Во руски напади извршени синоќа врз Дњепропетровската област загинале осум лица, а 11 биле повредени, објави „Украинска правда“.
Според украинските власти, руските сили во текот на вчерашниот ден извршиле речиси 30 напади врз три окрузи во областа.
Во Криви Рих загинале две лица – 65-годишна жена и 43-годишен маж, додека четири лица биле повредени, меѓу кои и деветмесечно бебе.
Тројца од повредените биле хоспитализирани, а 50-годишен маж е во критична состојба.
Во Синелниковскиот округ, во хромадата Дубовики, загинале четири лица, а тројца биле ранети. Во хромадата Миколајивка животот го загубиле уште две лица.
На мета бил и Никополскиот округ.
„Градот Никопол, како и хромадите Марханец, Мирова, Покровске и Червонохрихоривка, беа под напад. Оштетени се инфраструктурни објекти, куќи и автомобили“, изјавил началникот на Дњепропетровската воена управа, Олександр Ханжа.
Тој додал дека три лица биле повредени, меѓу кои и 16-годишно момче кое е хоспитализирано во средно тешка состојба.
Уште едно 16-годишно момче и 21-годишен маж добиле амбулантна медицинска помош.
Ханжа и претседателот на Дњепропетровскиот областен совет, Микола Лукашук, потврдиле дека серијата напади започнала по 20 часот.
