„Од ветувања за најниски цени на горивата во регионот, до 104,50 денари за дизел - Левица бара намалување на давачките за горивата, маржите и патарините“, вели Левица

Дизелот достигна цена од 104,50 денари за литар, откако Регулаторната комисија за енергетика повторно ја зголеми максималната малопродажна цена. Од Левица преку соопштение реагираат дека на 11 август дизелот чинел 91,50 денари, што значи дека за нешто повеќе од еден месец поскапел за 13 денари.

Од партијата посочуваат дека дизелот е значаен трошок за транспортот, земјоделството, градежништвото, дистрибуцијата и производството, поради што повисоките цени на горивото може да влијаат и врз цените на производите и услугите.

— реклама —

Од Левица ја повикуваат РКЕ да ги преиспита составните елементи на цената и да ги намали регулираниот надоместок за склад и трговската маржа. Според нивните наводи, овие две ставки во актуелната пресметка учествуваат со околу 6,9 денари во литар.

— реклама —

Партијата бара и привремена регулација на трговската маржа, со цел да се намали влијанието од високите берзански цени врз крајната цена на горивото.

Дополнително, Левица бара патарините да се намалат за 50 проценти за сите лиценцирани товарни и патнички превозници, со образложение дека високите трошоци за транспорт може да влијаат врз цените на храната и основните производи.

— реклама —

Од партијата бараат Владата да ги искористи фискалните инструменти што ѝ стојат на располагање, меѓу кои намалување на ДДВ за горивата од 10 на 5 проценти и дополнително намалување на акцизата за дизелот за 4 денари.

Левица бара и контрола на работењето во нафтениот сектор и проверка на евентуални злоупотреби на пазарната позиција. Партијата предлага задолжителна контрола и обележување на комерцијалните резерви, со податоци за количината на набавеното гориво, набавната цена и времето на набавка.

Од Левица оценуваат дека државата и РКЕ не треба само да ги следат промените на светските цени, туку да ги преиспитаат и домашните давачки и регулаторните механизми што влијаат врз крајната цена на горивата.