Управата за финансиска полиција до Основното јавно обвинителство во Штип поднесе кривична пријава против две физички лица, управители и сопственици на едно правно лице, како и против самото правно лице, поради сомнение дека сториле кривични дела „Намерно предизвикување стечај“ и „Оштетување или повластување на доверители“.
Според Финансиската полиција, првопријавениот Ѓ.З., како управител и сопственик на правното лице, заедно со второпријавениот А.С., во периодот од 2022 до 2024 година преземале активности со цел намерно да го доведат правниот субјект во финансиска немоќ и економска пропаст.
Во пријавата се наведува дека осомничените склучувале штетни договори и пренесувале парични средства и друг имот на лица блиски до првопријавениот, без реална правна и економска основа. Дополнително, управителот отуѓувал движен и недвижен имот на друштвото по значително пониски цени од пазарните, што било спротивно на интересите на компанијата и нејзините доверители.
Со ваквите постапки, според Финансиската полиција, континуирано бил намалуван имотот на друштвото, поради што доверителите не можеле да ги наплатат своите побарувања, а компанијата завршила во трајна неликвидност и стечајна постапка.
Со наведените дејствија, доверителите биле оштетени за 13.268.816 денари, додека осомничените за себе и за лица во роднинска врска прибавиле противправна имотна корист во износ од 73.538.152 денари, соопшти Управата за финансиска полиција.
