Потпретседателот на ДУИ, Бујар Османи, ја оцени како сериозен удар врз албанскиот идентитет одлуката на Уставниот суд со која беа укинати преименувањата на повеќе улици и на градскиот плоштад во Тетово, нарекувајќи го денот „црн за Албанците“.
Во објава на социјалните мрежи, Османи реагираше на одлуката со која повторно се враќаат старите имиња на улиците и плоштадите, меѓу кои и називот „Маршал Тито“ за централниот плоштад во Тетово, наместо името „Илирија“.
„Уставниот суд ја поништи одлуката за преименување на улиците и плоштадите во Тетово, враќајќи го името ‘Маршал Тито’ наместо плоштадот ‘Илирија’. Уште еден удар врз албанскиот идентитет. Уште една рана врз заедничката иднина. Уште еден чекор назад за оваа земја“, напиша Османи.
Тој упати критики и кон градоначалникот на Тетово, Биљал Касами, како и кон коалицијата ВЛЕН, посочувајќи дека одлуката се случува во период кога тие се дел од власта.
„На крајот на краиштата, Биљал Касами треба да биде среќен. Тој пишуваше поезија за Тито. Денес Тито се врати во Тетово за време на неговата власт и власта на ВЛЕН. Албанците нема да го заборават тоа“, порача Османи.
Уставниот суд вчера со мнозинство гласови ја укина одлуката донесена во 2007 година, со која беа преименувани повеќе улици и плоштадот во Тетово. Од Судот образложија дека тогашниот Совет на Општина Тетово не обезбедил согласност од Владата, иако тоа било законска обврска согласно Законот за определување имиња на улици, плоштади и други инфраструктурни објекти.
Со одлуката од 2007 година, плоштадот „Маршал Тито“ беше преименуван во „Илирија“, а беа променети и имињата на улиците „Радован Цониќ“, „Иво Лола Рибар“ и „29 Ноември“.
Постапката пред Уставниот суд беше поведена по иницијатива на Сојузот на борците од Народноослободителната борба и група граѓани од Тетово.
