Потпретседателот на ДУИ, Бујар Османи, остро реагираше на Предлог-законот за правична и соодветна застапеност, оценувајќи дека доколку биде усвоен, ќе претставува „еден од најцрните денови за меѓуетничките односи и за духот на Охридскиот рамковен договор“.
Според Османи, предложеното решение не претставува само промена на механизмот за вработување, туку целосно ја менува логиката на правичната застапеност, која, како што наведува, била еден од темелите на Охридскиот договор.
„Досега застапеноста се гарантираше на почетокот на процесот. Ако имаше пет работни места предвидени за Албанци, се натпреваруваа Албанци и се избираа петте најдобри меѓу нив. Истото важеше и за другите заедници. Еднаквоста беше гарантирана однапред, а мерит-системот одлучуваше во рамки на заедницата“, посочува Османи.
Тој тврди дека со новото законско решение процесот ќе се одвива обратно.
„Најпрво раководителите на институциите ќе избираат кого сакаат, под образложение на меритократија. Дури потоа, на крајот на годината, државна комисија ќе оценува дали е почитувана правичната застапеност. Тоа значи дека правичната застапеност повеќе не е гаранција пред вработувањето, туку административен извештај по вработувањето“, наведува Османи.
Според него, станува збор за суштинска промена на концептот.
„Од систем кој гарантираше еднаквост на влезот, преминуваме во систем кој сè им остава во рацете на директорите на институциите, а потоа тврди дека неправдите можат да се исправат со годишни извештаи“, оценува Османи.
Тој предупредува дека усвојувањето на законот може сериозно да влијае врз меѓуетничките односи во државата и врз принципите воспоставени со Охридскиот рамковен договор.
