Унгарскиот премиер Виктор Орбан изјави дека војната меѓу Русија и Украина ја довела Европа до „историска раскрсница“, предупредувајќи дека континентот се соочува со две можни насоки – една која нуди шансa за мир и друга која, како што рече, води „директно во војна“.
Орбан повтори дека американскиот претседател Доналд Трамп „не се откажал“ од намерата да донесе мир во Украина и повика европските лидери да застанат зад неговата иницијатива.
„Можеме да се вратиме од оваа слепа улица и конечно да се обединиме зад мировната иницијатива на претседателот Трамп, вклучувајќи ги и бриселските бирократи. Тоа би значело лидерите кои го поддржуваат продолжувањето на војната да признаат дека во последните три и пол години ги трошеле тешко заработените пари на Европјаните на конфликт кој не може да се добие на бојното поле“, рече Орбан.
Според него, алтернативата е опасна.
„Ако европските лидери што ја поддржуваат војната продолжат да испраќаат пари и оружје во Украина без поддршка од САД, тогаш го отвораат патот за европско-руски судир. Европа добро знае каде води тој пат – последиците отсекогаш биле трагични“, предупреди тој.
Орбан нагласи дека Унгарија јасно избрала страна:
„Не постои дилема за нас – го избираме патот на мирот. Така нѐ задолжи унгарскиот народ, а тоа го диктираат и моралот и здравиот разум“, изјави премиерот, додавајќи дека во таа насока испратил писмо до претседателката на Европската комисија.
