Охридскиот аеродром конечно легализиран по повеќе од шест децении

Охридскиот аеродром „Св. Апостол Павле“ по повеќе од 60 години конечно е впишан во катастар и доби имотен лист, со што официјално е завршен процесот на негово легализирање. Оваа информација ја соопшти вицепремиерот и министер за транспорт, Александар Николоски, на последниот ден од 2025 година.

— реклама —

Како што наведува Николоски, аеродромот кој функционира уште од 1970-тите години, досега немал регулиран имотно-правен статус, што претставувало долгогодишен проблем и пример за негрижа кон државниот капитал.

— реклама —

Во текот на изминатата година, тимови од Министерството за транспорт, АД „Аеродроми“, ТАВ, како и од Агенцијата за катастар на недвижности, Државното правобранителство, Управата за имотно-правни работи и други надлежни институции, интензивно работеле на решавање на овој процес и на впишување на аеродромот во катастарските евиденции.

Николоски потенцира дека иако во нормални услови ваква постапка не би била вест, поради долгогодишното запоставување, јавноста заслужува да биде информирана за овој значаен чекор.

— реклама —

Тој најави дека во наредниот период ќе следат активности за модернизација и реконструкција на Охридскиот аеродром, со цел зголемување на туристичкиот потенцијал и привлекување нови авиолинии и посетители.

— реклама —

На крајот, Николоски упати честитка до граѓаните, посакувајќи убава и среќна 2026 година.