Голем шумски пожар што избувна кај Локва Рогозница во Хрватска за само неколку часа се прошири кон Омиш и предизвика тешка состојба на терен. Огнот стигнал до куќите, а стотици луѓе биле евакуирани, додека повеќе лица се повредени.
Според хрватските медиуми, околу 200 лица во текот на ноќта биле евакуирани, дел со автобуси кон Сплит, а дел со чамци. Евакуираните биле згрижени во спортската сала „Рибњак“ во Омиш и во салата „Грипе“ во Сплит. Дел од туристите морале да ги напуштат сместувањата без личните работи, а некои останале и без документи и пари.
Бројот на повредените, според последните информации, достигнал 19 лица, меѓу кои има и лица со изгореници и потешки повреди. Двајца со тешки повреди биле пренесени во сплитската болница, а медицинските екипи биле ставени во состојба на подготвеност.
Шефот на противпожарната служба, Славко Туцаковиќ, изјавил дека пожарот за само два часа се проширил од Мимиќе до Омиш, потпомогнат од силниот ноќен ветер.
„Носена од силен ноќен ветер, се рашири како запален барут“, изјавил Туцаковиќ, додавајќи дека се оштетени голем број возила, куќи, маслинови насади и ресторани.
Пожарот ја зафатил и тврдината Фортица во Омиш, додека тврдината Мирабела засега не е загрозена. Огнот се проширил и кон Радмановата млина, како и кон подрачјата Кучиќи и Подашпиље.
Во гаснењето учествуваат голем број пожарникари, а пристигнуваат и дополнителни екипи од други делови на Хрватска. Во акцијата се вклучени и четири противпожарни авиони „Канадер“.
Министерот за економија, Анте Шушњар, кој го посети погоденото подрачје, изјавил дека видел голем број изгорени автомобили и дека точната материјална штета ќе може да се процени откако пожарот целосно ќе биде ставен под контрола.
Сателитскиот систем OroraTech го регистрирал првото жариште на 13 август во 20:38 часот. До 23:41 часот биле забележани околу 200 жаришта во поширокото подрачје на Локва Рогозница, Мимиќе, Свинишќе, Кучиќи и Подашпиље.
Според пожарникарите, во тек е борбата со преостанатите жаришта, а целосниот обем на материјалната штета ќе биде познат по завршувањето на интервенцијата.
