ТОП

Судијката Алексовска Стојановска засега не треба да стравува дека ќе ја гонат или разрешат поради случајот на Васил Јованов со дрогата

Судијката Даниела Алексовска Стојановска која му досудила воспитна мерка наместо затвор на возачот Васил Јованов во предметот со дрогата, засега не треба да стравува дека ќе ја гонат или разрешат. Ова е заклучокот од одговорите на републичкиот јавен обвинител Љупчо Коцевски и претседателот на Судски совет Александар Камбовски. Коцевски кажа дека немаат отворено предмет оти нема ниту сомневања дека судијката сторила кривично дело.„Во моментот немам сознанија дека е отворен предмет против судијката, затоа што во овој момент немаме никакви евентуални докази за некакви индиции, односно сомнение во однос на оваа судијка. Нема елементи и индиции за сторено кривично дело. Доколку има, Јавното обвинителство стои на располагање“, рече Коцевски.Претседателот на Судски совет Александар Камбовски, прашан конкретно за судијката Алексовска Стојановска и дала изрекла преблага казна во случајот со дрогата и Васил Јованов, тој истакна дека не е запознаен со случајот, кои биле доказите. Напомена рече дека ќе се разгледува секој случај каде има пропусти.„Сигурно дека ќе се разгледува, секаде каде што има пропуст ќе се санкционира. Сите се залагаме за владеење на правото. Не познавам никој што се согласува со вакви состојби да ни се случуваат“, вели Камбовски.Претседателката на Академијата за судии и обвинители, Ирина Трајкоска-Стрезоски, прашана дали оценува дека има можна одговорност кај судијката за случајот со Васил Јованов, претседателката на Академијата за судии и обвинители рече дека лично ја познава судијката (Алексовска Стојановска), која, како што рече, е една од подобрите во својата работа.„За одговорност на судијката сега не би требало да станува збор. Лично ја познавам судијката, навистина е професионална и една од подобрите во својата работа. Работи во согласност со законите, а сепак тоа е одлука на Судскиот совет“, изјави Трајкоска-Стрезоски.Судиите носат одлуки според слободно судиско уверување, а согласно доказите. Тие индивидуално можат да оценуваат олеснителни и отежителни околности. Па така, одговорност кај судијката нема да може се утврди во делот на висината на казната. Но, доколку судијката направила некакво прекршување на законите и била пристрасна при одлучувањето поради нејзини лични конекции со обвинетиот или родителите – тоа прашање може да го разгледува Судскиот совет кој ја именува.

Македонија | пред 1 година

Земјотрес почувствуван во Македонија, втор за три дена

Земјотрес со јачина од 3.2 степени според Рихтеровата скала е регистриран во Македонија. Според информациите од сервисот ЕМСЦ, земјотрес е регистриран на седум киломтери од Центар Жупа.Земјотресот бил на длабочина од 10 километри.Ова е втор земјотрес во изминативе три дена. Претходниот беше со јачина од 2.5 степени и на 10 километри источно од Скопје. 

Македонија | пред 1 година

„Проверете по цркви и манастири“, постои веројатност да е засолнет“ - не запира борбата Миле од Неготино да биде најден жив и здрав

Потрагата по Мики Тодоров од Неготино не донесе никакви резултати, а изминативе денови е најден само телефонот. Неговата сестра Марија Анастасовиќ верува дека ќе го најдат жив и здрав, засолнет на сигурно. Упати апел до сите кои можат да се приклучат во потрагата дека тргнувањето е од Градскиот парк во Неготино, во 08 часот. Во потрагата е вклучен и хеликоптер на МВР„За оние кои сакаат да земат учество, а не се во можност да дојдат на собирното место во Неготино, нека се обратат во текот на утрешниот ден на следните броеви 078-909-481, 075-691-727.  Доколку имате сознанија контактирајте нѐ на овие броеви“, стои во апелот.Од навивачката група „Винари Неготино“ напишаа дека голема е веројатноста Миле да е во некоја црква или манастир.„Затоа што постои голема веројатност (или барем се надеваме) дека нашиот член, другар, пријател Миле Тодоров може да е засолнат во некој манастир/црква, ве замолуваме доколку имате можност да исконтактирате или проверете по манастири и цркви (поголеми или помали) во вашиот крај. Ние сме веќе во акција и ги посетуваме манастирите низ државата колку што можеме, затоа што во Македонија ги има во голем број, би било од голема помош доколку можете да проверете по вашиот регион. Доколку стигнете до некаква информација, можете слободно да ги исконтактирате било кој од броевите 078-909-481 и 075-691-727 или полиција“, велат навивачите.

Македонија | пред 1 година

Клучни тврдења од судењето на Вања: Еден час била чекана да излезе, „Реното“ отишло во партијата по убиството, го возел Палчо

Со снимки за движењето на двете возила кои учествувале во злосторничкиот чин на грабнување и убивање на Вања Ѓорчевска, беа прзентирани во суд. Обвинителството покажа како „Циторенот“ се движи околу зградата на Вања еден час пред Вања да излезе на училиште. Откако девојчето е грабнато, според обвинителката, се гледа целото движење на „Цитроенот“ од Дебар Маало, преку Партизански одреди, па по булеварот „8-ми септември“, преку Момин Поток, до Визбегово. Во „Циторенот“ има три лица.Обвинителството посочи дека возилото „Рену кангу“  дента кога е грабната и убиена Вања, по грозоморниот чин, се враќа во партијата „Десна“, близу Железничката станица. Обвинителката презентирајќи ги снимките рече дека силуетата на Љупчо Палевски-Палчо е фатена на камера како го вози „Реното кангу“ од Чаир кон Бит Пазар по убиството на 14-годишната Вања Ѓорчевска на 27 ноември 2023 година. Потоа уште еднаш кај Веро Џамбо во близина на седиштето на партијата „Десна“, каде го паркираат „Реното“. На совозачкото место бил Велибор Манев во сив џемпер и со црна лента на него.Јовица Страшевски, адвокат на првообвинетиот Палевски, по рочиштето рече дека ликот на неговиот клиент не се гледа на ниту една снимка, а тоа, како што додаде, го констатирал и судијата Ивица Стефановски, кој го води судењето.„Ниту еднаш не покажаа снимка од местото на настанот, од пред заградата. Не може Основното јавно обвинителство на вака сериозен настан да не повика сведоци од возила кои се движеле пред и по автомобилите (‘ситроен’ и ‘рено кангу’ н.з.), да ги испраша дали забележале нешто сомнително во тој период или не. Толку е аматерски изведено ова досега што навистина во мојата кариера немам сретнато толку аматеризам од страна на Обвинителството“, рече Страшевски.Во два наврати досега, имаше обид за спас на Палевски. Првиот беше кога обвинетиот Влатко Кешишов изненадно достави писмо до судот во кое тврдеше дека Палевски нема никаква вмешаност во настанот, па потоа призна дека во затворското комбе со кое биле носени на судење бил принуден да го напише тоа. Вториот беше кога Палевски побара изземање на Обвинителството и обвинителката, па посочи дека истрагата намерно не проверила дали Боре Видевски поседува оружје и какво. Тој за цело време, не застанува во одбрана на другите членови на групата, туку се брани самиот себе.

Македонија | пред 1 година

Директорката на болницата „Козле“ им се закани на медиумите со тужби, ако и го споменат името

Вршителката на должност директорка на болницата „Козле“ со барање до медиумите да не ѝ го споменуваат името, презимето и професионалниот ангажман. Во спротивно, најавува постапка и преземање на законски мерки. Нејасно е зошто на документот има архивски печат од Клиниката, со оглед дека станува збор за приватна изјава, која нема поврзаност со нејзината работа во клиниката. Дополнително употребен е и печат од установата, што го отвора прашањето - дали ова претставува злоупотреба?На ова реагираа од Здружението на новинари во Македонија.„Вршителката на должност директорка на болницата „Козле“ со барање до медиумите да не ѝ го споменуваат името, презимето и професионалниот ангажман. Во спротивно, најавува постапка и преземање на законски мерки. Jавното соопштение на в.д. директорката на Универзитетската клиника за респираторни заболувања кај децата „Козле“ Д-р Каролина Симоновска со кое забранува да се споменува нејзиното име, претставува форма на јавeн притисок насочен кон медиумите. Ваквите објави се директна цензура врз новинарите и ја поткопуваат слободата на изразување и независноста на медиумите. Ги потсетуваме сите носители на јавни функции дека, доколку имаат забелешки за објавени медиумски содржини, секогаш може да побараат исправка или демант. Исто така, на располагање им се и телата за саморегулација на медиумите, кои ја оценуваат етичноста и професионалноста на медиумските содржини. Оваа форма на јавни известувања е неприфатлива бидејќи создава атмосфера на заплашување и недоверба, што е спротивно на демократските вредности и јавниот интерес“, велат од ЗНМ.Веќе подолг временски период, директорката е актуелна во медиумите како раководно лице на болницата од кое вработените имаат поплаки.

Македонија | пред 1 година

Нема договор за минимална плата

Денешниот состанок во Владата заврши без епилог за минимална плата, изјавија по средбата од Организацијата на работодавачитеНа средбата се официјализирал предлогот да има официјална потрошувачка кошница, која ќе биде формирана од синдикатите, Државниот завод за статистика, Организацијата на потрошувачи и Министерствата за економија и финансии.Претседателката на Организацијата на работодавачи, Владанка Трајкоска рече дека се говорело на неколку теми, меѓу кои беше отворена и таа за минималната плата, но останало само на дискусија, без ставови и заклучоци.„Сметаме дека официјална потрошувачка кошница ќе биде една официјална и институционална потрошувачка кошница која ќе ги дефинира сите точки и ќе ги земе предвид сите потрошувачки елементи кои се релевантни за една кошничка“, вели Трајкоска.Европската комисија инаку нема директива по однос на потрошувачката кошница, во секоја држава во регионот и во ЕУ има и синдикална и кошница која ја формираат институциите.„Тие се разликуваат драстично. Синдикалните се двапати поголеми од државните“, рече Трајкоска која очекува телото што ќе ја дефинира официјалната потрошувачка кошница да се формира на следната седница на Економско-социјалниот совет.Синдикатите бараат минималната плата од најмалку 450 евра, работодавачите би прифатиле ако Владата субвенционира дел од придонесите.

Македонија | пред 1 година

Возилото „Реното кангу“ излегува од партијата „Десна“ и се враќа таму по убивањето на Вања

Возилото „Рену кангу“ тргнува од партијата „Десна“ денот кога Вања е грабната, па се враќа таму, откако е убиена. До 9 часот и 30 минути Вања веќе била убиена и „цитроенот“ запален. Ова го покажаа видео снимките кои ги презентираше Обвинителството, а собрани од „Сејф сити“ и приватни објекти. Од снимките досега се виде дека „цитроенот“ бил сам пред зградата на Вања од каде е грабната, а „Рено кангото“ се придружува накде кај Визбегово. Возат едно позади друго, односно прво „Реното“, па после десетина секунди проаѓа и „Цитроенот“. Се враќа само „Реното“, бидејќи „Цитроенот“ е запален. Според истрагата на Обвинителството, „Рено кангуто“ го возел Љупчо Палевски-Палчо, а „цитроенот“ го возел Велибор Манев.„Од Бит пазар, продолжува кон Мавровка каде е забележано во 9:56 минути. ‘Реното кангу’ доаѓа од булевар Крсте Петков Мисирков за лентата за право, и продолжува по булеварот кон Веро Џамбо. Движењето на ‘Реното кангу’ пред МАНУ, во 9 часот и 58 минути по крајната лева лента се забележува регистарската ознака и џемперот кој го носи лицето на совозачкото место“, објаснуваше обвинителката која ја презентираше снимката.На ова челновите на партијата „Десна“ кои го следат судењето како јавност довикуваа: „Каде е тој џемпер?“.„Продолжува кон раскрсницата кај Веро Џамбо во 9:59 минути и врти лево и тука се забележува истите лица на возачко и совозачко место како и регистарските таблички. Во 10 часот ‘Реното кангу’ поминува пред Веро Џамбо и се исклучува и свртува во десно од булеварот ‘Кузман Јосифовски Питу’ кон седиштето на партијата ‘Десна’, од каде што возилото ‘Рено кангу’ истиот ден го започна движењето презентирано од видеата. По извршувањето на кривичните дела повторно се враќа на истото место од каде што тргна“, презентираше обвинитечката.Презентирана беше и снимка од движењето на обвинетиот Александар Ѓорчевски, татко на Вања Ѓорчевска.„’Мицубиши’ кој е сопственост на обвинетиот Александар Ѓорчевски, а движењето се однесува за ден 27.11.2023 година каде што во 9 часот и 14 минути се забележува кај мостот кај Александар Палас, во кое што може да се забележи регистарската ознака и се движи во правец на Момин поток. Истото возило се гледа и во 14 часот и 28 минути поминува на раскрсницата од Сарај кон Ѓорче Петров, на влез во Скопје“, презентираше обвинителката.Следува презентација на снимки за грабнувањето на Панче Жежовски и неговото убиство.

Македонија | пред 1 година

Потребна е итна посериозна акција за пронаоѓање на Миле, алармираат роднините

Семејството, роднините и пријателите на исчезнатиот неготинчанец Миле Тодоров се загрижени бидејќи 28-годишникот четврти ден го нема. Тамара Спасова, негова роднина прашува: „Каде сте полицијо? Министерство за внатрешни работи?“ па додава: „Зошто секогаш мора да се молиме,зошто мора да чекаме,зошто мора ние, народот да ве потсетуваме што треба да сторите?“.Спасова вели посочува и:„Се зборува за младо 28 годишно момче, веќе пет дена е исчезнат Миле Тодоров од Неготино без трага и глас, дали е изгубен,дали е заробен,дали е исплашен,дали е безпомошен,дали му е ладно, бидејки нам ни е многу студено без него. Ве замолувам потрагата да биде засилена од ваша страна бидејќи ние роднините, родителите,пријателите по цели денови и ноќи излезени во потрага низ местото каде е последно виден не можеме сами да направиме ништо. Ве молам помогнете да го пронајдеме Миле Тодоров, грижата на родителите и неговите блиски е преголема. Потребна е итна посериозна акција“.

Македонија | пред 1 година

Негователка од Велес доби условна осуда оти им давала на деца во градинка да пробаат електронска цигара

Постапувајќи по поднесено обвинение од Основното јавно обвинителство Велес, Основниот суд во Велес донесе првостепена пресуда против негователката во градинка – Злоупотреба на службената положба и овластување 353 став 5 во врска со став 1 од Кривичниот законик.Вработената е огласена за виновна бидејќи на децата им давала да пробаат електронска цигара и Судот и изрече условна осуда, како и споредна казна забрана за вршење професија дејност или должност во траење од 5 години по правосилноста на пресудата.Надлежниот јавен обвинител поднесе жалба на пресудата поради одлуката за кривичната санкција.

Македонија | пред 1 година

Снимки од моментот на грабнувањето на Вања се гледаат во судница: камери од хотел и фризерај го фатиле „Цитроенот“

Снимки од надзорните камери на хотелот кој се наоѓа на неколку чекори од домот каде живеење убиената Вања Ѓорчевска се презентираат во суд. Обвинителството ги презентираше во судот, а се гледа возилото „цитроен“ со кое Вања беше киднапирана од влезот на нејзината зграда.„Камерите се поставени пред хотелот ‘Сити парк’, на паркингот, што гледаат од левата страна на зградата односно кон Општина Центар. Во 6:37 минути се забележува возилото ‘цитроен; како поминува покрај ‘Сити парк’, и врти во десно. Вториот видео запис е камера која што гледа на паркингот до булевар кон Илинденска, друг агол, различна камера од истиот хотел, а на крајот на паркингот се наоѓа зградата од каде е грабнато детето. Вo 6:37 минути се гледа како возилото ‘цитроен’ свртува во десно, подзапира, и потоа продолжува со движење право по паркингот, кон зградата на оштетеното дете“, кажа обвинителката.Судот ги опомени обвинетиот Љупчо Палевски и адвокатите да не прават галама во судот и да не се смејат, додека се презентираат доказите.„И четвртата камера го покрива паркингот до булавар Илинден на која се гледа како ‘Цитроенот’ продолжува со своето движење упатувајќи се кон зградата од каде е грабнато детето. Во 6:38 минути застанува на паркингот кога практично веќе се наоѓа кај зградата од каде е грабната Вања“, рече обвинителката презентирајќи ја снимката.Потоа, беше презентирана снимка од надзорна камера поставена на фризерско студио. Станува збор за снимка која додека се трагало по Вања, нејзиниот татко Александар Ѓорчевски ја испратил на началникот од МВР, Дејан Димовски посочувајќи му дека нешто му е чудно поврзано со движењето на возилото.„Во 7 часот 29 минути на ден (27.11.2023) се гледа како поминува возилото ‘цитроен’. Ова е всушност е времето кога е извршено грабнувањето, ова е улицата Наум Наумовски Борче. Во само во една минута може да се забележи дека поминуваат околу 10-тина возила пред да помине ‘цитроенот’. Во само четири минути понапред, од она што го гледаше Oбвинителството, поминуваат 26 возила. Откако поминува ‘цитроенот’, во истата минута поминуваат возила на секои 30 секунди.Потоа беа презентирани снимки од две камери поставени на менувачница. Обвинителката посочи дека на нив се гледа како поминува возилото „циторен“ во 7:30 движејќи се кон булеварот „Партизански одреди“.И шест камери од „Сејф сити“ го следат движењето на „Цитроенот“, од Наум Наумовски Борче низ Партизански одреди кон Визбегово, веднаш по грабнувањето на Вања. Во возилото имало три лица.„На овој видео запис, 7 часот и 33 минути од булевар „Партизански одреди“ врти кон Рузвелтова и може да се забележи регистарската ознака на возилото кое што е возило од кривично предметниот настан одземено од оштетениот Панче Жежовски. Видео два: Исто на булевар ‘Партизански одреди’ во ‘Френклин Рузвелт’ само од друг агол се гледа како од десната лента се забележува како возилото ‘цитроен’ продолжува со своето движење. Во 7 часот и 36 минути, се гледа како пристигнува на булеварот кај Рузвелтова кон Илинденска (Зоолошка). Видео три: Раскрсница булевар ‘8-ми септември со Илинденска кај Мида, се забележува ‘цитроенот’, од десно 7:37 минути застанува на семафорите во третата десна лента, и се приклучува на булеварот кој води кон Момин поток. На возилото се забележува регистарската ознака, и се забележува дека има лице кое седи на совозачкото седиште и исто така на задното седиште има лице кое се движи лево десно, односно во возилото има три лица

Македонија | пред 1 година

(Видео) Не му успеа обидот на Палевски: обвинителката останува, судењата продолжуваат со прикажување снимки

Обвинетиот за грозоморните убиства на Вања и Панче, Љупчо Палевски-Палчо, не го доби побараното изземање на обвинителката Жаклина Крстевска- Јосифовска и Обвинителството во Скопје. Републичкиот обвинител Љупчо Коцевски го одбил. Со ова му пропадна обидот на Палевски кој можеше да донесе одолговлекување на постапката.Обвинителката Жаклина Крстевска- Јосифовска се појави на денешното судење кое ќе се одржи, а на кое треба да се презентираат нови снимки од дејствијата кои ги преземале Палевски и групата обвинети.Претходно, Палевски побара изземање на Обвинителството и обвинителката со тврдење дека фалсификувала документација од вештачење на телефон. Тој рече дека наделжната обвинителка Јосифовска иако ги знаела фактите, без да го вештачи телефонот на сведокот, го предложила за да каже лаги на суд. Тој ја обвини и дека намерно не проверила дали некој друг од обвинетите (Боре Видевски) поседувал оружје, кое го искористил за двојното убиство.Обвинителката кажа дека Палевски кажува неосновани наводи.„Доказите се приложени во списите од предметот и очигледно е дека со презентирањето на видео записите се доближуваме до делот кога јавноста ќе биде запознаена кои дејствија конкретно ги преземал обвинетиот Љупчо Палевски, кој цело време негира дека учествувал во предметните настани, изјави Крстевска-Јосифовска.

Македонија | пред 1 година

(Видео) Фатени кеси со фалсификувани евра - МВР со снимка од акцијата

На 02.01.2025 реализирана е меѓународна истрага координирана од страна на ЕУРОПОЛ, македонската и српската полиција, а под раководство на надлежните јавни обвинителства, при што сузбиена е организирана криминална група инволвирана во извршување на кривично дело фалсификување пари, која делувала на териториите на повеќе држави.Во периодот од крајот на 2023 година до февруари 2025 година на територијата на Република Северна Македонија и на Република Србија формирана е организирана криминална група, составена од македонски и српски државјани, која имала за цел изработка и пуштање во оптек на фалсификувани пари. Во стан на подрачје на Скопје, по претходно направени специјални машини со гравирани плочи кои имитирале сигурносни знаци на пари, биле изработувани лажни пари во различни апоени. Вака изработените лажни пари организираната криминална група ги пуштала во оптек во платниот промет на Република Северна Македонија и Република Србија, а голем дел од нив завршувале и во платниот промет на Австрија, Германија, Романија, Словенија, Хрватска и Косово.Во рамки на акцијата на територија на Република Северна Македонија, врз основа на претходно обезбедени наредби од Основен кривичен суд, извршени се претреси на повеќе локации на подрачје на Скопје, Велес и Прилеп кај правни и физички лица, при што лишени од слобода се 10 лица (девет лица од Скопје и едно лице од Велес). При извршените претреси пронајдени и одземени се предмети и парични средства кои ќе бидат предмет на вештачење и тоа: околу 500.000 евра, 25.000 американски долари, 500 швајцарски франци, 1.800 израелски шекели, 500 хрватски куни, 10.000 албански леки, 1.000 шведски круни и 25.000 рубљи, CNC машина за изработка на калапи, калапи, жигови и валјаци со кои се изработувале фалсификуваните пари, копии од делови од банкноти, три пиштоли, една пушка, 100 парчиња куршуми калибар 9 мм, 40 патрони калибар 12 мм, кесе исполнето со бела прашкаста материја, кафеава прашкаста материја, повеќе телефонски апарати, СИМ картички, УСБ и лаптопи.Во рамки на акцијата спроведена во Република Србија лишени од слобода се шест лица, членови на организираната криминална група, при што пронајдени и одземени се околу 153.700 евра.Активностите ќе продолжат и понатаму во рамки на отворената меѓународна истрага и во текот на денешниот ден од страна на Одделот за сузбивање на организиран и сериозен криминал ќе биде поднесена кривична пријава против шест македонски и двајца српски државјани.

Македонија | пред 1 година

(Видео) Шест лица од партијата на Палчо дојдоа со звучник пред судот, каде има судење за убиството на Вања и Панче

Шест лица па политичката партија Десна со која раководеше Љупчо Палевски-Палчо дојдоа пред рочиштето за убиството на Вања и Панче со звучник, за да кажат декс правосудниот систем е против нив, да го бранат обвинетиот за двојното убиство и да бараат да им ги отпечатат просториите каде според обвинителката престојувсле дел од сега обвинетите, сосе Палевски, но и од каде се одземани докази“ОЈО за некого е мајка за некого маќеа”, велат од ДЕСНА, партијата на Љупчо Палевски Палчо.Тие пред судот дојдоа со транспарент: “ ОЈО произведува монструми не политичката партија Десна”.

Македонија | пред 1 година

Посериозна реакција и зголемување на ресурсите за пронаоѓање на Миле бараат роднините, секој може да се придружи и на потрагата која ја прават пријателите

Семејството очајно бара помош за пронаоѓање на 28-годишниот Миле Тодоров по кого се трага четврти ден. Алармираат дека институциите треба да бидат поажурни, а и самите трагаат по момчето. Засега нема никакви нови детали, освен информацијата дека е пронајден телефонот.„Лицето Миле Тодоров веќе 4ти ден го нема излезен е на 30.1.2025 од дома и не е вратен, облечен е во работничко одело бело палто и црн елек последен пат виден кај село Марена ве молиме за помош веќе неколку дена. Полицијата, роднините и другарите на Миле трагаат но тоа не е доволно се покажа како не успешно. Исчезнување на млад човек не е занемарување мора да се сфати сериозно. Бараме посериозна реакција и зголеување на ресурсите“, пишува Ристо Недев во апелот.Тој објави дека собирното место за тие што сакаат да се приклучат во потрагата денес (понеделник) во 08:00 на Градски парк во Неготино.„За оние кој сакаат да земат учество а не се во можност да дојдат на собирното место во Неготино нека се обратат на следните броеви078/909-481, 075/691-727“, напиша тој.Претходно, беше објавено дека тој бил на работа, дал отказ, но бил смирен. Заминал и оттогаш му се губи секоја трага. Според семејството немал здравствени проблеми.

Македонија | пред 1 година

(Видео) „Прошка нема!“ - гнев и тага на собирот за Фросина

„Секој еден може да е следен“, „Убијци“, „Системски промени“, „Правда за Фросина“, „Бараме правда“. Ова се само дел од сканираните пароли на протестот во Скопје преку кој се бара одговорност од возачот Васил Јованов кој на пешачки ја усмрти Фросина Кулакова. „Прошка нема, правда мора да има, време е“, „Доживотен затвор“, „Корумпирани родители - деца убијци“, „Доживотен затвор“ – беа пораките од транспарентите.По собирот кај Универзална сала, граѓаните во тишина се упатија кон Собранието, каде што таткото на Фросина обрати и порака до јавноста.[caption id="attachment_321034" align="alignnone" width="2560"] Screenshot[/caption]„Ова што ни се случува најблизу може да се објасни како непомирлив судир меѓу два различни вредности, цивилизациски концепти. Се работи за систем и антисистем. Од една страна системот ни создава универзални вредности, правила, базирани врз цивилизациски коректни начела, каде што децата се учат во домовите, во школите, во црквите. И затоа некои од нив заради таквиот хуманистички пристап стануваат херои на нашето време. Дозволете ми, Фросина да ја сместам во тие херои на нашето време. Девојче за пример, врвен интелектуалец за своите години, врвен дизајнер. Светските врати и беа отворени, изминатите четири години, еднаш годишно одеше во Париз, сега ја усмртува баш кога си уплаќа за четвртиот пат да оди во Париз на модна ревија. Другите, оние кои се задоени со чемерот на антисистемот, претварајќи се во наркодилери, насилници, убијци, заедно со тешко потплатени судии, обвинители и други, кои што судии, обвинители, проценители, извршители направија балкански дуќани, друштва за наддавање како аукциски куќи, кој ќе плати повеќе мито, тој добива, а по правило без исклучок, криминалците и нивните адвокати добиваат“, рече Кулаков.[caption id="attachment_321037" align="alignnone" width="2560"] Screenshot[/caption]Во знак на почит кон Фросина, насобраните неколку минути молчеа, додека небото беше осветлено од блицевите на нивните телефони – симбол на надеж, но и на аларм кој треба да го разбуди општеството.

Македонија | пред 1 година

Детали за производството на фалсификувани евра во Македонија

Заеднички истражен тим од Македонија и Србија по повеќемесечна меѓународна соработка, спроведуваше координирани активности за разоткривање на криминална група што се занимавала со фалсификување и нудење на пазар на европска валута – евро во различни апоени. Координацијата и спроведувањето на активностите на македонската територија се под раководство на Основното јавно обвинителство за гонење на организиран криминал и корупција. Извршени се 23 наредби за претреси на лица и дом и притоа се обезбедени материјални докази.„При претресите се пронајдени и одземени парични средства во износ од околу 500 000 евра, 25 000 американски долари, 500 швајцарски франци, 1800 израелски шекели, 500 хрватски круни, 10 000 албански леки, 1000 шведски круни и 25 000 рубљи. Воедно се пронајдени топли ваљаци, преси, ЦНЦ машина за изработка на калапи и жигови со кои се изработувале фалсификуваните пари, копии од делови од банкноти, пиштол, куршуми, кесиња со прашкаста бела и кафеава материја, телефонски апарати, сим картички, УСБ, детектор за фалсификувани банкноти, холограми, бројачи на пари, други предмети за фалсификување пари и лаптопи кои ќе бидат предмет на вештачење. Воедно десет лица се лишени од слобода.Операцијата се надоврзува на претходната операција од август минатата година спроведена од ОЈО Скопје и косовското Специјално обвинителство, кога беа пронајдени и запленети машини за фалсификување на евромонети, готови и полуготови фалсификувани монети, калапи и материјали потребни за изработка на монетите, а во Косово беше уапсен македонски државјанин кој ги произведувал и пуштал во оптек.Денешната операција во целост е поддржана од ЕВРОПОЛ и од Проектот на ЕВРОПРАВДА за кривична правда на Западен Балкан, кои овозможија оперативна координација, критична разузнавачка анализа и техничка помош за реализација. Истовремено, во денешната акција во РСрбија се извршени претреси на повеќе локации во Нови Пазар, Нови Сад, Сомбор и Суботица и притоа се приведени шест членови од криминалната група, а запленети се 180 000 фалсификувани банкноти – евра.Со подетални информации јавноста ќе биде информирана во текот на утрешниот ден по донесување на Наредбата за спроведување на истражна постапка“, велат од Обвинителството за гонење организиран криминал и корупција.

Македонија | пред 1 година

Почина четиригодишно дете во струшката болница

Четиригодишно дете утрово починало на Детското одделение во Струшката болница, соопшти денеска СВР Охрид.Според информацијата, случајот во полиција бил пријавен во 9:50 часот од медицински лица од Општата болница во Струга.– Медицински лица од Општата болница во Струга е пријавено дека, на Детското одделение во болницата било донесено четиригодишно дете од Струга, кое извесно време било во тешка здравствена состојба. И покрај итно укажаната медицинска помош, починало, изјави портпаролот Стефан Димоски.Полицијата во координација со јавен обвинител, презема мерки за целосно расветлување на настанот.

Македонија | пред 1 година

Сестрата на Фросина: Бараме да се затвори таткото на убиецот и судијата Даниела Алексовска-Стојаноска

Росица Кулакова, сестра на Фросина, која беше усмртена од возачот Васил Јованов на пешачки премин, побара да се затворат таткото Зоран Јованов и судијката Даниела Алексовска-Стојаноска која во постапката за дрогата му одредила воспитна мерка, наместо затвор. Таа смета дека тие не можат да извршуваат државни функции.„Општеството е огледало на вредностите што ги носат оние кои го водат, а децата се начистиот одраз на своите родители. Не може да се очекува чесно и одговорно управување од луѓе кои не успеале да ги всадат основните морални и општествени вредности дури ни во сопствениот дом. Доделувањето на држвните фунцкии не смее да се сведе само на формални образовни критериуми, јавните функции мора да ги извршуваат луѓе со интегритет, кој својот карактер го покажале и во својот живот како граѓани, родители. Оној што не успеал да го воспита сопствениот наследник, да ги почитува законите, да разликува добро од зло и да живее чесно, не може да бара доверба да управува со државата. Ваквите лица не смеат да добијат јавна функција туку да одговараат за сопственото делување, но и за криминалните постапки на своите помлади полнолетници. Општеството не смее да биде заложник на луѓе без морални темели“, рече Росица Кулакова и додаде:„Ние за Фросина бараме правда не само од убиецот, бараме правда и од таткото, бараме да одговара таткото, да се затвори таткото, Зоран Јованов и судијката, Даниела Алексовска-Стојаноска, кои не излегоа јавно да изразат сочувство кон семејството, туку се кријат и бришат профили“.На крајот, посака никој да не го поминува ова што го минува таа и нејзиното семејство.

Македонија | пред 1 година

Во Македонија се правеле фалсификувани евра: голема акција во тек, дојдени се меѓународни истражни тимови

Акција за запленување на фалсификувани евра спроведува Обвинителството за гонење организиран криминал и корупција со полицијата, со меѓународен тим.„Во тек се дејствија на меѓународен заеднички истражен тим, кој на наша територија е координиран од Основното јавно обвинителство за гонење на организиран криминал и корупција. Во тек се повеќе полициски и други дејствија и во овој момент не можат да бидат споделени повеќе детали за да не се наруши постапката. Штом завршат оперативните дејствија, вклучените институции координирано ќе ја информираат јавноста“, велат од Обвинителството.Од МВР засега не споделуваат информации и најавија детали за подоцна.

Македонија | пред 1 година

Шекеринска шокирана: Немам никаква поврзаност, ниту сум интервенирала за возачот

Заменик-генералниот секретар на НАТО, Радмила Шекеринска регираше на обијавите каде нејзе ја посочуваат дека интервенирала за пуштање на возачот Васил Јованов кој ја усмрти Фросина Кулакова, кога Обвинителството го гонело за дрога.„Длабоко сочувство до семејството и блиските на Фросина Кулакова. Од почит кон нивната болка и загуба не сакав јавно да реагирам, но гледам дека некои нелуѓе и криминални структури продолжуваат да лажат и да ловат во матно дури и при вакви лични, семејни и општествени трагедии и на необјаснив начин да ме ставаат во контекст на сообраќајката во која е убиена Фросина Кулакова.Најдиректно сакам да ги демантирам СИТЕ такви наводи - тие се целосна, безобразна и исконструирана лага за која не постои НИКАКВА ОСНОВА.Одговорно тврдам дека со НИТУ ЕДНО од споменатите лица немам никаков контакт, познанство ниту пријателство: ниту со сторителот ниту со неговиот родител, а уште помалку со судијката што одлучувала за неговите предмети. Со ниту едно! Дополнително, сите што ме познаваат го знаат мојот став за овие прашања. Како и сите вие, и јас се плашам кога мои блиски ја поминуваат ,,Партизанска" (особено кај ,,Силбо"). Како многумина од вас, и јас сум реагирала на беснеењето на возачите што мислат дека правилата не важат за нив и дека нашите улици се писта за нивните комплекси и покажување ,,сила”. И никогаш, ама буквално НИКОГАШ не сум се јавила на НИКОЈ за да побарам ургенција за каква било сообраќајна грешка. НИКОГАШ! Некои пријатели ми замериле поради тоа (што не сум “им завршила работа”), но сум стоела зад мојот став, бидејќи искрено верувам дека неказнивоста води кон повторување на делата, а тоа значи само чекор до трагедија.НИКОГАШ за НИКОГО не сум се јавила за да побарам ваква ургенција и затоа бев шокирана кога видов дека некој почнал да шири вакви обвинувања за мене без НИКАКВА причина, ниту доказ. Неточни се, но и нелогични бидејќи во годината во која биле носени тие судски одлуки, јас не сум имала никаква функција ниту позиција на моќ од која би можела да вршам такво влијание.За жал, очигледно е дека некои структури можат да продуцираат и најнелогични и целосно исконструирани лаги - доволно им е да имаат интерес и наредбодавател.Токму поради трагедијата и потребата сите ИНВОЛВИРАНИ да одговараат - се надевам дека ширењето невистини и обвинувања без основа нема да бидат искористени за да се кријат ВИСТИНСКИТЕ сторители и соучесници“, вели Шекеринска.

Македонија | пред 1 година

(Видео) Возачи си направиле трка на Партизанска, на потег каде досега има и загинати пешаци

Автомобили и натаму се тркаат на булеварот „Партизански одреди“, сведочи снимката која ни ја испрати наш читател. Пред осум дена (на 25 јануари), два автомобили „проелтувале“ од семафор до семафор. Возеле со огромна брзина, тркајќи се, кој ќе биде побрз.Според сведочењето на читателот, автомобилите возеле вака од мостот „Влајко“ до Лептокарија. На овој потег, има најмалку пет пешачки премини. На два од овие пешачки премини, имаше и жртви – на пешачкиот кај ТЦ „Антико“ каде нема ниту семафори и пешачкиот кај „Сити мол“ каде загина младата Викторија Николова.Министерството за внатрешни работи најави дека нема да толерира девијантно однесување. Јавноста е згрозена по прегазувањето на 22-годишната Фросина Кулакова на пешачкиот кај Универзална сала и денеска повторно излегува на протест.

Македонија | пред 1 година

Возачот Васил кој ја усмрти Фросина телефонот го набавил од притвореник, платен е надвор од затворот, пренесен е во опаковка со колачи

Возачот Васил Јованов кој со возило ја усмрти Фросина Кулакова на „Партизанска“ го набавил телефонот од притвореник кој е од Гевгелија, а издржува притвор во затворот во Шутка, дознава „Скопје1“. Според извори во установата, телефонот бил пренесен од ќелија во ќелија преку затворена опаковка колачи. Услугата чинела 250 евра, а бидејќи Јованов ги немал внатре, парите биле платени кај блиска роднина на затвореникот, од страна на лице блиско до Јованов. Но останува отворено прашањето како и кога бил внесен телефонот во затворот, покрај сите контроли и метал-детектори низ кои минуваат пратките за затворениците. Неофицијално, според правилниците, строго забрането е да се пренесува било што, па макар и храна, од ќелија во ќелија.Уште од првиот ден, кога Јованов влегол во притвор, почнал да бара телефон. Иако е јавна тајна дека уреди има низ повеќе ќелии, никој не се осмелил да му даде. Сепак, овој муабет стигнал до притвореник кој е во затворот повеќе од година. Тој се понудил да му обезбеди, но и да биде платен.Најтешкиот дел бил како да се пренесе телефонот од ќелија во ќелија. Па, за тоа искористиле дежурен вработен кој го обезбедувал тој дел од затворот. Притвореникот го замолил затворскиот полицаец да однесе благо до соседната ќелија, под изговор дека немале и им барале, тврдат затворски извори за „Скопје1“. Полицаецот не се посомневал и само им ја подал опаковката со колачи.Договорот бил, плаќањето на уредот да биде надвор од затворот, бидејќи Јованов со него немал пари. „Скопје1“ поседува информации кој точно го платил уредот надвор од затворот, а засега ќе посочиме само дека станува збор за лице од блиското опкружување на Јованов. Останува отворено прашањето, како и кој го внел телефонот до затвореникот кој наплатил за да му го даде на Јованов.Според нашите информации, Јованов од телефонот исконтактирал со неговата девојка, како и со родителите. Разменил пораки и повици. Телефонирањето траеше кратко, бидејќи друг затвореник, го фотографираше, па почнал да се фали со фотографиите надвор од установата. За на крај, тие да завршат во јавност.„Скопје1“ побара потврда за овие информации од директорот на затворот, Бобан Утковски, кој рече дека во тек е истрага и дека засега не може да коментира и споделува информации. Утковски посочи дека штом се утврдат сите детали, тие сите информации ќе ги споделат со јавноста.Претходно, директорот на Управата за извршување санкции, Александар Пандов рече дека нема да биде брз процес откривањето кој и како го внел телефонот.Јованов од соба со уште пет лица е преместен во самица. Јованов доби притвор поради опасност од бегство, повторување на делото, влијание во постапката. Тој преку неговиот адвокат се противеше и бараше да се брани од слобода или судот да му досуди алтернативни мерки како домашен притвор или одземање на пасош. Ова беше одбиено. Обвинителството извести дека тој бил под дејство на алкохол и без возачка кога ја прегази Фросина на пешачки премин. Истрагата за случајот е во тек.

Македонија | пред 1 година

(Видео) Несреќа на Обиколница: почина тетовчанец, излетал со „хјундаи“

На 31.01.2025 околу 07.40 часот во СВР Скопје, било пријавено дека на автопатот- обиколница на град Скопје, во близина на клучка Орман, патничко возило „хјундаи” со тетовски регистарски ознаки, управувано од А.В.(63) од Тетово, излетало надвор од коловозот.На местото на настанот починал возачот, а лекар од Итната медицинска помош констатирал смрт.Извршен бил увид од увидна екипа од СВР Скопје.

Скопје | пред 1 година

Нема да биде брз процес откривањето на лицето кое му дало телефон на возачот кој ја усмрти Фросина, најави Пандов

”Во моментов сум во КПД Скопје-Скопје, народски познат и како затворот Шутка, каде извршувам увид во преземените активности веднаш откако беше утврдено дека повеќе притворени лица користат мобилни телефони во притвор, што е најстрого забрането”, вели Александар Пандов, директор на Управата за извршување санкции и додава:“Мобилниот телефон на притворениот возач-убиец на Фросина Кулакова му е веднаш одземен, по спроведената акција попладнево, како и повеќе други телефони кои се пронајдени. Меѓу нив и телефонот на лицето кое го слика притворениот В.Ј.Директорот на КПД Скопје, Бобан Утковски, ме информираше дека против лицата се преземени сите соодветни мерки кои се дозволени од законот, како би се обезбедиле протоколите и спроведувањето на законските прописи.Со други зборови и поконкретно - лицата од фотографијата сосема сигурно повеќе нема да имаат можност да држат во рака мобилен телефон во КПД Скопје. Лицата кои ги кршат ваквите прописи и предизвикуваат оправдан бес и гнев меѓу семејството на убиената Кулакова, но и целата јавност, ќе бидат најстрого санкционирани.Истото, и повеќе, важи особено за службениците платени од државата, од наши пари, за кои ќе биде утврдено дека во овој, но и во други случаи, овозможувале притворени лица да уживаат вакви, но и други „услуги“, на кои немаат право, односно им се најстрого забранети. Корупцијата во затворите е повеќедецениска пракса, за жал, и ги вложуваме сите наши ресурси, кои не се толкави колку што посакуваме, за да може да се бориме против неа, но можам да ве уверам дека од овој момент јас и мојот тим, во кој е и директорот Утковски, влегуваме во отворена војна со ваквите лица. И во таа војна ние ќе победуваме. Дали ќе успееме целосно да ја искорениме? Не знам. Веројатно многу тешко. Но знам дека ќе се бориме со сета снага и дека на корумпираните службеници кои ја предаваат државата со нивното срамно поведение животот ќе им стане пеколно комплициран, а ви ветувам и дека ќе ја изгубат работата.Истрагата за овој случај е во тек, и ќе ја информирам јавноста со нови детали, кога ќе ги има. Имајте предвид дека за секаква одлука ќе е нужно да обезбедиме докази, а во услови во кои работиме, тоа може и да не биде пребрз процес, но бездруго со сета енергија ќе се впуштиме во истиот.Упатувам длабоко сочуство до семејството на Кулакова и извинување за непријатноста која ја предизвикаа вознемирувачките фотографии во име на институцијата со која раководам и која ќе ги лоцира виновните за овој настан.Сосема за крај, иако знам дека е во доменот на научната фантастика, но би сакал да упатам апел до СДСМ да престанат со нивната скандалозно нечовечка политика на злоупотреба на трагични настани, особено што се водени од човек во чие министерување гореа живи луѓе во болница која требаше да им обезбеди живот. Нивните обиди да поентираат политички во ваков трагичен случај се гласен сведок за трагедијата во која се претвори оваа некогаш респектабилна партија. Потсетувам на зборовите на еден родител на убиено дете кај Смилковското езеро кој Зоран Заев го нарече вистинскиот монструм, поради лагите кои им ги кажувал на семејството во обид политички да профитира на случајот, валкајќи ги рацете со крв, додека ја лажеше јавноста и ширеше вознемиреност и неизвесност. Бедно е што од Бихачка не може да излезат од таа матрица. Но, секој сам го бира својот пат.Светол пат, Фросина. Ветувам дека ќе сториме се за да го заштитиме твоето семејство од политичките глодари и од корумпираните службеници во системот”.

Македонија | пред 1 година

(Фото) Возачот кој ја усмрти Фросина со телефон во затвор: префрлен е во самица, а се води и истрага

Само два дена откако влезе во притвор, возачот Васил Јованов кој на „Партизанска“ ја усмрти Фросина Кулакова, набавил телефон во притворското одделение во затворот во Шутка. За ова се дозна откако затвореници го снимиле додека бил во дворот каде има право на шетање од 1 до 2 часа.Откако фотографиите завршија на интернет, Јованов заврши од ќелија со други осуденици во самица. Директорот на затворот, Бобан Утковски, рече дека ќе се проверува како Јованов го набавил телефонот и од кого, за што посочи дека веќе се прават проверки.На социјалните мрежи, одговорност бараат и од семејството на Фросина.„Од семејството на свирепо убиената Фросина Кулакова јавно се обраќаме да се пронајде одговорниот што го снабдил со телефон убиецот - монструм и да биде соодветно санкциониран. Системот повторно потфрли! Дали ќе се дозволи корупцијата што ја уби сестра ми и понатаму да владее?! Чие дете е следно?“, напиша Росица Кулавкова.Јованов доби притвор поради опасност од бегство, повторување на делото, влијание во постапката. Тој преку неговиот адвокат се противеше и бараше да се брани од слобода или судот да му досуди алтернативни мерки како домашен притвор или одземање на пасош. Ова беше одбиено.Обвинителството извести дека тој бил под дејство на алкохол и без возачка кога ја прегази Фросина на пешачки премин. Истрагата за случајот е во тек.БОНУС ВИДЕО: Како изгледаат притворските ќелии во затворот во Шутка

Македонија | пред 1 година