Паника на летот Тел Авив – Виена: лажна дојава за бомба принуди авион да слета во Бугарија

Авион на „Австриан ерлајнс“, кој летал од Тел Авив кон Виена, бил пренасочен и принудно слетал во Софија по дојава за бомба. По извршените безбедносни проверки, не била утврдена никаква опасност, а авионот го продолжил летот кон крајната дестинација.

— реклама —

Станува збор за авион „ербас А320“ со ознака OS82, кој слетал на аеродромот во Софија во неделата во 20:42 часот по средноевропско време. Бугарското Министерство за транспорт и врски соопштило дека пренасочувањето било извршено поради сигнал за закана со бомба.

— реклама —

Од „Австриан ерлајнс“ потврдиле дека била упатена закана за летот на релација Тел Авив – Виена, поради што било неопходно авионот да слета во Софија.

— реклама —

Во авионот имало 51 патник и шест членови на екипажот. Бугарските власти соопштиле дека, согласно со безбедносните процедури, борбен авион на бугарските воздухопловни сили полетал и го придружувал патничкиот авион до слетувањето. Бил формиран и оперативен штаб.

При проверката на авионот, кај патниците и членовите на екипажот не биле пронајдени никакви опасни предмети или други показатели за закана. По завршувањето на безбедносните проверки, патниците повторно се качиле во авионот, кој го продолжил летот од Софија кон Виена.