Паметните камери на ЦУК навреме открија пожар кај Никуштак

Пожарот во атарот на селото Никуштак во Општина Липково бил навреме забележан благодарение на системот за рана детекција на шумски пожари со паметни камери, соопшти Центарот за управување со кризи (ЦУК).

— реклама —

Откако камерата го регистрирала пожарот, веднаш биле известени Територијалната противпожарна единица Куманово и подружницата на „Национални шуми“ – Куманово, со цел навремено да се преземат мерки и да се интервенира на терен.

— реклама —

Од ЦУК посочуваат дека системот им овозможува на операторите во Секторот за операции и координација да ја контролираат и насочуваат камерата, со што пожарот може непрекинато да се следи визуелно во реално време.

— реклама —

Покрај раното откривање, технологијата овозможува и побрза координација на расположливите ресурси на терен, како и следење на правецот во кој се движи пожарот. На тој начин надлежните служби можат навреме да го насочат своето дејствување сè до локализирањето и целосното гаснење на пожарот.

— реклама —

Според директорот на ЦУК, Мухамед Али, ваквиот систем претставува значаен механизам за навремено реагирање и заштита од шумски пожари.