Дел од дрвјата што беа соборени во неодамнешното силно невреме во Скопје нема да завршат како отпад, туку ќе бидат искористени за изградба на нов моторички парк на Водно, најави градоначалникот на Град Скопје, Орце Ѓорѓиевски.
Тој посочи дека, покрај санирањето на последиците од невремето, целта е од штетите да се создаде нова вредност за граѓаните. Здравите стебла од паднатите дрвја ќе бидат пренаменети во природни реквизити за моторички парк, кој ќе овозможи развој на рамнотежата, координацијата, агилноста, прецизноста и физичката подготвеност.
Новиот простор ќе биде наменет за деца, млади и возрасни, како место за рекреација, физичка активност и дружење во природа.
Ѓорѓиевски информираше дека на местата каде што паднале дрвјата веќе се засадуваат нови садници, а во втората половина на септември ќе започне и голема есенска акција за пошумување на градот.
Тој потсети дека претходно започнаа активности за уредување на патеките и обновување на урбаната опрема на Водно, а веќе функционира и Планинската спасителна служба на Водно и Матка, која е подготвена за интервенции во планински услови.
„Водно е срцето и зелените бели дробови на Скопје. Го чуваме, го обновуваме и го унапредуваме одговорно, со содржини што ќе им служат на сите генерации“, порача Ѓорѓиевски.
