Од утринава официјално започна да сообраќа првата линија од проектот „Градски воз“, која ги поврзува Зелениково и Железничката станица во Скопје. Првиот воз тргна во 06:20 часот, со што проектот влезе во оперативна фаза.
Линијата има седум попатни станици – Ново Зелениково, Орешани, Јане Сандански, Драчево, Лисиче и Железничката станица како крајна дестинација. На релацијата ќе сообраќаат три возови, според возниот ред подготвен од „Македонски железници-транспорт“.
Цената на билетот во еден правец е 40 денари, додека повратниот билет чини 70 денари.
Од Зелениково се предвидени осум поаѓања дневно – во 06:20, 08:30, 12:26, 14:00, 16:25, 18:30, 20:12 и 21:55 часот. Од Железничката станица возовите ќе тргнуваат во 05:32, 07:30, 11:40, 13:20, 15:42, 17:45, 19:12 и 20:56 часот.
За потребите на проектот, „Македонски железници-инфраструктура“ ја реконструираше пругата на оваа делница, со што е зголемена безбедноста и овозможено е зголемување на брзината на возовите.
Паралелно се подготвуваат и другите две линии од проектот. Втората ќе ја поврзува Железничката станица со Бутел, Скопје-Север и Ѓорче Петров, додека третата ќе сообраќа преку Автокоманда и Маџари до Илинден.
