Министерот за внатрешни работи Панче Тошковски денеска беше во работна посета на СВР Охрид и Регионалниот центар за гранични работи Запад, каде со раководствата разговараше за безбедносната состојба, тековните активности и приоритетите во работењето.
Во СВР Охрид, главна тема биле подготовките за ставање во функција на командниот центар потребен за примената на системот „Безбеден град“. Според Тошковски, активностите се во завршна фаза, а системот се очекува да започне со работа од 12 октомври на целото подрачје на СВР Охрид.
Со тоа, системот ќе биде проширен на Охрид, Струга, Кичево и Дебар. Во следните две недели треба да бидат завршени преостанатите активности за негово целосно ставање во функција.
На состаноците се разговарало и за борбата против криминалот и корупцијата, спречувањето на нелегалната трговија и дистрибуцијата на дрога, јавниот ред и мир, како и безбедноста во сообраќајот.
Тошковски во Регионалниот центар за гранични работи Запад информираше и за проширувањето на соработката со ФРОНТЕКС. Според најавата, активностите на европската агенција, кои досега се спроведуваат на јужната граница, ќе бидат проширени и на западната граница, а заедничките активности се очекува да започнат на почетокот на идната година.
Целта е да се обезбедат дополнителни капацитети и подобра контрола на западната граница, особено кон Албанија.
Од МВР наведуваат дека продолжуваат активностите за модернизација на полициското работење, зајакнување на граничната безбедност и унапредување на капацитетите на полициските служби.
