Со рекордна посетеност и продажба на билети, вечерва завршува 66. издание на фестивалот „Охридско лето“, кое годинава донесе бројни настапи на врвни уметници од Македонија и од светот.
Од фестивалот посочуваат дека токму интересот на публиката е најголемата потврда за успешноста на годинашното издание. Охрид и ова лето беше место на кое се сретнаа различни уметнички изрази, а резултатите, според организаторите, ги надминале очекувањата.
Од „Охридско лето“ упатија благодарност до Министерството за култура и туризам за континуираната поддршка, како и до генералниот спонзор, А1 Македонија, останатите спонзори, партнери и пријатели на фестивалот, чија поддршка придонела за реализација на богатата програма.
Посебна благодарност е упатена и до фестивалскиот тим, кој во текот на целото лето бил ангажиран во организацијата и реализацијата на настаните.
„На секој член од тимот кој денови и ноќи работеше, организираше, решаваше проблеми, беше на терен и се грижеше секој концерт, секоја претстава и секој фестивалски момент да биде реализиран на највисоко ниво – ви благодарам од срце“, се наведува во објавата на фестивалот.
Со спуштањето на завесата на 66. издание, „Охридско лето“ зад себе остава фестивалско лето одбележано со врвна уметност, голем интерес од публиката и рекордни резултати.
