Членот на Извршниот одбор на СДСМ, Драган Крајовски, обвини дека граѓаните на Битола се „колатерална штета“ на, како што наведе, бизнис интересите на власта и побара итна истрага за наводното труење на вработени во РЕК Битола.
„Денес Битола е на колена“, изјави Крајовски, посочувајќи на, според него, сериозни инфраструктурни проблеми, поплави, диви депонии и зголемени комунални трошоци кои дополнително го оптоваруваат животниот стандард на граѓаните.
Тој обвини дека управувањето со институциите е партизирано, со поставување нестручни кадри, што, како што рече, довело до нефункционалност на системот. Како пример го наведе раководењето со РЕК Битола, оценувајќи дека изборот на директор не бил во согласност со стручноста што ја бара позицијата.
Крајовски изнесе и сериозни обвинувања за здравствената состојба на вработените, тврдејќи дека „стотици“ лица завршиле на лекување поради труење, дел на Инфективното одделение, а дел со компликации на други клиники.
Според него, првичните реакции на надлежните биле несоодветни, со што, како што тврди, наместо да се охрабрат вработените да побараат медицинска помош, тие биле обвинети за злоупотреба.
„Со лошо менаџирање, цената секогаш ја плаќаат граѓаните“, изјави Крајовски, додавајќи дека е потребно итно да се утврди одговорност.
Од СДСМ бараат целосна истрага, преиспитување на сите одлуки кои, според нив, имаат директно влијание врз здравјето и животниот стандард на битолчани, како и санкции за одговорните лица.
