Во октомври граѓаните ќе добијат можност личната карта и возачката дозвола да ги имаат во дигитална форма на својот мобилен телефон, најави министерот за дигитална трансформација Стефан Андоновски.
Во гостување на Канал 5, Андоновски соопшти дека во текот на октомври ќе биде промовирана новата мобилна апликација м.Услуги, преку која покрај дигиталните лични документи ќе бидат достапни и две електронски услуги за граѓаните.
„Можам официјално да најавам дека во октомври ќе организираме настан на кој ќе ја промовираме мобилната апликација м.Услуги. Во неа ќе бидат достапни електронски верзии на личната карта и возачката дозвола, како и две електронски услуги за граѓаните“, истакна Андоновски.
Апликацијата треба да овозможи граѓаните на едно место да имаат пристап до своите лични документи во дигитална форма, но и до електронски услуги од јавната администрација. Целта е користењето на државните услуги да биде поедноставно и подостапно, директно преку мобилен телефон.
Според Андоновски, во изминатиот период се работело на сајбер-безбедноста, заштитата и чувањето на личните податоци, како и на нивната размена со Министерството за внатрешни работи, кое е сопственик на податоците.
„Во завршна фаза сме на усогласување и потпишување на протоколот за размена на податоците, како и на тестирањето на апликацијата. Сакаме, пред таа да биде достапна за сите, да бидеме сигурни дека системот е стабилен, безбеден и едноставен за користење“, рече министерот.
Тој информираше дека апликацијата ќе биде достапна преку App Store и Google Play, а тест-верзијата досега ја презеле околу 6.000 граѓани.
Андоновски оцени дека следниот чекор во дигиталната трансформација е мобилниот телефон постепено да се претвори во своевиден дигитален паричник, преку кој граѓаните безбедно и едноставно ќе пристапуваат до личните документи и услугите на државата.
