Папата Лав повика вештачката интелигенција да се развива во служба на мирот

Папата Лав повика развојот на вештачката интелигенција да биде насочен кон зачувување на мирот и зајакнување на врските меѓу луѓето, наместо кон продлабочување на општествените поделби.

— реклама —

Во порака до учесниците на конференцијата „AI4Peace“ во Рим, поглаварот на Католичката црква порача дека во свет обележан со конфликти и поделби, развојот на вештачката интелигенција мора да биде проследен со визија заснована на мудрост и милосрдие.

— реклама —

Лав повика да се создаваат системи на вештачка интелигенција кои ќе го почитуваат достоинството на секој човек и ќе придонесуваат за зајакнување на врските што го обединуваат човештвото.

Можните опасности од развојот на вештачката интелигенција се меѓу централните теми на неговиот 16-месечен понтификат. Во својата прва енциклика, објавена во мај, тој предупреди дека системите на вештачка интелигенција можат да придонесат за ширење дезинформации и да им дадат предност на конфликтите, поради што повика на воспоставување меѓународни правила за оваа индустрија.

— реклама —

Конференцијата „AI4Peace“ се одржува на Папскиот латерански универзитет во Рим, а меѓу учесниците се американскиот економист Џефри Сакс, претседателката на Градскиот совет на Рим, Светлана Чели, и ректорот на Универзитетот за мир на Обединетите нации во Костарика, Франциско Рохас Аравена.

Пораката на папата до присутните ја прочита свештеникот Андреа Чучи, директор на Папската академија за живот.