Директорката за финансии и сметководство и шефицата за финансиски работи во Државна лотарија уапсени за проневера од речиси 80 милиони денари

Две службени лица вработени во Акционерското друштво за приредување игри на среќа Државна лотарија се лишени од слобода, откако Управата за финансиска полиција поднела кривична пријава против нив до Основното јавно обвинителство Скопје.

Според Финансиската полиција, станува збор за А.Н., директорка на Секторот за финансии и сметководство, и Д.Д., шефица на финансиски работи. Тие се осомничени за кривични дела „проневера во службата“ и „фалсификување или уништување деловни книги“.

— реклама —

Во пријавата се наведува дека двете лица во текот на 2024 година не го уплатиле и депонирале целокупниот дневен промет од продажните места на Државна лотарија, во вкупен износ од 46.038.720 денари, на трансакциските сметки на друштвото во деловните банки.

Дополнително, според наводите, од банкарските сметки на Државна лотарија подигнале парични средства во вкупен износ од 33.950.724 денари, кои противправно ги присвоиле за себе.

Финансиската полиција сомничи дека за прикривање на недостигот на средствата биле вршени трансфери меѓу банкарските сметки на друштвото, биле креирани налози за трансакции, како и реализирани уплати и исплати со кои лажно се прикажувало дека биле извршени финансиски трансакции во значителни износи.

— реклама —

Според пријавата, била изготвувана и употребувана невистинита финансиска и сметководствена документација, меѓу другото преку евидентирање фиктивни касовни исплати од благајната на друштвото. Противправно присвоените средства биле раскнижувани на различни сметководствени конта врз основа на фиктивна документација, со што, според Финансиската полиција, лажно се прикажувала нивната намена и се прикривал недостигот во деловните книги.

Со овие дејствија, според наводите на Финансиската полиција, двете пријавени лица прибавиле противправна имотна корист, додека на Државна лотарија ѝ предизвикале имотна штета од 79.989.444 денари.

— реклама —

Во рамки на постапката, под раководство на надлежен јавен обвинител од ОЈО Скопје и врз основа на судски наредби, вчера биле извршени претреси на пет локации – четири во Скопје и една во Валандово.

При претресите биле пронајдени и одземени предмети и материјали од интерес за постапката, меѓу кои оригинална сметководствена документација поврзана со Државна лотарија, мобилни телефони, лаптоп-компјутери, USB-уреди, надворешни хард-дискови и друга електронска опрема.

Биле пронајдени и одземени парични средства, злато и златен накит, накит од брендот „Сваровски“, часовници со поголема вредност, како и брендирани чанти од производители меѓу кои „Хермес“, „Луј Витон“ и „Диор“.

— реклама —

Дополнително, во соседен двор, надвор од една од претресуваните локации, била пронајдена и одземена фрлена документација која е од интерес за постапката.

Од Финансиската полиција информираат дека предметот произлегува од наодите на извршената ревизија од страна на Државниот завод за ревизија во Државна лотарија.