УНГАРИЈА

Тензија во ЕУ поради транзитот на нафта кон Унгарија и Словачка: Сијарто се закани со блокада ако Киев не го обнови транзитот

Унгарскиот министер за надворешни работи Петер Сијарто го засили притисокот врз Украина поради транзитот на нафта кон Унгарија и Словачка преку нафтоводот „Дружба“, заканувајќи се со блокада на одлуки важни за Киев во рамки на Европската Унија.Во две објави на платформата „Икс“, Сијарто порача дека решението е „едноставно“ и дека Украина треба да ги обнови испораките.„Едноставно и лесно е. Наместо да се мешате во нашите избори, повторно покренете ги испораките на нафта кон Унгарија и Словачка. И едните и другите знаеме дека нема техничка пречка“, напиша Сијарто.Во втората објава тој најави дека Унгарија ќе го блокира усвојувањето на 20-тиот пакет санкции против Русија на Советот за надворешни работи на ЕУ.„Додека Украина не го обнови транзитот на нафта кон Унгарија и Словачка преку ‘Дружба’, нема да дозволиме одлуки важни за Киев да одат понатаму“, порача Сијарто.Реакцијата доаѓа откако украинското Министерство за надворешни работи соопшти дека не прифаќа ултиматуми и дека работи на стабилизација на енергетскиот систем под постојани руски напади. Киев тврди дека на Будимпешта и Братислава им предложил алтернативни начини за снабдување со нафта што не е од руско потекло.Новата ескалација околу транзитот на нафта дополнително ги усложнува односите во ЕУ во момент кога Унијата разгледува нови санкции кон Москва и продолжување на поддршката за Украина.

Свет | пред 2 дена

Киев: Изјавите од Будимпешта и Братислава се провокативни и неодговорни

Украинските власти остро реагираа на, како што ги оценија, заканите и изјавите од Будимпешта и Братислава, нагласувајќи дека таквите потези се „провокативни и неодговорни“, особено во услови кога Русија спроведува масовни и целни напади врз украинската енергетска инфраструктура.Според соопштението од Киев, во момент кога Москва се обидува во текот на зимата да им ги ускрати на Украинците струјата, греењето и гасот, ваквите изјави „одат во прилог на агресорот“ и истовремено им нанесуваат штета на енергетските компании од Унгарија и Словачка, кои работат на комерцијална основа.Украина посочува дека е во постојана комуникација со Европската комисија поради штетите предизвикани од секојдневните руски напади, како и дека на Будимпешта и Братислава им доставила податоци за последиците од ударите врз инфраструктурата на нафтоводот „Дружба“. И покрај континуираната опасност од нови ракетни напади, безбедносните и стабилизациските работи продолжуваат, се наведува во соопштението.Киев истакнува дека предложил и алтернативни правци за снабдување на Унгарија и Словачка со нафта која не е од руско потекло, нагласувајќи дека Украина „секогаш била, е и ќе остане сигурен енергетски партнер на Европската унија и важна транзитна земја за енергенси“.Воедно, поради, како што се наведува, неоснованите и неодговорни закани од Будимпешта и Братислава, Украина разгледува можност за активирање на Механизмот за рано предупредување предвиден во Спогодбата за асоцијација меѓу Украина и Европската унија.Од украинското министерство упатија повик до владите на Унгарија и Словачка за конструктивен дијалог и одговорно однесување, порачувајќи дека ултиматумите треба да бидат насочени кон Кремљ, а не кон Киев.

Свет | пред 2 дена

Унгарскиот премиер со остри критики кон Брисел

Унгарскиот премиер Виктор Орбан на предизборен митинг во Бекешчаба повторно ја критикуваше западната стратегија кон војната во Украина, споредувајќи ја политиката на Европската унија со историските неуспеси на Наполеон Бонапарта и Адолф Хитлер.„Денес војната сè уште трае затоа што европските лидери сакаат да продолжи“, изјави Орбан пред поддржувачите. Во своето обраќање тој не ја спомена одговорноста на Русија за започнувањето на војната.Минатата недела, во годишното обраќање до нацијата, Орбан порача дека „путинизацијата“ е примитивна и неозбилна, додавајќи дека вистинската закана за слободата на Унгарците, според него, не доаѓа од Москва, туку од Брисел.Говорејќи за мотивите на европските лидери, Орбан изјави дека тие веруваат оти доколку ја поразат Русија на украинска територија, ќе можат да ја натераат да плати отштета и на тој начин да ги вратат средствата што ѝ ги дале на Украина во форма на заеми.„Тоа го пробаа и Наполеон и Хитлер. Ним не им успеа. Ќе ѝ успее ли на Каја Калас?“, рече Орбан.Тој ја оцени како погрешна стратегијата на очекување дека Русија економски ќе се исцрпи поради санкциите на Европската унија, додавајќи дека „на крајот црвеното знаме обично се вее на берлинските кули“.Изјавите на унгарскиот премиер доаѓаат во период на засилени несогласувања меѓу Будимпешта и Брисел околу санкциите кон Русија и воената и финансиска поддршка за Украина.

Свет | пред 2 дена

Сијарто: Европската комисија треба да го повика Киев да престане со политичките уцени

Унгарскиот министер за надворешни работи Петер Сијарто изјави дека Унгарија сака да учествува во посредување не само во Газа туку и во Украина, додека истовремено порачува дека Будимпешта нема да прифати, како што тврди, политички уцени од Киев.Сијарто во Вашингтон рече дека одборот може да се занимава не само со ситуацијата во Газа, туку и со конфликтот во Украина.Тој нагласи дека новиот светски поредок зависи од билатерални односи, меѓувладини соработки и лични контакти, и дека дипломатските напори на американскиот претседател Доналд Трамп нудат шанса за мир, споредлива со Аврамовите спогодби од 2020 година кои ги нормализираа односите помеѓу Израел и арапските земји.Покрај улогата во мировните напори, Унгарија ги штити своите енергетски интереси. Сијарто ја критикуваше Украина поради, како што тврди, обидите за политичко уценирање во врска со прекинот на испораките на сурова нафта преку нафтоводот Дружба.„Унгарија направи сè за да спречи криза. Ако ЕУ беше функционална организација, би застанала во одбрана на Унгарија и Словачка, а Европската комисија треба да го повика Киев да престане со политичките уцени“, рече Сијарто.

Свет | пред 5 дена

Унгарија пред пресврт? Инфлација, замрзнати европски фондови и скандали – најтешки избори за Орбан по 2010 година

Унгарскиот премиер Виктор Орбан влегува во нова изборна година во поинаква политичка атмосфера од онаа на која навикна во изминатите 15 години. Неговата партија Фидес од 2010 година редовно освојуваше двотретинско мнозинство во парламентот, а политичкиот систем во меѓувреме беше реобликуван така што ѝ обезбедува стабилна предност. Сепак, според актуелните анкети, Фидес првпат сериозно заостанува зад новата опозициска партија Тиса.Во изминатите мандати Орбан го менуваше уставот, го реформираше изборниот систем и ја зацврсти контролата врз клучните институции, вклучително и судството и јавните медиуми. Критичарите го опишуваат моделот како силно централизирана структура со формални демократски механизми, но со изразена структурна предност за владејачката партија.Во 2022 година Европски парламент оцени дека Унгарија повеќе не може да се смета за целосна демократија. Европска Унија и понатаму задржува повеќе од 20 милијарди евра средства наменети за Унгарија поради загриженост околу владеењето на правото, корупцијата и независноста на судството. Иако средствата би можеле да бидат одблокирани со реформи, Будимпешта засега не покажува подготвеност за значајни отстапки.Паралелно, економските услови во земјата се влошија. Инфлацијата во 2023 година надмина 17 проценти, а цените на храната од 2019 до 2025 година пораснаа за повеќе од 80 проценти. Реалните приходи на дел од населението се под притисок од високите трошоци за живот, што сè почесто се наведува како причина за падот на поддршката за Фидес.Во таков контекст се појави нов политички фактор – Тиса, предводена од Петер Маѓар, поранешен висок функционер на Фидес. За разлика од претходните избори, пошироката опозиција покажува поголема подготвеност за соработка, обидувајќи се да ги избегне поделбите кои во минатото му обезбедуваа комотни победи на Орбан.Сепак, аналитичарите предупредуваат дека освојувањето повеќе гласови можеби нема да биде доволно. Поради распределбата на изборните единици и структурата на системот, опозицијата би требало да освои значително повеќе гласови на национално ниво за да обезбеди парламентарно мнозинство.Унгарија и натаму е во вонредна состојба воведена поради војната во Украина, што ѝ овозможува на владата проширени овластувања за носење одлуки со уредби. Таквиот правен рамковник дополнително ја усложнува политичката ситуација во случај на тесен изборен резултат.Надворешната политика на Орбан исто така е под засилен надзор. Унгарија е меѓу ретките членки на ЕУ кои ги задржаа силните енергетски врски со Русија, а Будимпешта повеќепати ги блокираше или одложуваше европските одлуки поврзани со помошта за Украина. Истовремено, земјата ги продлабочува економските односи со Кина, која стана нејзин најголем трговски партнер надвор од Европа.Дополнителен притисок создаде и политичкиот скандал од минатата година, кога поранешната претседателка Каталин Новак поднесе оставка поради помилување лице поврзано со случај на злоупотреба на деца, што предизвика масовни протести.И покрај падот на поддршката, Фидес и понатаму располага со силна организациска инфраструктура и државни ресурси. Прашањето што останува отворено е дали незадоволството на гласачите ќе се претвори во доволно силен и организиран политички пресврт, или системот што Фидес го обликуваше со години повторно ќе му обезбеди останување на власт.

Свет | пред 6 дена

Тензии меѓу Будимпешта и Киев пред унгарските парламентарни избори

Украинскиот претседател Володимир Зеленски директно се вклучил во предизборната кампања во Унгарија со напади врз унгарската влада, изјави премиерот на Унгарија Виктор Орбан.Унгарските граѓани на 12 април ќе гласаат на парламентарни избори на кои Орбан, кој е на власт од 2010 година, го бара својот петти мандат. Анкетите покажуваат дека негов главен предизвикувач е опозициската партија Тиса, предводена од неговиот поранешен сопартиец Петер Маѓар.Орбан оцени дека политичките напади од Украина достигнале ново ниво.„Кога претседателот Зеленски лично ме напаѓа затоа што не го поддржуваме забрзаното пристапување на Украина во Европската унија, тој всушност ја доведува во прашање суверената одлука на унгарскиот народ“, изјави лидерот на Фидес, пренесува МТИ.Според Орбан, унгарските граѓани веќе се изјасниле против членството на Украина во ЕУ преку националното советување „Вокс2025“, спроведено минатата година. Владата тврди дека во анкетата учествувале 2,2 милиони луѓе, во земја со околу 9,6 милиони жители.„Како премиер на Унгарија, моја должност е да ги спроведувам одлуките на унгарскиот народ. Тоа ќе го правам повторно и повторно, без разлика дали му се допаѓа на претседателот Зеленски или не“, порача Орбан.Во изминатиот период, унгарскиот премиер ја нарече Украина „непријател“ на Унгарија, обвинувајќи ја дека во Брисел бара прекин на снабдувањето со евтина руска енергија за Будимпешта. Унгарија, која пред војната беше силно зависна од руските енергенси, и натаму одржува контакти со Москва, а Орбан од почетокот на руската офанзива врз Украина најмалку трипати ја посети руската престолнина.Орбан изборите во април ги претставува како одлука „за војна или за мир“, додека аналитичарите оценуваат дека прашањето за Украина е во фокусот на кампањата, во услови кога унгарската економија се соочува со стагнација по периодот на висока инфлација.

Свет | пред 1 седмица

Унгарија и Словачка бараат од Хрватска транспорт на руска нафта преку Јадранскиот нафтовод

Унгарија и Словачка во неделата побараа од Хрватска да дозволи транспорт на руска нафта преку Јадранскиот нафтовод, откако Украина ги блокираше нивните испораки преку нафтоводот „Дружба“, изјави синоќа унгарскиот министер за надворешни работи Петер Сијарто.Тој на својот Фејсбук-профил наведе дека, со оглед на тоа што Украина „од политички причини“ сѐ уште не ја обновила испораката на нафта преку цевководот „Дружба“, заедно со словачката министерка за економија Дениса Сакова испратил писмо до хрватскиот министер за економија Анте Јуп, во кое од Хрватска се бара веднаш да дозволи транспорт на руска нафта во Унгарија и Словачка преку Јадранскиот цевковод.Сијарто напомена дека таквата дозвола мора да биде издадена во согласност со прописите на Европска Унија, бидејќи Унгарија и Словачка претходно добиле исклучителна дозвола да продолжат да купуваат нафта од Русија и покрај санкциите на ЕУ.„Ако транспортот на нафта преку цевковод не е можен, тогаш двете земји можат да купуваат руска нафта испорачана по морски пат“, додаде Сијарто.Тој нагласи дека безбедноста на енергетското снабдување за која било земја, вклучително и Унгарија, не може да биде идеолошко прашање.„Затоа очекуваме Хрватска, за разлика од Украина, да не ја загрози безбедноста на снабдувањето со нафта на Унгарија и Словачка од политички причини“, додаде тој.Сијарто претходно изјави дека Украина ги блокира испораките на нафта за Унгарија со цел да создаде тешка ситуација за владата на таа земја во пресрет на парламентарните избори закажани за 12 април.Украина соопшти дека снабдувањето е прекинато поради руски напад врз инфраструктурата на нафтоводот на 27 јануари.

Свет | пред 1 седмица

Зеленски го спомена стомакот на Виктор, унгарскиот премиер возврати: Затоа не можете да станете членка на Европската Унија

Унгарскиот премиер Виктор Орбан јавно му возврати на украинскиот претседател Володимир Зеленски по неговите изјави поврзани со европската перспектива на Украина и безбедносната политика во Европа.Во објава на социјалната мрежа Икс, Орбан му се обрати директно на Зеленски, заблагодарувајќи му, како што наведе, за „уште еден предизборен говор“ во поддршка на пристапувањето на Украина во Европската Унија. Орбан порача дека Зеленски погрешно ја разбира суштината на дебатата, нагласувајќи дека таа не е лична, туку се однесува на иднината на Унгарија, Украина и Европа.„Оваа дебата не е за мене и не е за тебе. Станува збор за иднината на Унгарија, Украина и Европа. Токму затоа не можете да станете членка на Европската Унија“, напиша Орбан.Неговата реакција следува по изјава на Зеленски дадена на меѓународен безбедносен форум, каде индиректно го прозва унгарскиот премиер. Во цитат што го пренесоа повеќе профили на социјалните мрежи, Зеленски рече дека „и еден ‘Виктор’ може да размислува како да го зголеми својот стомак, а не како да ја зголеми својата војска за да ги запре руските тенкови од повторно враќање на улиците на Будимпешта“.Размената на остри пораки доаѓа во чувствителен момент, кога Украина интензивно лобира за отворање на преговорите за членство во ЕУ, додека Унгарија останува една од земјите членки што често изразува резерви кон брзото проширување и кон одредени европски политики во однос на Киев.Односите меѓу Будимпешта и Киев и претходно беа обременети со несогласувања околу правата на унгарското малцинство во Украина, санкциите кон Русија и воената поддршка за украинската армија.Останува да се види дали оваа нова дипломатска размена ќе има конкретни последици врз позицијата на Унгарија во рамки на европските одлуки за Украина, особено во пресрет на наредните состаноци на лидерите на ЕУ.

Свет | пред 1 седмица

Најава за скандал во Унгарија: Објавена фотографија од спална соба и натпис „Coming soon“

На адресата Раднаимарк.ху вчера се појави мистериозна интернет-страница на која има само црно-бела фотографија со празен кревет, фотографирана од горниот агол на собата, со натпис „Coming soon“, односно „наскоро“.Набргу потоа, во провладините унгарски медиуми почнаа да се шират написи за „гласини“ според кои потпретседателот на партијата Тиса, Марк Раднаи, и Петер Маѓар учествувале во оргии, а дека токму снимка од тој настан наскоро ќе биде објавена на страницата.Партијата Тиса е унгарска опозициска политичка опција, која во 2024 година ја презеде и ја трансформираше поранешниот член на владејачкиот Фидес, Петер Маѓар. По разидувањето со премиерот Виктор Орбан, Маѓар се профилираше како еден од најгласните критичари на власта, а Тиса за кратко време забележа силен раст на поддршката, особено меѓу урбаните и помладите гласачи.Парламентарните избори во Унгарија треба да се одржат на 12 април. Орбан првпат по 16 години на власт се соочува со сериозен противник. Маѓаровата Тиса повеќе од една година води пред Орбановата Фидес во анкетите на јавното мислење.Новинарите ги контактираше и самиот Марк Раднаи. Тој изјави дека, иако во последно време често се селел, собата од фотографијата не припаѓа на ниту еден негов стан и дека просторијата му е целосно непозната.Додаде дека во изминатите месеци слушал обиди да биде поврзан со хомосексуална афера, но дека не реагирал бидејќи, како што вели, не е хомофоб.„Што и да објават, можам веднаш да го демантирам, бидејќи немав никаква врска што би можела на кој било начин да биде предмет на јавен интерес“, порача Раднаи.Според него, целата „акција“ е темпирана за денешната втора годишнина од интервјуто што Петер Маѓар го даде за независниот унгарски онлајн-медиум Партизан. Раднаи откри и дека во изминатите недели, кога станал кандидат во Естергом, сакал да ја заштити интернет-адресата со своето име, но тогаш открил дека некој веќе ја регистрирал. Податоците покажуваат дека доменот radnaimark.hu бил регистриран од приватно лице на 30 декември 2024 година.„Очигледно и за Фидес ова е симболичен ден, бидејќи тогаш се разниша нивната дотогаш непоколеблива власт. И се подготвуваат за тоа. Не како што би го правеле нормални луѓе, со соочување и извинување, туку со уцени и закани. Долго време ме уценуваат и ми се закануваат со видеоснимки и дискредитација, а изгледа дека на годишнината ќе покренат досега невидена кампања во руски стил“, напиша Маѓар.Тој наведе дека на многу новинари им била испратена врска до страницата на која се гледа соба со поставени камери.„Претпоставувам дека планираат да објават снимка, можеби монтирана, направена од тајните служби, на која сме јас и мојата тогашна партнерка за време на интимен однос. Што сакаат да постигнат со тоа, освен да го одвлечат вниманието од фабриката на смртта во Гед и улогата на владата на Орбан во тоа, не знам“, додаде тој.Маѓар порача дека нема да попушти.„Да, јас сум 45-годишен маж и имам сексуален живот. Со полнолетна партнерка. Имам и три малолетни деца, за кои оваа подла ‘семејно наклонета’ власт очигледно не се грижи. Но добро е сите да знаат дека ни досега, ни во иднина нема да попуштам на никакви уцени. Не сум јас тој што украл 650 милијарди од Народната банка, не сум јас тој што помилувал помагач на педофил, не сум учествувал јас во уништување на животите на илјадници деца под државна грижа“, напиша Маѓар.Обраќањето го заврши со порака до власта:„Драги исплашени фидесовци, само напред, објавете сè, монтирајте како сакате. Нема да попуштам ни пред уцени ни пред закани. Ниту пред унгарската политичко-економска мафија, ниту пред меѓународната мрежа што ја поддржува. Унгарија не е на продажба и нема цена по која јас би ги издал своите сограѓани.“

Свет | пред 1 седмица

Орбан тврди: Клинтон побара Унгарија да ја нападне Србија во 1999 година

Унгарскиот премиер Виктор Орбан изјави дека во 1999 година, за време на неговиот прв мандат, поранешниот американски претседател Бил Клинтон побарал од Унгарија да ја нападне Србија по копно за да отвори втор фронт во средината на војната во Косово.Орбан го изнесе ова тврдење за време на викендот на состанокот на Дигиталните граѓански кругови на Фидес во Сомбатели, пишува Телекс.Според Орбан, Клинтон барал Унгарија да ја нападне Србија или „барем да пука во нив од Унгарија преку Војводина па сè до Белград“.Владата на Орбан, како што тврди тој, одбила, а на изричното барање на американскиот претседател, тие одговориле со „Не, господине!“. „Да имавме тогаш премиер кој знаеше само да каже „Да, господине“, ќе бевме во војна до врат“, заклучи Орбан.Унгарскиот премиер вели дека потоа го прашал Клинтон што ќе се случи со 300.000 Унгарци што живеат во Војводина во тој случај. Тој тврди дека го предупредил и Клинтон дека враќа на оган од една локација и прашал:„Дали треба да дозволиме бомбардирање на Сегед, тоа е планот? Или на Ходмезовашархеј и Мако?“ Орбан рече дека се согласиле да разговараат за тоа лично на самитот на НАТО една недела подоцна, но тврди дека Американците никогаш повеќе не го отвориле прашањето.„Можно е да се каже „не“ кога имате храброст“, им рече тој на присутните во Сомбатеј. Додаде дека за неколку години, дипломатската историја ќе открие преку кои канали и информации го убедиле американскиот претседател никогаш повеќе да не поднесе такво барање.

Свет | пред 2 седмици

(Видео) Орбан ја нарече Украина „непријател“ на Унгарија на предизборен митинг

Унгарскиот премиер Виктор Орбан ја нарече Украина „непријател“ на Унгарија, говорејќи на предизборен митинг во градот Шомбатхељ, на западот од земјата.„Украинците мора да престанат постојано да бараат во Брисел да ѝ се прекине на Унгарија дотокот на евтина руска енергија“, изјави Орбан во својот говор, додавајќи: „Додека тоа го прават, тие се наш непријател“, пренесе државната новинска агенција МТИ.Орбан во рамки на Европската Унија се смета за најблизок сојузник на рускиот претседател Владимир Путин и со години води политика на силна енергетска зависност од Русија. За разлика од повеќето земји членки на ЕУ, Унгарија под негово водство не презеде значајни чекори за намалување на зависноста од рускиот гас и нафта.Парламентарните избори во Унгарија се закажани за 12 април, а Орбан за првпат по 16 години власт се соочува со сериозен политички предизвик. Опозициската Партија „Тиса“, предводена од конзервативниот политичар Петер Маѓар, веќе повеќе од една година води пред владејачката Фидес во анкетите на јавното мислење, што ја прави оваа изборна трка една од најнеизвесните досега.

Свет | пред 2 седмици

(Видео) Шокантен инцидент на Балканот: Автомобил однесен со петгодишно дете на задното седиште

Шокантна снимка од Балканот, на која се гледа како крадец краде автомобил во кој се наоѓа мало дете, ја обиколи јавноста и предизвика силни реакции. Инцидентот се случи во средата, на 4 февруари, во утринските часови пред една детска градинка во Унгарија.Според информациите, таткото го оставил автомобилот со вклучен мотор и отклучен, додека го внесувал помалото дете во градинката. Во возилото, на задното седиште, останало постарото дете. Кога таткото се вратил, автомобилот и детето веќе ги немало.Крадецот, како што се гледа на снимките од надзорните камери, се оддалечил со возилото, а неколку улици подалеку го извадил детето од автомобилот и го оставил само, по што продолжил да бега. Набргу потоа, во полицијата бил пријавен случај од страна на вработен во блиска продавница, кој известил дека кај нив се наоѓа дете без родители кое го бара својот татко.На објавената снимка, која ја сподели Државниот секретаријат за внатрешна безбедност, јасно се гледа моментот на кражбата, а може да се слушнат и два аудиоснимки – на едниот таткото вознемирено зборува на телефон, а на другиот граѓанин пријавува дека пронашол дете кое тврди дека му е украден автомобилот.„Ги носев децата во градинка и мојот син остана во автомобилот. Го зедов клучот, но некако го одвезоа автомобилот заедно со детето“, изјавил таткото, додавајќи дека неговиот син има пет години.Полицијата подоцна го пронашла автомобилот и осомничениот околу 50 километри подалеку, на адреса во местото Ујшаш. Станува збор за 20-годишен маж кој пред полицијата давал противречни изјави, тврдејќи и дека возилото го купил на железничка станица за 50.000 форинти.Осомничениот е приведен и против него е поведена соодветна постапка. Од полицијата повторно апелираа до граѓаните никогаш да не оставаат автомобил со вклучен мотор и отклучен, дури ни на кратко, предупредувајќи дека вакви ситуации можат лесно да завршат со трагични последици.

Свет | пред 2 седмици

Унгарија ja тужи ЕУ

Унгарската влада поднесе тужба до Судот на правдата на ЕУ, барајќи поништување на Уредбата RePower EU, чија цел е постепено укинување на увозот на руски гас.Ова го изјави министерот за надворешни работи и трговија на Унгарија, Петер Сијарто. Тој тврди дека ЕУ со усвојувањето на уредбата ја надминала својата надлежност, бидејќи одлуката е погрешно претставена како мерка на трговска политика, а не како санкција, додека нејзината примена би ја загрозила безбедноста на снабдувањето со енергија во Унгарија.Сијарто, пишува унгарскиот Индеx, наведе дека Унгарија ја оспорила уредбата RePower EU пред Судот на ЕУ по нејзиното официјално стапување на сила, истакнувајќи дека за Унгарија не постојат поевтини и по сигурни алтернативи на руската нафта и гас, како и дека без тие енергенти не е можно да се гарантира енергетската безбедност на земјата ниту одржувањето на ниски трошоци за домаќинствата.Сијарто наведе три клучни причини поради кои Будимпешта бара поништување на уредбата: прво, RePower EU во суштина претставува политика на санкции, поради што би барала едногласна одлука на земјите членки; второ, ЕУ нема надлежност за донесување такви одлуки бидејќи енергетската политика е во надлежност на земјите членки; и трето, принципот на енергетска солидарност во ЕУ се крши доколку се загрозува снабдувањето со енергија на која било членка.Според Сијарто, судскиот процес би можел да трае помеѓу една и пол и две години, а укинувањето на руските енергенти, како што наведе, би можело да го зголеми трошокот за енергија во Унгарија.Уредбата RePower EU беше усвоена од Европскиот парламент во декември, додека Советот на ЕУ ја потврди во јануари, при што против беа само Унгарија и Словачка.Според планот, забраната се однесува исклучиво на рускиот гас, додека за укинување на увозот на руска нафта и нуклеарно гориво ќе се одлучува со посебна уредба во 2026 година.Според договорот на институциите на ЕУ, увозот на руски течен природен гас (LNG) би бил забранет од почетокот на 2026 година, додека забраната за увоз на гас преку гасоводи би стапила на сила на 30 септември 2027 година, со предвидени транзициски периоди за постоечките договори.Уредбата предвидува и обврска на земјите членки да изработат национални планови за диверзификација на снабдувањето со гас, додека Европската комисија ќе ја надгледува примената на забраната.

Свет | пред 3 седмици

Поддршката за Орбан „се топи”, опозицијата води на анкетите

По речиси две децении неприкосновена власт, унгарскиот премиер Виктор Орбан се соочува со најтешкиот политички предизвик досега. Најновите анкети покажуваат водство на опозицијата, а во владејачкиот Фидес сè погласно се отвора прашањето дали е време за промена на лидерството и тоа на помалку од три месеци до парламентарните избори.Истражувањето на повеќе агенции покажуваат дека опозициската партија Тиса, предводена од Петер Маѓар, има 49 отсто поддршка, наспроти 39 отсто за Фидес. Во некои анкети разликата меѓу двата блока меѓу сигурните гласачи достигнува и до 12 процентни поени во корист на опозицијата.Поранешниот член на Фидес и сегашен ривал на Орбан, Петер Маѓар, во моментов е најпопуларен политичар во Унгарија.Тиса има силна поддршка кај младите, урбаните и високообразованите гласачи, особено во Будимпешта, а Фидес својата база сè повеќе ја задржува кај гласачите постари од 60 години.Според „Дејли њуз Хангари“, ниту засилената владина кампања со финансиски мерки, пензии и даночни олеснувања не успеала да го запре падот на рејтингот. Независните анкети покажуваат дека Тиса веќе подолго време има околу 400.000 потенцијални гласови повеќе од Фидес – предност што може да се покаже клучна на изборите напролет.

Свет | пред 3 седмици

Орбан: Постигнав договор со Трамп, Путин и Ердоган

Унгарскиот премиер Виктор Орбан изјави дека без интервенција на владата сметките на домаќинствата би се зголемиле за околу 30 отсто поради екстремно студеното време, нагласувајќи дека државните мерки се клучни за заштита на граѓаните. Во редовното утринско интервју на радиото „Кошут“, Орбан рече дека постигнал договор со американскиот претседател Доналд Трамп, рускиот претседател Владимир Путин и турскиот претседател Реџеп Таип Ердоган за натамошно снабдување на Унгарија со евтин гас.Според Орбан, претстојните избори во април ќе бидат одлучувачки за опстанокот на намалените цени на енергенсите, за кои тврди дека Брисел сака да ги укине. Тој истакна дека рускиот гас е неопходен за одржување на сегашното ниво на цени и дека Унгарија има рок од околу година и пол за да најде начин да ја заобиколи забраната на Европската унија.Европската унија оваа недела усвои регулатива со која постепено се укинува увозот на природен гас од руски гасоводи и течен природен гас. Целосната забрана за увоз на течен гас треба да стапи на сила на почетокот на 2027 година, додека забраната за увоз преку гасоводи е предвидена за есента истата година. Орбан оцени дека доколку Унгарија не најде решение во предвидениот рок, домаќинствата ќе се соочат со сериозен хаос, додавајќи дека со оваа одлука Брисел, според него, настојува да ѝ помогне на Украина.Тој посочи дека Европската унија не би требало да се меша во трговските прашања, освен кога станува збор за санкции, за кои, како што нагласи, е потребна согласност од сите земји членки. Истовремено додаде дека за трговските одлуки не е потребна едногласност.Осврнувајќи се на Украина, Орбан потсети на планот за нејзино обновување, со кој од Европа се бараат стотици милијарди евра. Според него, целта е во Унгарија да дојде на власт проукраинска влада, што, како што тврди, би го уништило унгарското стопанство, а поради географската близина со Украина, најмногу би страдале токму унгарските граѓани.Орбан оцени дека Украина не ја зајакнува, туку ја ослабува Европа и дека таа треба да се задржи во, како што рече, преодна состојба. Тој порача дека во Брисел се води битка која мора да се добие, наведувајќи дека како што Унгарија, според него, ја добила битката околу миграциите, така може да ја добие и битката околу членството на Украина во Европската унија. Премиерот изрази уверување дека и западноевропските земји ќе се спротивстават и ќе ги принудат своите лидери да не ги поддржуваат, како што ги нарече, погрешните политики, нагласувајќи дека за тоа најпрво е потребна победа на домашен терен, а потоа и во Брисел.

Свет | пред 3 седмици