БРЗИ КРЕДИТИ

Клуч на финансиско друштво за брзи кредити, се затвораат околу 40 филијали: Министерството за финансии му ја одзема лиценцата

Министерството за финансии соопшти дека одзело дозвола за работа на едно од поголемите финансиски друштва на пазарот, откако вонреден надзор, спроведен по пријава од граѓанин, открил сериозни неправилности и непочитување на законските прописи.Иако институцијата првично не го откри името на компанијата, порталот „Фактор“ објави дека станува збор за финансиското друштво за брзи кредити „Креди Јес“, зад кое стојат сопственици од Бугарија.Од Министерството за финансии наведуваат дека биле утврдени „груби прекршувања на законските прописи“, постапување спротивно на правилата за заштита на корисниците и практики со кои директно биле доведени во ризик граѓаните – корисници на финансиски услуги.„Поради тежината на утврдените прекршоци и сериозноста на констатираните неправилности, Министерството за финансии во мај донесе решение за одземање на дозволата за работа на финансиското друштво“, стои во соопштението.Според информациите, „Креди Јес“ веќе започнал со затворање на околу 40 филијали низ државата, а околу 120 вработени добиле известување дека работењето е прекинато.Компанијата, како што се наведува, во иднина ќе може единствено да ги наплатува постојните побарувања.„Креди Јес“ работи во Македонија од 2019 година. Според достапните финансиски податоци, минатата година компанијата остварила приходи од околу четири милиони евра и добивка од околу 1,15 милиони евра.Од Министерството за финансии информираат дека од почетокот на годинава биле изречени 22 глоби за 16 финансиски друштва, како и 23 писмени наредби за отстранување на утврдени неправилности.Воедно, најавени се и законски измени со кои дополнително ќе се заострат условите и критериумите за работа на финансиските друштва.„Скопје1“ побара информации од „Кредити јес“ за неправилностите, но и затворањето. Доколку добиеме одговор, ќе го проследиме.

Македонија | пред 11 час

По казината, Владата тргнува и по брзите кредити: се подготвува нивно ограничување

Премиерот Христијан Мицкоски најави дека Владата подготвува мерки и за ограничување на брзите кредити, откако претходно беше утврден новиот Предлог-закон за игрите на среќа и забавните игри.Тој рече дека, според анализите на Владата, токму долговите се една од причините поради кои граѓаните ја напуштаат државата.„Имајќи ги во предвид сите параметри поврзани со оваа индустрија, има одредени стандарди и политики кои оваа Влада ги води. Градовите со рекламите и светлечките билборди ни наликуваат како да коцкарниците се главна индустрија. Ќе се стави крај на оваа перцепција“, рече Мицкоски.Тој посочи дека веднаш до казината и обложувалниците често се отвораат и канцеларии за брзи кредити.„До овие казина, како по правило се отвораат канцеларии за брзи кредити. Следно на што ќе работиме ќе биде тоа“, изјави премиерот.На прашање дали Владата планира конкретни ограничувања за компаниите што даваат брзи кредити, Мицкоски потврди дека се работи на такви решенија, но без да открие детали.„Работиме да ги ограничиме, не би сакал да давам повеќе детали“, рече Мицкоски.Според него, анализите покажале дека задолжувањето е сериозен социјален проблем.„Врз основа на направената анализа, најголем дел од луѓето, за напуштање на државата, го користат аргументот дека им се наталожиле долгови. Во морална смисла на зборот, со овој закон, ќе ја подобриме состојбата во државата“, додаде премиерот.Претходно, Владата соопшти дека го утврдила новиот усогласен текст на Предлог-законот за игрите на среќа и забавните игри, со кој се воведуваат строги ограничувања за рекламирањето на коцкањето, како и забрана казина и обложувалници да се наоѓаат на помалку од 500 метри од училишта.Од Владата велат дека досега се затворени и 358 нелегални странски онлајн платформи за игри на среќа.

Македонија | пред 1 седмица

Интересот за брзи кредити е доказ дека во Македонија не може да се живее од плата, велат од Левица

Растот на интересот за брзи кредити не е показател за економски напредок, туку сериозен аларм дека граѓаните сѐ потешко го преживуваат секојдневието. Кога луѓето се задолжуваат не за инвестиции или подобрување на квалитетот на живот, туку за да купат храна, да платат сметки или едноставно да го „истуркаат“ месецот, тоа значи дека економскиот систем не функционира во корист на мнозинството. Народот веќе практично и официјално не преживува од плата, туку од комбинација на задолжување, позајмици и краткорочни финансиски решенија, велат од Левица.„Ситуацијата дополнително се влошува пред празници, кога наместо олеснување, граѓаните се соочуваат со нереално високи цени на храната и основните производи. Во период кога побарувачката расте, наместо контрола или стабилизација, цените одат нагоре, што директно го урива животниот стандард. За многу семејства, празничната трпеза станува финансиски товар, а не момент на достоинство и радост.Паралелно со тоа, платите не го следат растот на цените, а трошоците за живот, особено за храна, енергија и услуги, растат побрзо од приходите. Ова создава длабок јаз кој граѓаните се принудени да го пополнуваат со кредити. Брзите кредити, со високи камати и кратки рокови, не се решение, тие се замка што дополнително ги вовлекува луѓето во циклус на долгови.Владата мора да интервенира со конкретни мерки. Прво, потребна е контрола и ограничување на цените на основните прехранбени производи во кризни периоди, особено пред празници. Второ, зголемување на минималната плата и нејзино усогласување со реалните трошоци за живот, за граѓаните да можат да преживуваат без задолжување. Трето, воведување построга регулација на брзите кредити – ограничување на каматите и подобра заштита на корисниците од злоупотреби. Четврто, таргетирани субвенции или ваучери за храна и енергија за најпогодените категории. И петто, долгорочно – инвестиции во домашно производство и стабилизирање на пазарот, со цел да се намали зависноста од увоз и ценовни шокови.Во вакви услови, не зборуваме за развој, туку за системско осиромашување. Наместо економија што создава сигурност и стабилност, добиваме економија што ги турка граѓаните да живеат на кредит, без реална перспектива дека нивната работа и плата ќе им овозможат достоинствен живот“, се вели во соопштението од партијата.

Македонија | пред 1 месец

Илјадници граѓани преплатиле трошоци за брзи кредити

Министерството за финансии утврдило серија прекршувања кај финансиските друштва што издаваат таканаречени брзи кредити, поради што дел од граѓаните ќе треба да добијат поврат на незаконски наплатени трошоци, соопшти министерката за финансии Гордана Димитриеска-Кочоска, најавувајќи дека ќе следуваат и промени во регулативата.Според податоците презентирани на вчерашниот брифинг со новинарите, во текот на годинава биле склучени 228.880 договори со финансиски друштва – најголемиот дел за брзи потрошувачки заеми. Вкупната вредност на договорите изнесува 132 милиони евра, од кои околу 20 милиони евра биле позајмени од 508 компании. Дел од граѓаните имаат потпишано повеќе договори.Министерството спроведува засилен надзор и, како што рече министерката, биле откриени случаи каде што е надминат законскиот лимит за наплата на вкупни трошоци.„Кај дел од граѓаните што земале брзи кредити е надминат законскиот лимит за наплатен трошок… Оние што земале повеќе пари, мора да им ги вратат на граѓаните,“изјави Димитриеска-Кочоска.Таа додаде дека веќе се издадени прекршочни налози, но институциите внимателно одмеруваат дали во одделни случаи да се оди и кон одземање лиценци.

Македонија | пред 4 месеци

(Фото) „Уловен“ од камерите! Уапесен крадец на филијали за брзи кредити

Лишено од слобода лице од Скопје, признал две разбојништва во филијали за брзи кредити, поднесена му е кривична пријава и определен му е притворНа 26.10.2025 во Скопје, полициски службеници од СВР Скопје го лишија од слобода Б.А.(25) од Скопје. Тој се сомничи дека на 15.08. и 18.08.2025 извршил разбојништва во две подружници на финансиски друштва на подрачјето на ЕВР Центар и Бит Пазар, односно дека со закана со пиштол одзел пари.Лицето е задржано во полициска станица и во службен разговор ги признал делата. Во координација со јавен обвинител, против него е поднесена кривична пријава по итна постапка, а судија на претходна постапка му определи мерка притвор од 30 дена.

Скопје | пред 6 месеци