѓу нив бил и принцот Џорџ Дезмонд Камураси, кој, според комисијата за наследување, ја одбил понудата поради други обврски.
Угандската влада го поддржала изборот на кланот Бабиито. Главниот државен обвинител Сем Мајанџа изјавил дека кралството може да продолжи со крунисувањето бидејќи против Кијанангома не била поднесена официјална жалба. Крунисувањето е најавено од владата, а се очекува на него да присуствува и претседателот Јовери Мусевени.
Традиционалните кралеви во Уганда немаат формална политичка власт, но имаат значајно културно влијание. Кралствата биле укинати во 1967 година, а повторно биле обновени во почетокот на 1990-тите со цел зачувување на културниот идентитет и националното единство.
По прогласувањето за крал, Кијанангома најавил дека кралскиот дворец ќе биде отворен за народот и дека негов приоритет ќе биде единството и развојот на кралството.
„Ми ја дадоа оваа титула крал, но не можам да работам сам, морам да работам со вас“, порачал тој.
Кијанангома е роден во 1970 година, а во 1999 година дипломирал новинарство на Универзитетот Макерере. По повеќе од 20 години новинарска работа, тој најавил дека искуствата и контактите стекнати во професијата ќе ги искористи за доброто на жителите на Тооро.
Неговата мајка, Асимве Јуста Кијанангома, смета дека тој е добро подготвен за новата улога бидејќи бил воспитуван во духот на традициите на старото кралство.
