Пожарникарите во Белгија успеале да го опколат големиот шумски пожар во природниот резерват „Хоутс Фањ“ во близина на границата со Германија, пет дена откако избувнал. Сепак, огнената стихија, која досега зафати околу 3.000 хектари, сè уште не е ставена под целосна контрола.
Итните служби во текот на ноќта работеле на создавање противпожарен појас со отстранување на површинскиот слој од земјата и вегетацијата. На овој начин успеале да стигнат и до делови од пожарот кои поради непристапниот терен биле недостапни за копнените екипи.
Огнената линија се приближила на околу 2,3 километри од германската граница, пред пожарникарите да успеат да го опколат пожарот.
И покрај напредокот, опасноста не е целосно отстранета. Во текот на ноќта биле регистрирани неколку нови избувнувања, поради што екипите и натаму остануваат на терен.
„Работата сè уште не е завршена“, изјавил портпаролот на гувернерот на покраината Лиеж.
Поради дождот и густата облачност во вторникот, противпожарните авиони и хеликоптери не можеле да полетаат. Надлежните се надеваат дека временските услови во среда ќе овозможат повторно да бидат вклучени во гаснењето на пожарот.
