ЛЕЈЛА КАДРИУ

Обвинителката Јосифоска бара јавно извинување од Кадриу: Изнесени се лаги за мојата работа во СЈО

Обвинителката Елизабета Јосифоска тврди дека во телевизиското гостување на адвокатката Лејла Кадриу биле изнесени невистини и клевети за нејзината работа во поранешното Специјално јавно обвинителство (СЈО). Таа во писмена реакција наведува дека изнесените ставови на Кадриу се, како што вели, неточни и штетни за нејзиниот професионален углед и за институцијата, најавувајќи можност за тужба за клевета доколку не добие јавно извинување.„Адвокатката Лејла Кадриу во емисијата „Вечерното шоу на Богдан Илиевски“ емитувана на 06.02.2026 година на ТВ Алфа изнесе низа невистини, лаги и клевети  во однос на моето постапување како јавен обвинител во Специјалното јавно обвинителство,  во однос на постапувањето на другите јавни обвинители во тоа обвинителство и  во однос на  работењето на целото Специјално јавно обвинителство.Сметам дека овие лажни и клеветнички изнесувања се направени со цел да се наруши мојата чест и професионален углед, но и да се дискредитира работењето на целата институција Специјално јавно обвинителство.Се што адвокатката Кадриу изнесе во однос на наводното трошење на 1 милион евра за 2,5 месеци во 2015 година е лага и клевета. Податокот колку пари се потрошени во овој период е содржан во првиот Извештај за работењето на СЈО, кој е јавно објавен на 15.03.2016 година и доставен до Собранието на РМ и до Советот на јавните обвинители. Ноторен факт  е дека се потрошени  13.542.671,00 денари, а непотрошените парични средства во износ од 49.877.757,00 денари на 31.12.2015 се вратени во Буџетот на РМ. Податокот за потрошените парични средства е содржан и во завршната сметка на СЈО за 2015 година доставена до надлежните институции.Кадриу изнесе низа клевети и очигледни лаги и во однос на постапувањето по предметот познат во јавноста под името „Пуч“. Дека се што кажа е лага и невистина во однос на овој предмет е очигледно од фактот што предметот со сите докази е предаден од страна на Основен кривичен суд Скопје на СЈО кон крајот на јуни 2016 година. Во тоа време Лејла Кадриу веќе не беше јавен обвинител во СЈО, па се поставува прашањето како воопшто можела да го види предметот „во некое ќуше, неотворен и спакуван во прозирни фолии“.Лејла Кадриу, не се задржа само на ова, туку со цел да се дискретитираат сите предмети на Специјалното јавно обвинителство, изнесе лаги и невистини и во однос на приемот на материјалите од незаконски прислушуваните материјали од политичката партија СДСМ и  понатамошното постапување со нив во СЈО.Јас не присуствував на самиот прием на материјалите на 30.12.2015 година, но начинот на нивното чување и понатамошно постапување е опишан во веќе спомнатиот прв извештај на СЈО. Имено, извршен е детален попис на сите примени материјали од страна на комисија во која и јас бев член,  а записникот од извршениот попис е предаден во судот како доказ во еден од предметите на СЈО.Поради изнесените лаги и клевети, денес упатив писмено барање за извинување до адвокатката Лејла Кадриу. Доколку не добијам извинување, во законскиот рок  ќе поднесам тужба за клевета до надлежниот суд“, вели обвинителката Елизабета Јосифоска.

Македонија | пред 6 часа

Лејла Кадриу: Спасовски испрати советник со конкретни налози како да се постапува по одредени предмети

Екс-обвинителката од Специјалното јавно обвинителство (СЈО), Лејла Кадриу, во најновото издание на Вечерното шоу со Богдан Илиевски, изнесе сериозни обвинувања за начинот на функционирање на институцијата, наведувајќи директни политички влијанија, финансиски злоупотреби и незаконско постапување во периодот кога СЈО било активно.Кадриу изјави дека го напуштила СЈО по само два до три месеци од ангажманот, откако главната обвинителка Катица Јанева ѝ соопштила дека „не е тимски кадар“. Како причина за разидувањето, таа наведува дека одбила да работи на предмети засновани на прислушувани разговори за кои, според неа, немало формален прием и попис доставен до СЈО, што го доведувало во прашање нивниот легалитет.Во делот што се однесува на финансиското работење, Кадриу тврди дека Јанева пред колегите изјавувала: „Јас сум сега жена од милион долари“, алудирајќи на „вишок“ од околу еден милион евра во буџетот на СЈО, при што се барал начин средствата да се потрошат или распределат, за да не се вратат во државниот буџет. Таа додаде дека во тој период СЈО немало овластен финансиски експерт, а со финансиските прашања се занимавала заменичката на Јанева, Елизабета Јосифовска, која „се разбира во финансии бидејќи мајка ѝ ја учела“.Кадриу тврди дека била сведок на директни политички интервенции, при што високи функционери на СДСМ – меѓу кои Радмила Шекеринска, Оливер Спасовски и Зоран Заев – лично доаѓале во просториите на СЈО и одржувале средби со обвинители, давајќи насоки кој обвинител на кој предмет треба да работи.„Министерот Оливер Спасовски испрати советник со конкретни налози како да се постапува по одредени предмети, што јас го одбив и го избришав советникот од канцеларијата“, рече Кадриу.Според нејзиното тврдење, фактичкото водење на СЈО било во рацете на Гаврил Бубевски, додека Катица Јанева била избрана поради амбиции за јавна популарност, а не поради обвинителски капацитет и искуство.По овие настани, Јанева ѝ соопштила дека треба да ја напушти канцеларијата и дека повеќе не е дел од тимот, иако, според Кадриу, изборот и разрешувањето на обвинител во СЈО е надлежност на Советот на јавни обвинители, а не на главниот обвинител.

Македонија | пред 3 дена