Јавно обвинителство

Коцевски жестоко кон Адвокатската комора: „Местото за соочување на доказите за „Пулс“ е судницата, а не медиумите“

Јавното обвинителство на Република Северна Македонија попладнево остро реагираше на јавните настапи на дел од адвокатите кои го коментирале обвинението за пожарот во кочанската дискотека „Пулс“. Оттаму коментираат дека со нивните изјави го нарушуваат угледот на судот и институциите.Во писмо испратено до Адвокатската комора на Република Северна Македонија, јавниот обвинител Љупчо Коцевски посочува дека дел од адвокатите јавно изнесуваат неосновани проценки за текот и траењето на судската постапка, без да бидат запознаени со доказите и обвинението. Таквото однесување, како што се наведува, е спротивно на Кодексот за професионална етика на адвокатите, според кој тие се должни да го чуваат угледот на судовите и правосудните органи.Изнесувањето на неосновани проценки за долгото траење на судската постапка наштетува на угледот на Судот и претставува обид истиот да се прикаже како спор и неефикасен, иако судењето воопшто не е започнато“, се вели во реакцијата.Обвинителството наведува дека дел од адвокатите се претставуваат како независни експерти, а притоа не откриваат дека се бранители на обвинетите, со што, според институцијата, ја доведуваат јавноста во заблуда. Како пример за неетички јавен настап, во писмото е посочено учеството на адвокатката Сузана Јошевска Атанасовска во емисијата „Студио 10“ на ТВ 24, каде што, според Обвинителството, изнесла невистини дека не ѝ бил доставен целосниот доказен материјал.Наведените пораки се дел од доказен материјал што е интегрално доставен во Судот и до сите бранители, стои во дописот.Коцевски нагласува дека доказниот материјал во предметот „Кочани“ е обемен и резултат на макотрпна работа на обвинителите, особено потенцирајќи дека местото за соочување на доказите е судницата, а не медиумите.Пред нас е тежок, но исклучително важен процес со кој треба да испорачаме правда за жртвите во кочанската трагедија. Адвокатите имаат професионална одговорност да придонесат за ефикасно и правично судење, наведува Коцевски, барајќи од Адвокатската комора да апелира за почитување на етичките стандарди.Обвинителството истакнува дека тимот кој го застапува обвинението за пожарот во „Пулс“ има целосна поддршка од институцијата и дека нема да дозволи ниту едно рочиште да се одложи по вина на јавен обвинител.„Поднесениот обвинителен акт е потврден од Судот и е стапен на правна сила. Наскоро ќе следуваат одлуки и во други постапки поврзани со овој тежок настан“, се вели на крајот во реакцијата на Јавното обвинителство.

Македонија | пред 3 месеци

Политичарите за се воздржат од недолични коментари пред изборите! Реакција на обвинителите

Здружението на јавните обвинители најостро реагира на недоличните и неаргументирани изјави на одредени политичари со кои директно се загрозува интегритетот и самостојноста на Јавното обвинителство и на правосудните институции воопшто.Апелираме особено политичарите во предизборната реторика да се воздржат од неосновани напади со кои ја поткопуваат довербата во правосудните институции и го нарушуваат угледот на јавните обвинители.Јавното обвинителство е самостојна институција чија работа се темели исклучиво врз основа на Уставот, законите и материјалните докази. Ниту еден предмет не може и не смее да се води врз основа на политички притисоци или јавни прозивки, туку само врз основа на аргументирани факти и во рамките на законски пропишаните процедури.Потсетуваме дека секој што смета дека постојат елементи за кривично гонење, има право да поднесе соодветна пријава до надлежното обвинителство. Пријавата ќе биде внимателно разгледана и процесуирана во согласност со доказите и законската рамка.Јавните обвинители ја извршуваат својата функција професионално, совесно и самостојно, и токму затоа е од особена важност да се обезбеди простор тие да ја вршат својата работа без притисоци, навреди или мешање од страна на политички или други центри на моќ.

Македонија | пред 4 месеци

Ова е епилогот од претресите во Скопје и Куманово: шест лица под истрага, се бара и притвор

Основното јавно обвинителство Скопје отвори истрага против шест лица, осомничени за организирана и продолжена трговија со наркотични дроги, меѓу кои и амфетамин, марихуана и психотропни супстанции.Според обвинителството, осомничените во периодот од 1 мај до 3 јули 2025 година, во повеќе наврати со умисла извршиле поврзани дејствија на неовластено производство и продажба на дрога, при што користеле ист траен однос и слични околности. Станува збор за околу 6,5 килограми амфетамин, 257 грама марихуана и 98 таблети MDMA (екстази).Предистражната постапка траела неколку месеци и дел од доказите се обезбедени со примена на посебни истражни мерки. На 3 јули, сите шест лица беа уапсени во координирана акција на полицијата, а по наредба на судија за претходна постапка беа извршени претреси на повеќе локации во Скопје и Куманово.Во текот на претресите, покрај наведените дроги, биле пронајдени и други наркотични супстанции – хашиш, кокаин, разни таблети, дигитални ваги, готовина и опрема за пакување.Јавниот обвинител поднесе предлог до Основниот кривичен суд Скопје за определување притвор за сите шестмина осомничени.

Македонија | пред 6 месеци

Вработен во Водовод претепан со метални палки, клоци, боксови - жртвата има скршеници

Јавен обвинител од Основното јавно обвинителство Скопје поведе истражна постапка против три лица поради сомнение за кривично дело Насилство по член 386 став 3 од Кривичниот законик, откако на 2 јуни брутално нападнале вработен во пункт на „Водовод“ во Шуто Оризари.Според обвинителството, додека оштетениот паркирал службено возило пред објектот, тројцата осомничени му пришле од зад грб и без повод го нападнале со дрвени и метални палки, клоци и боксови, нанесувајќи му тешки телесни повреди, вклучително и фрактури на повеќе коски. Насилството се случило пред очи на очевидци, предизвикувајќи силна вознемиреност и страв кај присутните.До моментот, еден 29-годишен осомничен е уапсен, а обвинителството побара притвор поради опасност од бегство, повторување на делото и влијание врз сведоците. Другите двајца напаѓачи, на возраст од 38 и 40 години од Сингелиќ, се во бегство, а за нив се распишани насоки за пронаоѓање и приведување.

Македонија | пред 6 месеци

Презентиран акредитиран комуникациско информациски систем за безбедно ракување и размена на класифицирани информации

Денеска во просториите на Јавното обвинителство на Република Северна Македонија пред Јавниот обвинител на Република Северна Македонија Љупчо Коцевски, основниот јавен обвинител на ОЈО Скопје Гаврил Бубевски, министерот за внатрешни работи Панче Тошковски, директорот на Бирото за јавна безбедност Александар Јанев и директорката на Оперативно-техничката генција Марија Јаническа беше презентиран акредитиран комуникациско информациски систем за безбедно ракување и размена на класифицирани информации.За презентираниот комуникациско-информациски систем (КИС) е издаден сертификат за акредитација за ракување со национални класифицирани информации во електронска форма со степен „Строго доверливо“ кој обезбедува законска, заштитена, сигурна, брза и ефикасна дигитална поврзаност, комуникација и интер-операбилност меѓу овластените и надлежни органи во процесот за спроведување на мерките за следење на комуникациите.Воспоставениот систем претставува реформски производ и придонесува кон унапредување на безбедноста и ефикасноста на процесите и промовирање на спроведувањето на контролата и надзорот од страна на надлежните органи и тела, чија функционалност и примена и ќе им овозможи на правосудните и овластените органи брза, ефикасна и сигурна борба со организираниот криминал и корупција, истовремено почитувајќи ги човековите права и слободи и зајакнување на довербата на јавноста како заедничка и системска заложба.

Македонија | пред 1 година