Охридското Езеро е прогласено за најубавото место во Европа според изборот на патописците на светски познатиот магазин „Тајм аут“ (Time Out), оставајќи зад себе низа прочуени европски дестинации.
Во образложението се наведува дека, иако езерото Комо во Италија секоја година привлекува повеќе од еден милион туристи, Охридското Езеро нуди многу помирно, подостапно и подеднакво импресивно искуство.
„Тајм аут“ го опишува Охридското Езеро како едно од најстарите и најдлабоките езера во Европа, со кристално чиста вода, планински пејзажи и крајбрежје исполнето со историски населби кои, како што наведуваат, изгледаат како да застанале во времето.
Посебен акцент е ставен на градот Охрид, кој е опишан како бисер на македонската страна од езерото. Магазинот ги издвојува калдрмисаните улици, средновековните цркви, препознатливите покриви од теракота и можноста посетителите во ист ден да уживаат во капење, разгледување на антички локалитети и незаборавни зајдисонца.
Во текстот се препорачува и посетата на албанската страна на езерото, каде што се издвојуваат селото Лин, археолошките мозаици и мирните кампови покрај брегот.
На листата на десетте најубави места во Европа, зад Охридското Езеро се најдоа термалните извори Сатурнија во Италија, Џиновската патека во Северна Ирска, Алберобело во јужна Италија, Почитељ во Босна и Херцеговина, норвешките фјордови, ботаничките градини Кју во Лондон, каналот Принсенграхт во Амстердам, долината Мозел во Германија и Каса Батљо во Барселона.
