Од внатрепартиска пресметка до Обвинителството: ВМРО-ДПМНЕ бара предмет за хеликоптерите на Петровска

ВМРО-ДПМНЕ го повика Јавното обвинителство да отвори предмет и да ги провери наводите што во јавноста ги изнесе лидерот на СДСМ, Венко Филипче, во врска со договорот за набавка на хеликоптери потпишан од поранешната министерка за одбрана Славјанка Петровска.

Од владејачката партија тврдат дека станува збор за сериозни наводи кои не треба да останат на ниво на политички и внатрепартиски пресметки и бараат институционална проверка.

„Филипче јавно изјави дека Петровска ‘потпишала за 37 милиони евра поскап договор за набавка на хеликоптери, откако комисијата донела друга одлука’. Ова се сериозни наводи кои не смеат да останат само на ниво на партиски пресметки“, велат од ВМРО-ДПМНЕ.

— реклама —

Филипче, сепак, во оригиналната изјава се повика на претходно изнесени тврдења од министерот за одбрана Владо Мисајловски, додека зборуваше за критиките што кон раководството на СДСМ ги упатува Петровска.

„Се прашувам што е причина за ова? Да не е изјавата на Мисајловски, да потпишала за 37 милиони евра поскап договор за хеликоптерите, за која комисијата донела друга одлука“, рече Филипче.

— реклама —

ВМРО-ДПМНЕ сега бара Обвинителството да ги провери овие наводи и да утврди дали при набавката имало неправилности или противзаконско постапување.

„Го повикуваме Јавното обвинителство да ги разгледа јавно изнесените наводи и обвинувања на пратеникот и претседател на СДС, Венко Филипче, за евентуален сторен криминал од пратеничката на СДС и поранешна министерка за одбрана, Славјанка Петровска“, соопшти ВМРО-ДПМНЕ.

Од партијата бараат Филипче да ги објави сите информации со кои располага и да ги достави до надлежните институции.

— реклама —

„Ваков скандал, обелоденет од Филипче, токму за пратеничката од неговата пратеничка група на СДС, не смее да биде игнориран од надлежните институции и истражните органи“, велат од ВМРО-ДПМНЕ.

Партијата бара Јавното обвинителство да постапи по допрен глас и да утврди дали постои основа за понатамошна постапка.

— реклама —

„Јавните обвинувања за криминални договори вредни, како што самиот Филипче рече, 37 милиони евра не смеат да бидат средство за меѓупартиски пресметки, туку тие мора да добијат институционална проверка и одговор пред јавноста“, додаваат од ВМРО-ДПМНЕ.

Договорот за набавка на осум повеќенаменски хеликоптери од италијанската компанија „Леонардо“ беше потпишан во март 2024 година, во периодот кога Петровска беше министерка за одбрана. Набавката опфаќа хеликоптери AW149 и AW169M, како и дополнителна опрема, резервни делови, обука и инфраструктура.

Од ВМРО-ДПМНЕ на крајот повторно бараат Обвинителството да отвори предмет и да ги провери околностите околу договорот.