Остварена средба на Крмов со претставници од Европскиот парламент - дискриминацијата и цензурата на Левица ќе бидат нотирани во европските извештаи

Координаторот на пратеничката група на Левица, Борислав Крмов, на средба со претставници на Европскиот парламент ја отворил темата за реформите во Македонија, но и за, како што наведе, проблемите со изборното законодавство и нерамноправниот третман на неговата партија.

Средбата се одржала во рамки на 25. состанок на Мешовитиот парламентарен комитет Македонија – Европска Унија. Крмов оценил дека бројот на спроведени реформи не може да биде замена за нивниот демократски и правен квалитет.

— реклама —

Како примери ги посочил Законот за Судскиот совет, кој по донесувањето бил предмет на корекции, како и Законот за рестриктивни мерки. Според него, ваквите случаи укажуваат на слабости во начинот на кој се подготвуваат законските решенија.

— реклама —

Во фокусот на разговорот бил и Изборниот законик и, според Крмов, системската дискриминација на Левица. Тој навел дека измените на изборното законодавство годинава не биле донесени поради, како што тврди, условувањето на ДПМНЕ за вклучување на дијаспората.

Крмов го посочил и прашањето со распределбата на средствата за политичко рекламирање. Според неговите наводи, Левица, иако парламентарна партија со шест пратеници и сопствена пратеничка група, не била опфатена во распределбата на средствата за политичко рекламирање.

— реклама —

Како пример ја навел и кампањата за вториот круг од изборите за градоначалник на Скопје, кога, според него, биле присутни реклами од кандидатот на ДПМНЕ, додека кандидатот на Левица, Амар Мециновиќ, немал рекламен простор.

Од Левица наведуваат дека ваквиот третман предизвикал реакции кај претставниците на Европскиот парламент. Според партијата, тие изразиле загриженост поради можноста парламентарна политичка сила да биде ставена во нерамноправна положба, а случајот со третманот на Левица и проблемите со изборното законодавство било најавено дека ќе бидат нотирани во европските извештаи.

На средбата, Крмов го повторил и ставот дека европската иднина треба да се темели на дипломатија и соработка, како и на надминување на трајните политички конфронтации и воспоставување мир.