И покрај тоа што плажите во Анапа на брегот на Црното Море се исполнети со туристи, летната сезона во Русија е далеку од вообичаена. Во петтата година од војната во Украина, безбедносната состојба, нападите со дронови и недостигот од гориво значително влијаат врз туризмот и угостителството, а само на анектираниот Крим до крајот на јуни биле откажани околу еден милион резервации.
Туристите велат дека при изборот на дестинација сè почесто ја земаат предвид безбедноста. Пред да отпатуваат, проверуваат дали во местото има напади или други безбедносни ризици, а многумина однапред знаат каде би се засолниле доколку се огласат сирените за воздушна опасност.
Новинарите на „Ројтерс“, кои престојувале неколку дена на брегот на Црното Море, секојдневно добивале предупредувања за можни ракетни напади, а двапати биле активирани и сирени. Сепак, повеќето капачи речиси и не реагирале, бидејќи ваквите предупредувања станале дел од секојдневието во многу руски градови.
Украина отворено соопштува дека со нападите врз цели длабоко на руска територија сака војната да ја пренесе и во Русија. Како последица на нападите врз рафинериите, во делови од земјата се појавил и недостиг на гориво.
Последиците најсилно ги чувствуваат хотелите и угостителските објекти. Сопственик на ресторан во Анапа изјавил дека оваа сезона воопшто не го отворил локалот поради недостиг на гости, додека сопственичка на хотел открила дека наместо вообичаените неколку стотици гости, моментално има само 17.
Сепак, не сите туристички капацитети се соочуваат со исти проблеми. Во дел од хотелите пополнетоста е речиси целосна, но туристичките работници велат дека гостите резервираат во последен момент поради неизвесноста и надежта за пониски цени.
Најтешко е погоден Крим, каде што покрај недостигот од гориво и електрична енергија, до крајот на јуни биле откажани околу еден милион туристички резервации, што, според руската Асоцијација на туристички оператори, предизвикало загуби од околу 25 милијарди рубљи.
Истовремено, сè повеќе Руси го поминуваат летниот одмор во странство. Според податоците на туристичките оператори, Турција и Египет се најбараните дестинации, додека Русија бележи значителен пад на уделот во продажбата на туристички аранжмани во споредба со минатата година.
И покрај тешкотиите, дел од туристичките работници остануваат оптимисти и веруваат дека сезоната може да се спаси со добро планирање, иако признаваат дека неизвесноста останува најголемиот предизвик.
