Кедев: Стојам зад сè што кажав – непотребни стентирања ја уништуваат довербата во здравството
Кардиологот Сашко Кедев останува на ставот дека во македонското здравство постојат злоупотреби со непотребни кардиохируршки интервенции и стентирања. Како што истакна во синоќешното гостување на ТВ Алфа, неговата цел е системот да расчисти со неправилностите и да воведе контрола.„Стојам зад сè што кажав. Овој пат јавноста реагира силно, а тоа е исправно. Станува збор за проблеми што ги отварам со години, но досега не наидував на поддршка,“ рече Кедев, нагласувајќи дека сега има позитивна реакција и од институциите и од колегите.Министерството за здравство веќе формира комисија од домашни и странски експерти, како и Лекарската комора, за да ги анализира доставените случаи. Кедев објасни дека доказите се собрани заеднички од 16 лекари – кардиолози и кардиохирурзи – и оти постојат категории на пациенти кај кои сигурно не треба да се прави хируршка интервенција, а тоа може да се докаже со медицинската документација и ангиографските снимки.„Во медицината постои ‘сива зона’, каде може да се направи интервенција, но и да не се направи. Но има и јасни ситуации каде доказите покажуваат дека не треба ништо да се прави. Нашата обврска е пациентот да добие најсоодветен третман – понекогаш тоа е конзервативна терапија и промена на животен стил,“ додаде тој.Кедев оцени дека здравствениот систем моментално располага со најголем буџет досега, но без видливи бенефити за граѓаните. „Вистинското вложување е во контрола и подобрување на квалитетот на услугите. Ако оваа истрага биде почетна точка за тоа, тогаш сме на добар пат,“ рече тој.
Македонија | пред 3 месеци
