Граѓаните на Скопје и околината од денеска имаат нова можност за побрзо и поефикасно патување – официјално е пуштен во употреба градскиот воз на релацијата Транспортен центар Скопје – Зелениково.
Возот сообраќа по траса долга околу 25 километри, а од Зелениково до Скопје се очекува да се патува за околу 20 минути. На пуштањето во употреба присуствуваа премиерот Христијан Мицкоски, заменик-претседателот на Владата и министер за транспорт Александар Николоски и градоначалникот на Град Скопје, Орце Ѓорѓиевски.
Од Град Скопје велат дека со целосната рехабилитација на железничката пруга граѓаните добиваат побрз, побезбеден и поефикасен начин на патување, што треба да придонесе и за намалување на сообраќајниот метеж.
Во рамки на проектот е извршена темелна модернизација на пругата. Стариот колосек е демонтиран, дотраените дрвени прагови се заменети со бетонски, а колосекот е машински подбиен и регулиран со современа механизација.
Планот е железничкиот и автобускиот превоз да функционираат како интегриран систем, со усогласување на возните редови за полесно поврзување на различните делови од Скопје и околните населени места.
Градскиот воз е дел од пошироките планови за модернизација на јавниот превоз. Завршена е постапката за набавка на 100 нови градски автобуси, чија испорака се очекува во периодот што следува.
Паралелно, подготовките за БРТ-системот се во завршна фаза. Од Град Скопје очекуваат овие проекти да придонесат за помал сообраќаен метеж, почист воздух и поквалитетен јавен превоз за граѓаните.
