СДСМ преку соопштение оцени дека македонското земјоделство е доведено во катастрофална состојба за време на двегодишното владеење на ВМРО-ДПМНЕ и побара политичка одговорност од министерот за земјоделство, шумарство и водостопанство, Цветан Трипуновски.
Од партијата тврдат дека субвенциите се намалени за 40 милиони евра, а наместо ветеното зголемување, земјоделците добиле помала финансиска поддршка. Посочуваат дека субвенциите за говеда се намалени од 12.000 на 8.000 денари по грло, додека поддршката за тутунот е намалена од 100 на 80 денари за прва класа.
Според СДСМ, голем број земјоделци сè уште чекаат исплата на субвенциите, додека производните трошоци постојано растат. Дополнително, велат дека откупот од малите земјоделци е намален за 46,2 проценти, што, според нив, е показател за сериозен пад на производството и пласманот.
Партијата наведува дека сточарите протестираат поради доцнењето на субвенциите и намалените откупни цени на млекото, житопроизводителите влегуваат во жетва без позната откупна цена, а лозарите и оризопроизводителите се соочуваат со неизвесност и укинати мерки за поддршка.
СДСМ обвини и за стопирање на повиците за набавка на трактори и механизација преку Програмата за рурален развој, како и за корупциски скандали поврзани со ИПАРД програмата.
„Време е Трипуновски да понесе одговорност за катастрофалната состојба во земјоделието“, порачаа од СДСМ, потсетувајќи дека поднеле интерпелација против министерот.
