РУБИН ЗЕМОН

Манасиевски: Филипче преку Рубин Земон во директна соработка со Виктор Стојанов, кој е персона нон грата во Македонија поради неговите антимакедонски ставови

Портпаролот на ВМРО-ДПМНЕ, Валентин Манасиевски, денеска обвини дека лидерот на СДСМ, Венко Филипче, соработува со Виктор Стојанов, кој, како што рече, има антимакедонски ставови и е персона нон грата во Македонија.„Специјалниот пратеник на Румен Радев, Венко Филипче, преку Рубин Земон, е во директна соработка со Виктор Стојанов“, изјави Манасиевски.Тој посочи дека Стојанов се залага за промоција на бугарскиот идентитет, историја и култура во Македонија, како и дека во јавноста го негира македонскиот јазик и националната посебност.„Филипче е соработник со човек кој ја негира Македонија, односно вели дека сме еден народ со Бугарите во две држави“, рече Манасиевски.Од ВМРО-ДПМНЕ тврдат и дека Филипче е „директен соработник на Бугарија во Македонија“, како и дека е единствениот политичар кој бара внесување на Бугарите во Уставот без гаранции дека тоа ќе биде последниот услов на патот кон Европската Унија.„Венко Филипче со ваквиот однос кон Македонија си ја запечатува својата политичка кариера“, изјави Манасиевски.

Македонија | пред 2 седмици

„Мислам дека не треба да живееш тука“: Жестока преписка меѓу Галетановски и Земон по фотографијата со Стојанов

Фотографијата на Рубин Земон со претставници на т.н. „Фондација Македонија“, поврзана со бугарскиот активист Виктор Стојанов, предизвика жестоки реакции и преписка на социјалните мрежи меѓу членови и поранешни функционери на СДСМ.Ѓорѓи Галетановски, поранешен функционер на СДСМ и актуелен член на партијата, во коментар упати остра порака до Земон.„Брат овој треба да се исели не заебавај“, напишал Галетановски.На тоа одговорил Рубин Земон, кој наведе дека неколкупати во текот на денот добивал слични пораки и дека веќе поднел оставка за да не биде товар на партијата.„Неколку пати денес пишуваш вакви пораки, повикувајќи на мој ‘линч’. Мислам дека ја претера и дека не ти доликува на поранешен функционер на СДСМ. Јас ништо не сум згрешил, а оставка поднесов за да не сум на терет на партијата, со овој хипер-спин што е направен“, напишал Земон.Во продолжение, Галетановски му одговорил дека не повикува на линч, но дека смета оти Земон не заслужува да се нарекува Македонец.„Каков хипер спин, се сликаш со persona non grata човек што нè понижи сите како нација. Не, не повикувам на линч ниту те знам ниту познавам, ама ти не заслужуваш да си Македонец и мое мислење е дека не треба да живееш тука“, напишал Галетановски.Во друга објава, Земон тврди дека фотографијата била направена во трговски центар во Софија, на јавно место и среде бел ден.„Во сликата што се објави кратко вчера (15 мин) и нашите ‘курирци’ одма направија скриншотови и вест, е и мојот син... Сликана е во мол во Софија на јавно место сред бел ден. Ако ти тука гледаш ‘завера против Македонија’, не знам што да кажам“, напишал Земон.Преписката следува по објавувањето на фотографијата на Земон со претставници на т.н. „Фондација Македонија“, организација поврзана со Виктор Стојанов, против кого во Македонија е поднесена кривична пријава за ширење расистички и ксенофобичен материјал по пат на компјутерски систем.Стојанов со години предизвикува реакции во Македонија поради ставови и активности со кои го негира македонскиот идентитет и промовира тези дека Македонците се дел од бугарскиот народ.

Македонија | пред 2 седмици

Стојаноска го нападна СДСМ: „Во партијата се ревидира македонската историја“

Пратеничката Дафина Стојаноска преку објава на социјалните мрежи упати серија остри критики кон СДСМ и актуелното партиско раководство, осврнувајќи се на односите со Бугарија, историските прашања и актуелните политички случувања.„Б'лгарската роза Филипче треба 5 пати да дава оставка во денот, според Земон.Нашиот став е ист, по однос на Бугарија. Проблемот сите го знаат, а тоа беше внесувањето билатерален спор во преговарачка рамка, во кој треба да се решаваат прашања од идентитетски карактер, што за 21 век е тешка небулоза. Да не заборавиме дека е потпишано и еднаш годишно да се поднесува извештај за сработеното меѓу историските комисии - дали е постигнат напредок или не. (во Протоколот)…Но, што е уште поголем проблем?!?Почнувајќи од Зоран Заев (неговите изјави за БГНЕС), бившиот Претседател Пендаровски, па октроираниот Премиер Ковачевски и завршувајќи со ново-стариот ваш член на ИО - Рубин Земон, а неофицијално (од разговори со ваши поддржувачи), доаѓам до заклучок дека внатре во СДСМ непрекинато во целиов изминат период се ревидира познатата наша македонска историографија и сте изедначени во таквото редефинирање со она што го говори Софија векови наназад. Со тоа правите уште едно отцепување од македонското ткиво на голем дел од членството на СДСМ и ваши поддржувачи, а го доведувате во сомнеж и нивниот македонски идентитет. Го проблематизирате македонскиот карактер на ВМРО во историјата, го тргнавте АСНОМ од преамбулата на Уставот (што значи и директно го испроблематизиравте и постоењето на АСНОМ ска Македонија), а на крајот - и со Преспанскиот договор ја "избрусивте" Македонија, го погазивте и Уставот од 1991 година, и покрај тоа што Референдумот од 2018-та беше неуспешен.И покрај сѐ, го направивте ова. Е ова беше РЕЖИМ!Доколку не се обезбедат гаранции дека нема да има нови уцени, секогаш гласно ќе повикувам тоа да не се случи, макар траело и 1000 години. Моето еднаш кажано НЕ е НЕ за навек, доколку нешто не се промени во третманот кон моите Македонци.Во меѓувреме, додека толку гласно урлате за Бугари во Устав, Љупчо Николовски доби кривична за проневера од 800 000 €, а „јавачкиот” обвинител од Зајас аминува криминал од 167 000 000 €.Ете, толку е саатот', вели Стојаноска.

Македонија | пред 3 седмици

Костадинов по оставката на Земон: „Кадровскиот рулет скапо чини, на СДСМ очајно му треба внатрешна консолидација“

По само неколку месеци, членот на Извршниот одбор на СДСМ, Рубин Земон, поднесе оставка од својата партиска функција. Оваа одлука доаѓа по низата жестоки реакции и критики во јавноста поврзани со неговите неодамнешни активности и изјави.Во врска со ова на социјалните мрежи се огласи поранешниот градоначалник на Струмица, Костадин Костадинов кој вели дека овие случувања се чист доказ колку скапо чини играњето кадровски рулет во политикатаи како што вели класично дежа ву на Струмица во предизборието на локалните избори.„На СДСМ очајно му треба внатрешна консолидација, а не ад хок комбинаторики.​Пс. Сакам да истакнам дека немам апсолутно никаква намера да ја навредам личноста или делувањето на мојот пријател Рубин Земон, ова е проблем на стратегијата и принципите а не на поединецот“, вели Костадинов.

Македонија | пред 3 седмици

Рубин Земон по острите критики поднесе оставка од Извршниот одбор на СДСМ

Кратко траеше партиската функција на Рубин Земон. По само неколку месеци, членот на Извршниот одбор на СДСМ, Рубин Земон, поднесе оставка од својата партиска функција. Оваа одлука доаѓа по низата жестоки реакции и критики во јавноста поврзани со неговите неодамнешни активности и изјави.„Сакајќи да го заштитам угледот на СДСМ од непринципиелните напади кон мене, а со тоа не бирајќи средства да го инволвираат и моето семејство, а со цел да не бидам терет на борбата на партијата кон уривањето на оваа власт, поднесувам оставка од местото член на ИО на СДСМ“, објави Земон на Фејсбук.Притисокот врз Земон беше особено изразен откако во јавноста одекна веста и беше објавена фотографија од Софија за неговата средба со бугарскиот државјанин Виктор Стојанов, претседател на таканаречената „Фондација Македонија“. Стојанов има забрана за влез во државата и кривична пријава за ширење говор на омраза кон македонската држава и македонскиот народ.Земон се правдаше дека случајно Стојанов седнал на масата на која бил тој со својот син, а дека разговарале за односите меѓу двете држави.Земон претходно беше остро критикуван за изјавата во која тврдеше дека „Гоце Делчев бил само мит што ништо не направил за Македонија и не напишал ништо“.По острите критики, Земон се извини, тврдејќи дека неговите зборови биле извадени од контекст и погрешно протолкувани. Земон нагласи дека немал никаква намера да го минимизира или навреди значењето на историскиот лик и делото на Делчев.

Македонија | пред 3 седмици

По навредливата изјава за Гоце Делчев, Рубин Земон на средба со Виктор Стојанов од Бугарија, осомничен за ширење омраза кон Македонија

Рубин Земон, член на Централниот одбор на СДСМ, се сретнал со бугарскиот државјанин Виктор Стојанов, претседател на т.н. „Фондација Македонија“, кој има доживотна забрана за влез во Македонија и против кого пред два месеци беше поднесена кривична пријава за ширење говор на омраза кон македонската држава.За средбата објави самата фондација на социјалните мрежи.„На неофицијална средба со Рубин Земон - дел од раководството на опозициската СДСМ и претставник на Египќаните во Република Северна Македонија. На режимот на Мицкоски ќе му се спротивстават мнозинството граѓани на државата, а ние од Европската Унија ќе им дадеме поддршка: во име на европската иднина на С. Македонија и децата таму“, стои во објавата на „Фондација Македонија“.Средбата предизвика реакции и поради претходните ставови и активности на Стојанов, но и поради изјавите на самиот Земон. Тој претходно во јавноста изјави:„Гоце Делчев ништо не напишал во животот, ниедна битка не извојувал никаде, а кај нас е мит направен“.По ова, Земон се извини и кажа дека бил погрешно разбран, по што седна на маса со Стојанов, кој забраната за влез во Македонија ја доби токму во време на СДСМ.Против Виктор Стојанов, кој е претседател на бугарската фондација „Македонија“, беше поднесена кривична пријава за ширење расистички и ксенофобичен материјал по пат на компјутерски систем, дело казниво по член 394-г од Кривичниот законик.Од Агенцијата за национална безбедност тогаш соопштија дека пријавата следува по обезбедени информации за „субверзивно-пропагандни активности насочени кон поттикнување етничка и национална омраза“.Според Обвинителството, Стојанов преку специјално креирана Фејсбук-страница споделувал содржини со кои поттикнувал национална и етничка омраза и дискриминација, а во истрагата бил одземен и пропаганден материјал наменет за дистрибуција во Македонија.Стојанов и претходно беше во фокусот на јавноста. Пред три години тој упати закани кон Македонците од Пустец, предупредувајќи дека доколку не се попишат како Бугари на пописот во Албанија, ќе им бидат одземени бугарските пасоши.

Македонија | пред 3 седмици

Земон се извини по изјавата за Гоце Делчев, вели дека бил погрешно разбран: Тие што ширеа говор на омраза ќе се соочат со законот

Поранешиот пратеник и лидер на ПОЕН, а сега член на ЦО на СДСМ, Рубин Земон, во поткаст на Коридор 8 изјави дека Гоце Делчев бил само мит кој ништо не направил за Македонија.По оваа изјава тој преку социјалните мрежи се извини појасни дека неговите зборови биле погрешно протолкувани. Земон нагласи дека немал намера да го намали значењето на Делчев, туку сакал да укаже на потребата од поголемо вреднување и на личности како Димитрија Чуповски и Крсте Мисирков во македонската колективна меморија.„Бидејќи гледам дека работата денес отиде во други димензии, сакам да објаснам дека во никој случај не сум помислил, ниту нешто сум направил за да ја намалувам вредноста, значењето и големината на великанот Гоце Делчев за македонската историја и неговата улога. Она за што говорев е повеќе за тоа што во нашата колективна меморија се запоставени Чупоски и Мисирков и дека и тие исто така треба да се на пиедесталот, особено за развојот на македонскиот идентитет. Тоа беше мојата дискусијата и тоа беше мојата поентата. Во никој случај не сум имал намера да се каже нешто против Гоце Делчев, којшто е на пиедесталот на македонската историја. Се извинувам на сите доколку нешто поинаку било разбрано или протолкувано.А тие што ширеа говор на омраза ќе се соочат со законот.П.с. Благодарам на сите што денес ми се јавуваа и ми даваа поддршка...“, напиша Земон.

Македонија | пред 1 месец

„Гоце Делчев е мит“ - рече Рубин Земон кој предизвика политичка бура – СДСМ се оградува, ВМРО-ДПМНЕ напаѓа

Изјава на членот на Извршниот одбор на СДСМ, Рубин Земон, за улогата на Гоце Делчев предизвика силни реакции во јавноста и меѓу политичките партии. Земон во подкаст изјави дека „Гоце Делчев е мит“ и дека, според него, за македонскиот идентитет поголем придонес имаат личности како Крсте Мисирков и Димитрија Чуповски. Тој додаде дека Делчев „ништо не напишал“ и „не извојувал ниту една битка“, нагласувајќи дека темата треба да се разгледува на „објективно научно ниво“.Пратеничката од СДСМ, Славјанка Петровска, јавно се огради од ваквите ставови, потенцирајќи дека Гоце Делчев претставува „жива морална и национална вертикала“ врз која се темели македонската државност.„Почитта кон Гоце Делчев не е прашање на дневна политика. Таа е прашање на достоинство, историска свест и одговорност“, напиша Петровска, додавајќи дека ваквите позиции не смеат да бидат доведени во прашање.Од СДСМ, преку изјава на Јон Фрчкоски, посочија дека Земон се извинил за својата изјава и нагласија дека за партијата Делчев е „великан вкоренет во сè што сме денес“.„Гоце Делчев е најголемата и најзначајната историска личност за Македонија. Основоположник на идејата на ова што сме денес. (0:10) Човек со кој што ни почнува химната, великан. Колку и да не ми се допадна контекстот кога јас ја слушнав таа изјава, верувам на она што Рубин го напиша вчера, човекот се извини за таа изјава, објасни дека е извадено од контекст и дека доколку и некој ја интерпретирал така, тоа не било неговата намера, сакал да... Практично акцентира и други македонски значајни имења од тој период. Жално е на кој начин јавноста му одговори, Рубин беше уведваден и вреген по основна национална припадност и слично, (1:19) и тоа е страшно Ние стоиме за тоа што го кажува, а тоа е дека се извини за изјавата и контекстот во која што ја дадена“, вели Фрчкоски.Реакција стигна и од ВМРО-ДПМНЕ, од каде оценија дека изјавата на Земон е доказ за, како што наведуваат, „вистинските позиции“ на раководството на СДСМ во однос на идентитетските прашања.

Македонија | пред 1 месец

Петровска со остра реакција кон Земон: Ако не се промениме, ќе исчезнеме, почитта кон Делчев не е прашање на дневна политика

На ставот на Рубин Земон, член на ИО на СДСМ, искажан во подкаст дека Гоце Делчев ништо не напишал во животот, ниту една битка не извојувал никаде, а направен е мит од него, реагираше пратеничката Славјанка Петровска на социјалните мрежи:„Гоце Делчев не е само историска личност од нашето минато, туку жива морална и национална вертикала врз која се темели македонската државотворна свест. Неговиот лик и неговото дело се длабоко вградени во колективната меморија на македонскиот народ, во нашата борба за слобода, правда и самобитност.СДСМ е партија што својата идеолошка и политичка традиција ја гради врз темелите на АСНОМ, антифашистичката борба и непоколебливата определба за заштита на македонскиот идентитет, јазик и историска посебност. Тие вредности не смеат да бидат предмет на компромис, ниту пак да бидат доведени во прашање со било какво дејствување од позиции во рамки на партиските органи.Верувам дека е време сите, со одговорност и зрелост, да се навратиме на суштината: кои се вредностите што ги застапуваме, кого претставуваме и каква политичка порака испраќаме кон граѓаните. Не е доволно само декларативно да се повикуваме на нашите историски корени, ако во пракса не покажуваме доследност кон нив.Како член на СДСМ и како почитувач на темелните вредности се оградувам од секоја помисла за доведување во прашање на значењето на Великанот и неговиот влог во слободата што ја живееме денес.Почитта кон Гоце Делчев не е прашање на дневна политика. Таа е прашање на достоинство, историска свест и одговорност кон генерациите што доаѓаат.Му се поклонувам на Великанот Гоце Делчев, кому му се поклонуваат државници од целиот свет.И повторно, загрижено ќе напишам: „Ако не се промениме, ќе исчезнеме”, напиша Петровска.

Коментари | пред 1 месец

(Видео) Рубин Земон: Гоце Делчев ништо не напишал во животот, ниедна битка не извојувал никаде, а кај нас е мит направен

Поранешниот пратеник и лидер на ПОЕН, а сега член на ЦО на СДСМ, Рубин Земон, во поткаст на Коридор 8 изјави дека Гоце Делчев бил само мит кој ништо не направил за Македонија.„Нема што ние да се расправаме за некои истории кои се случиле во минатото. Бугарскиот идентитет во Македонија мора да се либерализира и да им се даде на луѓето да се изјаснуваат без дискриминација. А за Гоце Делчев, кој станал мит, ако го спуштиме тоа на објективно научно ниво, за мене и за македонскиот идентитет многу позаслужни се Крсте Мисирков, Димитрија Чуповски, а не Гоце Делчев којшто ништо не напишал во животот. Ниедна битка не извојувал никаде, а кај нас е мит направен од Гоце Делчев“, вели Земон.

Настани | пред 1 месец