претседател

Сиљановска е горда на Армијата: Се борите за шумите, ама време е да се преиспита и системот за заштита и управување со кризи!

Претседателката Гордана Сиљановска Давкова денеска се обрати на централната свеченост по повод 18 Август, Денот на Армијата, што се одржа во Центарот за обука на вода во Охрид.Во своето обраќање претседателката Сиљановска Давкова оддаде признание на припадниците на Армијата за нивното дисциплинирано, совесно и одговорно извршување на воените должности, како дома, така и во странство, преку учество во бројни мировни мисии. Претседателката особено ја истакна посветеноста на Армијата во поддршката на институциите во справувањето со елементарните непогоди и со кризните состојби, како што се пожарите на територијата на целата држава, секогаш правејќи го тоа професионално и пожртвувано и поради тоа, како што нагласи, Армијата континуирано ужива највисока доверба кај македонските граѓани.На централната свеченост беше извршено примопредавање на должноста началник на Генералштабот на Армијата од досегашниот началник, генерал-потполковник Васко Ѓурчиновски на новиот началник на Генералштабот, генерал-мајор Сашко Лафчиски.Во продолжение е интегралното обраќање на претседателката Сиљановска Давкова:Неодамна, на прославата на Илинден, потенцирав дека силата ни извира од единството на нашите различности: етничка, верска, јазична, генерациска, полова, идеолошка. И покрај разликите, Вие, офицерите и подофицерите, војниците и резервистите, ветераните и питомците, споделувате нешто заедничко: сите сте поврзани и обврзани со свечената заклетва дека ќе ги браните слободата, суверенитетот и територијалниот интегритет на државата. Ве потсетувам дека насушна и непресушна потреба и чест е дисциплинирано, совесно и одговорно, како и досега, да ги извршувате воените должности. Знам дека Вие го правите тоа постојано и беспрекорно со макотрпни реформи, согласно строгите НАТО стандарди, со активното и кредибилно учество во мировните мисии во функција на регионалниот и глобалниот мир, преку меѓународните воени вежби на кои ги демонстрирате знаењето и способностите, а најмногу со безрезервната подршка и помош што им ја давате на македонските граѓани и на цивилните институции во справувањето со елементарните непогоди, како пожарите летово.Сево ова ме прави горда на вас, припадниците на Армијата.Вие сте важен мировен гарант и потенцијал во овие тешки времиња на голема неизвесност, предизвикана од глобални и европски безбедносни ризици и разгорени регионални воени конфликти, присуство на традиционални, но и нови, хибридни и сајбер-закани, активни малициозни влијанија и дезинформации од државни и недржавни актери. Современото бојно поле, за жал, од физичкиот се прошири и на дигиталниот простор.Актуелната војна на тлото на Европа и на блискиот Исток која предизвикува невидени човечки страдања и материјални штети, наметнува тешки прашања и дилеми, но и предизвици за човештвото, заради почитувањето и непочитувањето на меѓународното право, неефикасноста во функционирањето на меѓународните институции и овластените меѓународни актери.Знаеме дека Вие, припадниците на Армијата, патот до НАТО го изодевте преку бројни мировни мисии во кои стекнавте не само огромно искуство, туку и голема и заслужена почит. Затоа, ќе продолжиме да придонесуваме за мирот преку учеството во КФОР, Зајакнатото присуство во Летонија и активностите на зголемена будност во Бугарија и Романија како дел од колективниот НАТО-систем на одвраќање и одбрана. И понатаму ќе учествуваме во мисиите ЕУФОР – АЛТЕА и УНИФИЛ. Во моментов, над 180 армиски припадници се ангажирани во мировните мисии и операции, под македонското знаме.На воените вежби, на полигоните со сојузниците ја потврдивте вашата обученост и интероперабилност. Само до крајот на оваа година, над 400 армиски припадници ќе учествуваат на НАТО-вежбите каде што ќе ги развиваат, докажуваат и усогласуваат своите способности со оние на сојузниците.Но, за мене, најважно од сè е дека, и покрај вашето активно меѓународно присуство, вие сте тука, дома, секогаш и секаде каде што е најпотребно.Почитувани граѓани,Ценети присутни,Додека денес го прославуваме овој голем и важен празник, дел од припадниците на Армијата се борат со огнените стихии ширум државата. Во овој момент им помагаат на противпожарните екипи во гаснењето на пожарите, заштитата на граѓаните и добрата. Би сакала како претседателка на сите граѓани-волонтери, исто така, да им изразам неизмерна благодарност за помошта во овие огнени денови.Повторувам, години наназад, Армијата редовно се ангажираше во поддршката на институциите во справувањето со елементарните непогоди и со кризните состојби. Секогаш тоа го правеше професионално и пожртвувано. Затоа Армијата, затоа вие, континуирано уживате највисока доверба кај македонските граѓани.Но, должна сум да потсетам дека, во битката со пожарите не сме сами, туку ја имаме помошта од пријателските држави, особено од регионот. Не попусто рекле дека во маката се познаваат пријателите. Да им се заблагодариме за солидарноста сега, кога ни е најтешко. Нивната помош нема да ја заборавиме. Како во минатото, така и во иднина и ние ќе продолжиме да им помагаме на нашите соседи и пријатели кога за тоа ќе има потреба.Но, освен неброените хектари шуми, ниви и пасишта, во овие пожари се изострува прашањето за функционалноста на системот за превенирање на пожарите и справување со нив. Како и досега, така и во иднина, Армијата ќе биде подготвена да им даде целосна поддршка на граѓаните и на надлежните институции. Но, време е да се преиспита системот за заштита и спасување и за управување со кризи, да се детектираат и коригираат институционалните и професионалните недоследности, како и да се креира логичен, ефикасен систем на справување со кризи. Мора да направиме сè што е потребно за да го заштитиме општото добро и јавниот интерес навреме, да посегнеме по превенција, наместо по справување со последиците. Сигурна сум дека тоа ќе биде направено.Ова е особено важно имајќи ги предвид климатските проекции за иднината. Сушите, пожарите и поплавите ќе бидат сѐ почести и сѐ поинтензивни, оти, за жал, ние луѓето влеговме во однапред изгубена војна со природата. Како мултипликатор на безбедносните ризици и закани, климатските промени предизвикуваат домино-ефект, од елементарни непогоди, преку климатски миграции, до трка за ресурси.Затоа, мора да изградиме рационална и инкременталистичка политика што ќе резултира со функционален систем, способен навреме и соодветно да се адаптира кон промените, да ги превенира ризиците, да управува со процесите и да ги ублажува последиците. Така, ќе обезбедиме одржлив развој и сигурна сегашност и иднина за македонските граѓани и за македонската држава.Почитувани присутни,Денеска, пред нас, пред вас се изврши примопредавање на должноста началник на Генералштабот на Армијата.Од срце, и со разум, му благодарам на досегашниот началник, генерал-потполковник Васко Ѓурчиновски за успешното лидерство во изминатите години. Нему му припадна задачата да биде началник на Генералштабот во клучен период, кога македонската држава се соочи со бројни ризици, но и успеси како формалното членство во НАТО. Тој активно учествуваше во трансформацијата и модернизацијата на Армијата и успеа да ја продлабочи соработката со нашите сојузници. Јас и понатаму му нудам соработка. Благодарна сум му за стореното и очекувам понатамошни советнички успеси.Воедно, му честитам на новиот началник на Генералштабот, генерал-мајор Сашко Лафчиски за неговото именување. Пред него, пред вас, се големи задачи и предизвици. Тој, Вие, ќе треба да учествува во одржувањето и во унапредувањето на борбената кондиција, да продолжи со реформите, да ја зајакне меѓународната соработка и да вложува во воените и цивилните припадници на Армијата. Нему му ја доверувам задачата да ја сочува вистинската доверба којашто Армијата ја ужива како меѓу македонските граѓани и кај нашите сојузници и партнери.Сведоци сме на смена на генерации коишто се поврзани и обврзани со иста заклетва, заедно со вас, припадниците и припадничките на Армијата, да ја браните слободата, сувереноста, самостојноста и територијалниот интегритет на единствената татковина што ја имаме.Тоа ме прави горда на вас. Тоа ги прави вашите семејства, вашите пријатели, но и сите наши сограѓани, горди на вас. Наша должност е да ви помогнеме достоинствено да ја извршувате оваа задача.Мора да продолжиме да се залагаме за родова еднаквост и за кариерен напредок во сите области и во Армијата. Конечно, мора да вложуваме во образованието и во обуката на сегашните и на идните воени лидери на македонската армија, но и во нивниот социјален статус.Почитувани припадници на Армијата,Честитајќи ви го празникот, ви посакувам многу успех во извршувањето на вашата одговорна и благородна задача.

Македонија | пред 1 година

Претседателката ниту формира, ниту може да свика Совет за безбедност

„Републиката ни е во пламен. Да се молиме да падне дожд”, констатираше претседателката Гордана Сиљановска Давкова на Илинден.Премиерот Христијан Мицкоски на прес-конференција рече дека од повеќе канали добил информации оти раководството на ДУИ во обид да го заштити капиталот што го создавале изминатите двасетина години, ќе преземало чекори за дестабилизација на државата.Гордана Сиљановска-Давкова најави дека нема да го свикува Советот за безбедност.А и да сака, кого ќе свика да ги разгледуваат овие две сериозни и опасни теми, кога по три месеци од нејзината инаугурација, таа не го конституирала Советот за безбедност.Инаку Советот за безбедност е највисокото советодавно тело во Република Македонија, коешто ги разгледува прашањата сврзани со безбедноста и одбраната на Републиката и дава предлози на Собранието и на Владата.

Македонија | пред 1 година

Македонија гори, а ни глас од Црвенковски и Иванов

Дали некој деновиве ги чу или виде поранешните претседатели Бранко Црвенковски и Ѓорге Иванов? Луѓето секој месец на први, си ги користат привилегиите, околу 2.000 евра и плус оние зголемени 78 проценти.Плус согласно постојниот закон, покрај месечните закупнини за канцелариски простор, за поранешниот претседател се подмируваат и следните трошоци: плати за три стручни лица кои се обезбедуваат од буџетот; комунални трошоци за надомест на електрична енергија, вода, топлинска енергија, и ѓубретарина; службено возило и возач, одржување на возилото при СОЗР; услуги кои се однесуваат на одржување на хигиена, тековно одржување на објектот како и набавка на потребниот канцелариски материјал.За поранешниот претседател не важат условите за пензионирање предвидени со Законот за пензиско и инвалидско осигурување. Тоа е тешка повреда на уставното начело за еднаквост на граѓаните пред законот“, велат од експерти по право.Единствено привилегиите, како што најави не ги користи Стево Пендаровски кој се врати на факултет а имаше и објава за Илинден. За пожарите поранешните татковци на нацијата не се нешто заинтересирани, но за привилегиите тука се. Но, да ги оставиме луѓето на мира и да не ги нервираме. Нека уживаат на грбот на народот.Активна беше претседателката Силјановска Давкова, која двапати беше на терен и со војниците како врхвено командант, а вчера порача дека ќе се моли да падне дожд.

Македонија | пред 1 година

Сиљановска Давкова: Мора да ги вложиме сите наши лични и институционални капацитети за да го спречиме иселувањето

Претседателката Гордана Сиљановска Давкова, по повод 2 Август, Илинден - Денот на Републиката, ја упати следната честитка:Ви го честитам најголемиот македонски празник – 2 Август – Илинден. На овој празник на светлината се потсетуваме на борбата за слободна македонска република што ја започнаа Илинденците а ја продолжија учесниците во народноослободителната и антифашистичка војна. На 2 август 1944-та, пред точно 80 години, делегатите на АСНОМ ја воспоставија македонската држава како република на национална слобода и социјална правда, на рамноправни граѓани, „не гледајќи на нивната народност, пол, раса и вероисповедание“.Право и должност на секоја генерација е да ја продолжи борбата и да го обновува духот на македонската република, усогласувајќи го со новите околности и новите можности.Борбата на нашата генерација е, чувајќи го наследството на илинденците и асномците, да ја направиме нашата македонска република пристојно место за живеење, што ќе им дава еднакви шанси за напредок на сите нејзини граѓани, република што ќе биде грижлива кон најдобрите, инклузивна кон различните, солидарна кон ранливите и праведна кон сите. Мора да ги вложиме сите наши лични и институционални капацитети за да го спречиме иселувањето и да создаваме иднина за младите, тука, во нашата заедничка македонска татковина. Таа борба ќе ја добиеме со европеизација на државата, со владеење на правото и искоренување на корупцијата, со компетитивна економија и грижа за животната средина, со сплотување околу општото добро и јавниот интерес.Драги сограѓани,Додека го одбележуваме Илинден, храбрите пожарникари, војници и волонтери со натчовечки сили се борат против огнените стихии за да ги спасат нашите шуми, и животите и имотите на нашите граѓани. Да им помогнеме и да ги поддржиме, и со тоа активно да учествуваме во борбата за доброто на граѓаните и иднината на републиката.Нека ни е за многу години Илинден!Да ни е вековита македонската република!

Македонија | пред 1 година

Армијата во координација со ЦУК и со помош од пријателски земји ја продолжува борбата со огнената стихија во неготинско

По денешната посета на зоната на пожари во неготинско и средба со припадниците на Армијата во близина на воениот полигон Пепелиште, попладнево Генералштабот на Армијата ја информираше претседателката Гордана Сиљановска Давкова дека продолжува борбата со огнената стихија во која припадници на Армијата во координација со сите инволвирани државни субјекти се ангажираат на неколку локации, пред се на планината Серта, а екипа попладнево е упатена кон Радовиш, како и екипа во реонот на с. Драгоево и с. Штркалево кон Криволак.Армијата во досегашниот период дејствува со 100 припадници од вториот пешадиски баталјон и со два армиски хеликоптери МИ-8/17 кои се ангажираат на локации по насоки на Центарот за управување со кризи.Притоа во првиот ден од активностите на армијата се исфрлени 44 тони вода, вчера 17 лета со 34 тони вода и денес до овој момент 28 лета и исфрлени 52 тони вода. Македонските сили во овој реон дејствуваат со помош од воздухопловите на Турција, Србија и Црна Гора.Припадниците на АРМ остануваат на терен каде во соработка со владините институции ќе продолжат да се борат против заканата за животите на граѓаните и јавното добро.При ангажирањето кое припадниците на Армијата го извршуваат крајно професионално, храбро и пожртвувано се почитуваат сите процедури и мерки за безбедност и лична заштита кои се пропишани согласно противпожарната обука која сите припадници ја поминуваат како дел од редовната обука.

Македонија | пред 1 година

Нема фотографија

Сиљановска Давкова на Самитот за мир: Компромисите со меѓународното право и принципи можат да го компромитираат европскиот и светскиот мир

Претседателката Гордана Сиљановска Давкова денеска се обрати на пленарната сесија на Самитот за мир во Украина, што викендов се одржува во Бургеншток на езерото Луцерн во Швајцарија.Во обраќањето претседателката оцени дека тековната војна во Украина нè засега сите нас, земјата е изложена на огромно човечко страдање и уништување, безбедносната архитектура на Европа е под закана, а на глобално ниво животите на милиони луѓе се засегнати од тешките економски последици.„На најсилен можен начин ја осудуваме неиспровоцираната и неоправдана агресивна војна на Русија и ја поддржуваме Украина на најдобар начин, дури и повеќе од она што го дозволуваат нашите ограничени капацитети, ресурси“, рече претседателката Сиљановска Давкова.Нашата држава, посочи претседателката, се приклучи кон Кримската платформа и целосно се усогласи со Заедничката надворешна и безбедносна политика на ЕУ, а Украина беше главен приоритет за време на македонското претседавање со ОБСЕ во 2023 година.На хуманитарен план, рече претседателката, се приклучивме на меѓународната коалиција за враќање на украинските деца и обезбедивме цивилна поддршка и итна помош за Украина и за украинските бегалци. Како поддршка на евроатлантските аспирации на Украина, посочи претседателката, испративме воена опрема преку Пакетот за сеопфатна помош на НАТО.„Како суверена нација, само Украина може да одлучи за својата иднина. Од Украина зависи кога и како ќе ја ангажира Русија за евентуално усогласено решение. Праведниот мир мора да биде вкоренет во принципите на Повелбата на ОН за суверенитет и територијален интегритет. Обидот на Русија да стекне територија со сила е флагрантно кршење на овие основни начела. Кога опасните преседани остануваат неоспорени, тие можат да се претворат во толерирани практики. Компромисите со меѓународното право и принципи можат да го компромитираат европскиот, па дури и светскиот мир и безбедноста. Единствениот начин да се избегне ова е да се почитува Повелбата на ОН и принципите на меѓународното право, без исклучок“, рече претседателката Сиљановска Давкова, истакнувајќи дека воздржувањето од употреба на сила, почитувањето на суверенитетот, територијалниот интегритет и неповредливоста на границите, и заштитата на човековите права и основните слободи, се цврсти принципи за кои не може да се преговара.Во обраќањето претседателката Сиљановска Давкова рече дека додека се развива рамката за иден мировен договор, ќе продолжиме да ја поддржуваме слободна, независна, демократска и суверена Украина.

Македонија | пред 1 година

Наш проблем е Украина! Тие веројатно ќе добијат почеток на преговори, посакувам и ние да станеме членка на ЕУ, порача Сиљановска

Соочени сме со насушна потреба од нов Маршалов план. Она што по Втората светска војна го направија САД за разурнатата Европа, сега Европа е во можност да го стори за Украина, земја која, исто како и ние, секогаш била дел од Европа, историски, културно, а сега веројатно ќе стане и политички.Ова денеска го изјави претседателката Гордана Сиљановска-Давкова по учеството на Конференцијата за обнова на Украина, што се одржува во Берлин, изразувајќи надеж дека, како што рече, македонската и украинската иднина ќе биде во Европската Унија.„Итната потреба од нов Маршалов план е очигледна. Исто како што САД и помогнаа на повоена Европа, Европа сега има капацитет да ја поддржи Украина. Нашата усогласеност со европската заедничка и безбедносна политика е јасна. Како членка на НАТО, ние не само Посветуваме два отсто од нашиот БДП за помош на Украина, но и нудиме политичка, воена и економска помош“, истакна претседателот Силјановска Давкова.Претседателката рече дека ја тревожи ноторниот факт дека европска заедница настанала како мировен проект во 50-тите години на минатиот век. Посакува и ние да ставиме крај на, како што рече, оваа сага од 23 години и да ги почнеме преговорите со Европската Унија.„Конференцијата е продолжение на серијата годишни настани на високо ниво посветени на брзо закрепнување и долготрајна реконструкција на Украина, по почетокот на руската воена агресија“, рече таа.Силјановска Давкова ги призна ограничувањата на Македонија во обезбедувањето значителна економска помош во споредба со поголемите земји, но го истакна нејзиниот потенцијален придонес во други области. Тргнувајќи од сопственото искуство на Македонија по распадот на поранешна Југославија, таа ги истакна вредните лекции и помош што земјата може да и ги понуди на Украина во нејзините напори за обнова. И покрај економските ограничувања, Силјановска Давкова изрази решеност да продолжи да ја поддржува Украина во различни капацитети.„Неподелено беше мислењето дека е потребна емпатија и разборање во моментот. Треба да се подготви обновата на Украина, дури и кога сѐ уште трае војната. Ние и досега покажавме дека сме на линија на европската надворешна и безбедносна политика. Не само што ѝ помагаме на Украина, како членка на НАТО, со издвојување од 2 отсто од бруто-општествениот производ на НАТО, влегуваме во 18-те држави со највисоки издвојувања, туку и како што можеме политички, воено, па и економски ѝ помагаме на Украина“, рече таа.Обраќајќи им се на присутните на конференцијата, претседателката Силјановска Давкова ја подвлече потребата од справување со предизвиците како што се корупцијата и прашањата за управување, кои често ги придружуваат постконфликтните сценарија.Вознемирувачка реалност е отстапувањето од основната цел на Европската заедница како мировен проект. Првично замислен да го поттикне вечниот мир на Кант, сега се бориме со суровата реалност на конфликтот. Останувам со надеж дека по војната Европа решително ќе се изјасни „никогаш повеќе“, рече Силјановска Давкова.

Македонија | пред 1 година

Сиљановска ќе го потпише законот кој се гласаше ноќеска во Собранието

Претседателката Гордана Сиљановска Давкова е должна да го потпише указот на Законот за организација и работа на органите на државната управа бидејќи станува збор за системски закон кој се носи со двотретинско мнозинство.-Кабинетот на Претседателката укажува дека Законот за организација и работа на органите на државната управа е системски закон, односно се носи со двотретинско мнозинство, па согласно член 75 од Уставот, Претседателот нема право на вето на истиот, односно е должен да го потпише указот, соопштија денеска од кабинетот на Сиљановска Давкова.Се очекува во најскор можен рок да биде потпишан, и да се формира новата влада.Веќе почнаа да се појавуваат првите имиња за министри за заменици министри во јавноста. Се очекува идната недела да бидат назначени новите министри во 20-те министерства.Како што е познато, бројот на министерства од 16, со новиот закон се зголеми на 20, а ќе има 24 министри, односно четири ќе бидат без ресор.

Македонија | пред 1 година

Претседателката Сиљановска Давкова ги врачи наградите за најуспешните на годинашното издание на „Охрид трчаТ“

Претседателката Гордана Сиљановска Давкова денеска, во Охрид, ги врачи наградите за најдобро пласираните учесници на осмото издание на атлетскиот викенд „Охрид трчаТ“.Милјана Ристиќ од Македонија во женска и Дарио Ивановски од Македонија во машка конкуренција, се првопласирани на главната трка на 21 километар, а Мирослав Спасов од Бугарија го освои првото место на трката на 5 километри.Претседателката изрази задоволство од високиот потенцијал и посветеност на годинашните натпреварувачи, кои што несомнено ќе придонесат за нивните идни значајни маратонски подвизи. Особена благодарност упати и до организаторите на годинашниот Охрид трчаТ“, за успешно реализираниот атлетски викенд, со рекордни 2200 учесници од 31 земја.

Македонија | пред 1 година

Сиљановска Давкова во Рим на средба со македонската дијаспора

Претседателката Гордана Сиљановска Давкова за време на посетата на Италијанската Република и Светиот Престол, по повод манифестацијата „Македонија во чест на Св. Кирил“, во Рим, оствари средба со претставници на македонската дијаспора и на италијанско-македонската стопанска комора.Сиљановска Давкова беше зспозната со нивните активности и вклученоста на дијаспората во сите процеси во Италија.Во разговорот со Мунир Шемси, бизнисмен и претседател на АПИ НОРДЕС, претседателката беше информирана за заложбите на Комората, за неговиот личен и професионален развој, како и за над тридеценискиот хуман активизам насочен кон социјално ранливи семејства во неговиот роден крај.Претседателката Сиљановска Давкова изрази благодарност за исклучителниот придонес на македонските иселеници во континуираното унапредување и продлабочување на соработката меѓу македонската и Италијанската република. Таа ја нагласи важноста од одржувањето на врските со дијаспората, што како нераскинлив дел од македонското ткиво доследно ги негува културата и традицијата, афирмирајќи ја нивната матична држава во странство.

Свет | пред 1 година

Првите кадровски решенија на Сиљановска: кои се новите лица на челни функции

Претседателката Гордана Сиљановска Давкова ги има првите кадровски решенија за во Вила Водно. Досегашниот генерален секретар Миле Бошњаковски и неговите заменици Билјана Радева и Тоше Зафиров се разрешени од функциите. Од Кабинетот на претседателката Сиљановска за „Скопје1“ велат дека нов генерален секретар е Ѓорги Божинов, а заменик Горан Момироски. Божинов, според неговата биографија е правник кој работел на повеќе позиции во Министерството за земјоделие пред да отиде во Вила Водно.„Генералниот секретар Ѓорги Божинов е дипломиран правник со речиси тридецениско работно искуство во областа на правото во земјоделскиот сектор, законодавната и институционалната рамка, процесите на јавни набавки, корпоративно советување, програмите за финансиска поддршка, државна помош, како и примена и хармонизација на легислативата на Европската Унија во овие области. Претходно, Божинов својата кариера во областа на правото ја остварува на раководни административни позиции во Министерството за земјоделство, шумарство и водостопанство“, велат од Кабинетот за „Скопје1“.Момироски, е познат за јавноста. Тој долги години е дел од медиумскиот свет.„Заменик генералниот секретар Горан Момироски е дипломиран новинар со долгогодишно работно искуство во повеќе медиуми во земјава, меѓу кои МТВ, А1 ТВ, ТВ Канал 5, МИА, Телевизија Алфа, а соработувал со голем број меѓународни организации и медиуми во регионот. Во текот на бегалската криза во 1999 година и на воениот конфликт во 2001 година Момироски бил шеф на одделот за комуникација при Високиот комесаријат за бегалци на Обединетите Нации, а работел и како регионален координатор за комуникации на Меѓународниот комитет на Црвениот крст“, додаваат од Кабинетот на Сиљановска.Побаравме детали и за други кадровски решенија како што се шеф на протокол, аѓутант, нови лица во Секторот за односи со јавност.„Во однос на други кадровски решенија, јавноста ќе биде навремено известена“, додаваат од кај Сиљановска.

Македонија | пред 1 година

И Европската унија на нозе оти Силјановска не кажа „северна“ - стигнаа првите предупредувања

Продолжуваат реакциите од Европската Унија за денешната заклетва на новата претседателка Гордана Силјановска-Давкова. Брисел директно бара Скопје да го почитува Договорот од Преспа со Грција.Во соопштението, Службата за надворешни работи на ЕУ (ЕЕАС) нагласува дека „ЕУ жали поради фактот што новата претседателка на Северна Македонија, Гордана Силјановска, не го употреби уставното име на земјата за време на денешната церемонија полагање заклетва“.„ЕУ потсетува на важноста од целосно почитување на постоечките, правно обврзувачки договори, вклучувајќи го и договорот од Преспа со Грција“, се заклучува во соопштението.Претходно со соодветна реакција имаше и претседателот на Комисијата. Во својата објава на Платформа Х, Урсула фон дер Лајен нагласи дека „со цел Северна Македонија да го продолжи својот успешен пат кон членство во ЕУ, од најголема важност е земјата да продолжи со реформскиот курс и целосно да ги почитува своите обврзувачки договори, вклучително и Договорот од Преспа“.

Македонија | пред 1 година

Собранискиот претседател да ја презеде функцијата шеф на државата, оти Силјановска не кажа „северна“, вели Лога

Министерот за правда во заминување, Кренар Лога, смета дека тоа што новата претседателка Гордана Силјановска-Давкова, не кажала „северна“ при повторување на заклетвата туку се дала свечена изјава со Македонија, значи дека таа не е инагурирана за претседател.„Непочитувањето на уставното име на државата ја прави ништовна заклетвата на Силјановска.Или повторување на постапката или функцијата претседател на државата треба да ја преземе Јован Митревски (претседател на собрание), како В.Д.“, вели Лога.Остра реакција имаше и од ДУИ.

Македонија | пред 1 година

(Видео) : Пендаровски заминува, Силјановска влегува во Вила Водно

Во Кабинетот на претседателот, се одржа официјална церемонија на примопредавање на функцијата Претседател со највисоки државни и воени почести.По свечената церемонија новоизбраната претседателка Гордана Силјановска Давкова и претседателот Стево Пендаровски остварија тет-а-тет средба.

Македонија | пред 1 година

(Видео) Ако јас можам да бидам претседателка, можете и вие, им се обрати Силјановска на жените и кажа дека само Мицкоски верувал во нејзина победа

Претседателот на Македонија, Гордана Силјановска-Давкова кажа дека таа не верувала во победа на изборите, а единствен кој ја убедувал и верувал дека тоа ќе биде така, бил лидерот на ВМРО-ДПМНЕ, Христијан Мицкоски. Му се заблагодари преку својот говор во Собранието.„Ќе го почитувам овој Парламент, ќе ги заборавам лошите моменти, ќе ги паметам само добрите. Ќе бидам претседателка и на левата и на десната страна. Ќе бидам претседателка на сите граѓани, нема да правам разлика меѓу нив. Ќе се обидам да ги оправдам овие илјадници гласови, кои се најголемата обврска која сум ја имала во животот. Ќе сторам се за да ја оправдам. Време е за единство“, рече Силјановска-Давкова.Кажа дека првите честитки ги добила од жени-политичарки од сите континетнти и сите области.„Зошто сакам овој говор да го посветам на жените.. Во ова Собрание јас законите ќе ги читам и ќе укажувам дека не мора да дојде до вето, дека може да направиме преку обраќањето некои корекции. Кога ќе именувам, или кога ќе предлагам членови на Судски совет, Уставен суд, ќе тргнувам од стручноста и компетентноста. За жал жените ги нема во политиката, затоа сум среќна што ќе инспирирам други жени. Ако јас можам да бидам претседателка, можете и вие! Запомнете“, додаде Силјановска-Давкова.Посочи дека силните жени можат да ги решаваат проблемите, меѓу државите, нациите.„Оваа држава ја немаме само благодарение на комитите, туку и поради комитките, оваа земја ја немаме само поради партизаните, туку и поради партизанките“, додаде Силјановска-Давкова.Додаде дека зад успешни жени стојат мажи, како што е нејзиниот сопруг.„Јас, Мицкоски пред 2019 година само еднаш го видов на телевизиските екрани. Довербата е многу важна, јас ќе ја оправдам - не поради долг кон политика или партија, туку бидејќи добив шанса да бидам опкружена со многу жени“, додаде Силјановска-Давкова.

Македонија | пред 1 година