Министерот за здравство Азир Алиу денеска, заедно со националната координаторка за трансплантација, проф. д-р Билјана Кузмановска, ја претстави имплементацијата на нов модул во системот „Мој термин“, преку кој граѓаните ќе можат да ја евидентираат својата одлука дали по смртта сакаат да бидат органодарители. Според најавите, модулот ќе почне да функционира од 1 октомври годинава.
Алиу истакна дека со измените на Законот за земање и пресадување делови од човечкото тело заради лекување државата направила значаен исчекор во областа на трансплантацијата. Како што рече, со ова прашањето за органодарителството добива јасна законска рамка, а граѓаните ќе имаат можност на едноставен и безбеден начин да ја изразат својата волја.
Тој нагласи дека потребата од вакво решение е голема, бидејќи во моментов во Македонија 240 пациенти чекаат трансплантација на органи и ткива. Од нив, 168 пациенти чекаат бубрег, 37 срце, 12 црн дроб, а 23 пациенти имаат потреба од трансплантација на рожница.
Според министерот, секој полнолетен граѓанин при посета на својот избран матичен лекар ќе може да се изјасни дали се согласува или не се согласува по смртта да биде дарител на органи и ткива. Пред да ја даде изјавата, матичниот лекар ќе има обврска да го информира за значењето на одлуката, нејзините правни последици, како и за можноста таа во секое време да биде изменета.
Изјавата ќе се потпишува лично, ќе биде заверена од избраниот лекар и архивирана, а потоа како скениран документ ќе биде внесена во националната електронска евиденција во здравството. Граѓаните во секое време ќе можат да ја променат својата претходна одлука со поднесување нова изјава кај матичниот лекар, при што секогаш ќе важи последната евидентирана изјава.
Од Министерството за здравство нагласуваат дека пристапот до овие податоци ќе биде строго ограничен и контролиран. Секој увид во системот ќе биде евидентиран и ќе биде дозволен исклучиво за овластени лица, со што ќе се обезбеди целосна заштита на личните податоци и доверливоста на информациите.
Алиу информираше дека паралелно со имплементацијата на модулот се подготвуваат и подзаконските акти со кои дополнително ќе се регулираат националната листа, пристапот до податоците, формата на изјавата, како и постапката за нејзино поднесување и измена.
На крајот, министерот упати благодарност до националната координаторка за трансплантација, проф. д-р Билјана Кузмановска, трансплантациските тимови, лекарите, медицинските сестри и сите здравствени работници кои, како што рече, секојдневно придонесуваат за развојот на системот за органодарителство и трансплантација и за спасување човечки животи.
