АНДРЕЈ ЖЕРНОВСКИ

„Членство во ЕУ без право на глас“ е манипулација, штетата е национална: Жерновски за изјавата на Мицкоски дека ни било нудено членство во ЕУ

Поранешниот амбасадор Андреј Жерновски преку објава на социјалните мрежи остро реагираше на изјавата на премиерот Христијан Мицкоски дека на Македонија ѝ било нудено членство во Европската Унија без право на глас.Кога немаш резултати, произведуваш наратив. Кога немаш план, измислуваш прикаски.Премиерот Мицкоски пушти теза дека некој ѝ понудил на Македонија членство во Европска унија без право на глас.Сериозна манипулација и сериозен дефокус со несериозна конструкција.Тоа експресно и експлицитно вчера го демантираше евроамбасадорот Михалис Рокас, кој беше мошне јасен и прецизен- таква категорија не постои. Во ЕУ нема членки без право на глас.И наместо да зборуваме за реалните обврски од преговарачката рамка, за реформите што доцнат, за економијата што стагнира и за меѓународната позиција што секојдневно слабее, на јавноста и’ се фрла јадица со измислена понуда. Со театар, кој претставува класичен пример на политички дефокус со намера вниманието на јавноста да се пренасочи од секојдневните владини афери и скандали.Но крајно време е некој да му објани на Мицкоски дека државничкиот пристап подразбира одговорност во зборот. Кога премиер зборува за наводна понуда од ЕУ, тоа не е партиска изјава- тоа е позиција на државата. А кога таа позиција е јавно демантирана, штетата не е партиска. Туку национална, бидејќи Брисел ги гледа и ги следи овие изјави. Таму внимателно се анализира секој јавен став на премиер, секоја формулација, секоја порака што доаѓа од тука. Затоа, кога премиер јавно тврди дека постои можност за „членство без право на глас“ во ЕУ, а тоа експресно го демантира евроамбасадорот, во европските институции не се отвора дилема — се отвора сомнеж.Сомнеж во сериозноста. Сомнеж во капацитетот.Сомнеж во вистинските намери, бидејќи што повеќе се создаваат фантомски сценарија, толку повеќе во Брисел дополнително се зацврстува впечатокот дека за оваа влада, европската интеграција не е приоритет, туку параван.Времето не работи за нас. Регионот се движи. Геополитиката се менува. Секое одложување, секој дефокус, секоја несериозна изјава ја намалува довербата што тешко и макотрпно се градеше.До неодамна бевме добрата вест во Брисел- пример дека и тешки прашања можат да се решаваат со политичка храброст. Денес, наместо да бидеме тема поради напредок, станавме фуснота поради недоследност“, вели Жерновски.

Коментари | пред 2 седмици

Жерновски: За минимална плата нема пари, но за кожни седишта и шампањ на 10.000 метри височина веднаш најдоа

Поранешниот градоначалник на Центар Андреј Жерновски преку објава на социјалните мрежи упати остри критики до Владата за најавите за набавка на авион. Тој оценува дека додека граѓаните се соочуваат со ниски плати и економски притисоци, власта приоритет става на луксуз наместо на животниот стандард.„На граѓаните им велат: „Нема пари! “.На работниците им велат: „Стрпете се!“.На семејствата им велат: „Кризата е глобална!“.Но во исто време, истите тие си купуваат авион за себе.Додека фрижидерите се празни а неплатените сметки се редат една врз друга, и додека минималната плата не стигнува ни за основна храна, власта има јасен приоритет – не достоинствен живот за народот, туку комфорен лет за премиерот.За минимална плата од 600 евра – „нема пари“, но за кожните седишта и шампањот на 10.000 метри височина веднаш најдоа десетици или стотици милиони евра.Машала! Ученикот на истотатака скромниот Груевски, кој си го купуваше “она на М”, очигледно го надмина учителот. Интересно, се претставуваат како народна партија, а ги обожуваат луксузните автомобили и авиони.И додека народот пеш оди низ тмурното секојдневие, власта многу сака да лета.Ајде барем да беа активни на дипломатски план. Барем да имаа интензивни официјални посети, средби, иницијативи, сојузништва.Ама и таму – ништо.Кога никој не ги кани на официјални државнички посети, кога Македонија е сѐ поизолирана, а надворешната политика сведена на соопштенија и изговори, логично се поставува прашањето: за што навистина ќе служи овој авион?За дипломатија – очигледно не.За државни придобивки – уште помалку.Тогаш, дали само за туристички прошетки?Турите со претоварени камиони до Србија веќе им ги пробија.Ќе лета ли авионот празен, за да лета полн?“, вели Жерновски.

Коментари | пред 1 месец

Андреј Жерновски: Цинизмот на власта кулминира – најавуваат „Сејф кантри“ додека Британија зборува за депортации

„Сејф фунти за несејф кантри. Цинизмот на оваа власт одамна престана да биде само стил – стана политика. По проектот „Сејф сити”, Мицкоски најавува ново „визионерство“: проект наречен „Сејф кантри“. И тоа токму во моментот кога британските власти јавно соопштуваат дека со неговата влада разговарале за депортација на мигранти – лица одбиени во Обединетото Кралство поради кри минални досиеја – во замена за пари, вели Андреј Жрновски, поранешен пратеник во Собранието на Македонија.„Прашањето овде не е политичка реторика, туку безбедносна реалност. Колку „сејф“ може да биде една држава која, наместо да ги зајакнува сопствените институции, мора неспособноста и дупките во државниот буџет да ги пополни со прифаќање туѓи безбедносни проблеми? Каква сигурност им се гарантира на граѓаните, кога Македонија се нуди како дестинација за лица кои дури и за далеку помоќни држави се проценети како ризик?Граѓаните не бараат „сејф“ слогани. Бараат сигурни улици, функционални институции и власт што нема да ги третира како колатерална штета во сомнителни меѓународни договори. Сè друго е цинизам – и опасна игра со иднината на државата.Токму деновиве, Европската комисија ја претстави првата петгодишна стратегија за управување со азилот и миграциите, со три јасни цели: спречување на илегалната миграција, заштита на луѓето кои бегаат од војни и прогон и привлекување квалификувана работна сила за зајакнување на економската конкурентност на Европската Унија. Во таа европска рамка нема место за ад-хок договори, тајни зделки и финансиски аранжмани што ги заобиколуваат институциите и јавната дебата. Напротив, европскиот пристап подразбира систем, правила и одговорност.Да заклучиме. Ако Македонија навистина ја гледа својата иднина во Европската Унија, тогаш мора да покаже дека е подготвена да води миграциска и безбедносна политика усогласена со европските стандарди, меѓународното право и сопствениот јавен интерес. Европа не се гради со трговија на суверенитет и со увоз на ризици, туку со институционална зрелост, транспарентност и јасна визија во која безбедноста на граѓаните е неприкосновена.Сè друго не е европски пат, туку опасна импровизација“, вели Жерновски.

Коментари | пред 1 месец

Жерновски го критикува Муцунски: Кризата со транспортерите се решава на маса - очи во очи

Поранешниот заменик министер за надворешни работи Андреј Жерновски му порача на шефот на македонската дипломатија Тимчо Муцунски дека проблемот на транспортерите не се решава со телефонски повик до претседателката на Европската комисија, Урсула фон дер Лајен.„ЕУ на звучник, Македонија на чекањеКога една власт ќе почне јавно да се фали со телефонски разговори, тоа не е дипломатски успех – тоа е доказ за изолација.За министерот Муцунски огромен успех претставува телефонски разговор со еврокомесарката Кос, што јасно ја покажува реалната состојба на македонската надворешна политика денес: вратите во Брисел се затворени, а состаноците се заменети со телефонски повици.Во нормални околности, вакви крајно сериозни теми како кризата со професионалните превозници, блокадите, дозволите и економските штети, се решаваат на маса – очи в очи, со конкретни договори. Вака, реалните проблеми остануваат нерешени, а секој ден што минува без навремена реакција создава сериозни економски и егзистенцијални последици.Зошто не се занимаваа со овој проблем на време? Зошто не ги обезбедија превозниците со поддршка и конкретни мерки? Наместо тоа, сега се фалат со разговори што ниту резултираат, ниту им обезбедуваат сигурност на оние кои ја движат економијата.Иронијата да биде цлосна, еврокомесарката за проширување барем одговорила на телефонскиот повик на Муцунски, што не е и случај со Мицкоски, кој самиот јавно призна дека не може да ја добие по телефон претседателката на Европската комисија, Урсула фон дер Лајен.Значи, ни во телефонската дипломатија работите не одат според планот“, реагираше Жерновски.

Коментари | пред 1 месец

„Власта „најде решение“ за младите да останат во Македонија - со суспендирани визи за САД“: Жерновски со саркасточен стил упати критики до власта

Поранешниот амбасадор на Македонија во Романија и поранешен заменик-министер за надворешни работи, Андреј Жерновски, остро ја критикува владината политика по одлуката на САД за суспендирање на имигрантските визи, оценувајќи дека таа е директна последица на лоша дипломатија и лажно прикажани „специјални односи“ со Вашингтон. Според него, наместо со подобри услови за живот, младите се „задржуваат“ во државата преку рестрикции и меѓународна изолација, што претставува пораз за надворешната политика и сериозен удар врз перспективата на земјата.НЕМА ВИЗА НИ ЗА ПЕРИМЕТАРОТБраво за Мицкоски!Конечно најде „стратегија“ како да ги задржи младите во Македонија – така што САД нема да им даваат визи.Не со подобри плати, не со квалитетно образование, не со сигурни институции, туку со меѓународни рестрикции.Од една страна, владата зборува дека ќе направи сè младите да останат дома. Од друга страна, под нејзино водство, Македонија завршува на листа на земји за кои САД ја суспендираат имигрантската политика. Ако ова е планот – тогаш навистина функционира: не заминуваш затоа што сакаш, туку затоа што не можеш.Ова не е политика за младите, туку политика на затворање. Наместо да создаде услови поради кои младите би избрале да останат, власта создава услови поради кои светот им ги затвора вратите.Мицкоски ветува иднина во Македонија, а испорачува изолација.Ветува надеж, а носи рестрикции.Ветува перспектива, а добивме повик за будење од реалноста.Неговите „одлични, специјални односи“ со САД и со Трамп се толку одлични, што реалноста ни донесе повисоки царини за македонските производи и суспендирани визи за македонските граѓани.Мицкоски веќе втора година нè убедува дека е „во периметарот на Трамп“, па затоа сето ова е резултат на лажно прикажаните односи и слабата дипломатија.Погубно е вината да ја бараме во САД, бидејќи проблемот лежи во митот за „прв другар со Трамп“, кој мит е креиран и постои само во домашната пропаганда. Затоа, ова не е проблем на Вашингтон, туку на неспособната и саморекламерска надворешна политика, која повеќе служи за па-ар стратегија, отколку за заштита на интересите на македонските граѓани.Вистинската опозиција денес има обврска да го каже ова јасно:додека Мицкоски зборува за пријателства, Македонија плаќа цена.А тоа е најсилниот доказ дека „специјалните односи“ постојат само во неговите изјави – не и во реалниот свет, пишува Жерновски.

Македонија | пред 2 месеци

Жерновски: Mигрантите ќе се движат слободно низ државата

Со примањето на мигрантите, владата ќе направи исклучително небезбедна држава.Веќе слушаме  детали дека ќе бидат платени дваесет илјади фунти по мигрант. 'Кои мигранти?’ Тоа се оние што Британија одбива да ги прими, а кој кај нас ќе се движат слободно“, рече Андреј Жерновски, член на ИО на СДСМ во дебатната емисија на Топ тема на Телма.Жерновски посочи дека според информациите од британските власти и медиуми, мигрантите нема да бидат сместени во кампови, туку ќе имаат право слободно да се движат низ државата и да користат работни места, што особено носи ризици поврзани со ваквата ситуација.„Не зборуваме за мигранти кои ќе бидат сместени во кампови и ќе ги чуваат чувари. Значи, тие ќе бидат тука меѓу нас, и ние ќе ги гледаме. Не сакам моите деца, нашите деца, да ги доживеат оние сцени што ги гледаме надвор , дивјаштва, грабежи, криминал. Тоа не сакам да го видам во нашата држава. Некој преговарал без да ги праша граѓаните, сам си зел право да разговара за тоа, и тоа сега излегува на површина. Бараме одговори, зошто ние како македонски граѓани да ја добиваме вистината преку медиуми од друга земја, а не од нашата влада, која преговара“, потенцираше Жерновски.Тој додаде дека прашањето за мигрантите е нешто на што веднаш треба да се реагира, затоа што кога ќе бидат веќе испорачани тука, нема назад.„Значи, или нема да има во Македонија шест милијарди евра, или нема да има мигранти , едното со другото не оди. Тоа е вистината што ја прашуваме уште од мај “, потенцираше Жерновски, додавајќи дека круцијалното прашање до власта е дали на Македонија, Британија би ѝ дала 6 милијарди евра без да прими ниту еден мигрант.

Македонија | пред 3 месеци

Жерновски за обвинувањата дека е амбасадор на диво: Со страст ќе ги отвориме темиве штом заврши мојот мандат

Откако од медиумите дознав дека, како амбасадор, сум се тепал по официјални приеми во Романија, за што следеше приватна тужба од моја страна, вчера на истиот начин дознав нова вест- дека сум бил амбасадор „на диво“, напиша на социјалните мрежи Андреј Жерновски, амбасадор во Романија.„Не знам на тие медиуми од каде им е и кој им ја кажал оваа „генијална” теза, но знам дека со некој од нив ќе мора да се видиме на суд. Не дека го сакам тоа, но мора да се воспостави ред, бидејќи клеветењето и нанесување штета на нечиј личен углед и интегритет е крајно сериозна работа, колку и објавувачите или пренесувачите на вакви невистини да не ги поседуваат наведените особини.Како доказ за трагикомичните лаги, денеска ја објавувам фотографијата од предавањето на моите акредитиви во романското МНР. Дополнително, онаму каде ќе биде потребно, ќе ја доставам и мојата лична карта во Романија, која се издава на дипломати, на која пишува дека сум амбасадор на Република Северна Македонија во Букурешт. Истата е издадена од Министерството за надворешни работи на Романија.Многу ми е жал што, поради внатрешните процедури во нашето МНР, разбирливо, не смеам да давам службени изјави додека трае мојот амбасадорски мандат. Се разбира, кога истиот ќе заврши, со задоволство и со страст ќе ги отвориме сите теми.До тогаш, со оние кои шират лаги и клевети, ќе се гледаме на суд“, порача Жерновски

Македонија | пред 1 година