ПАПА ЛАВ

Папата Лав XIV со силен апел: Човечкото достоинство нема пасош

Папата Лав XIV упати силен апел до светските лидери да покажат повеќе солидарност и човечност кон мигрантите и бегалците, предупредувајќи дека историјата ќе ги осуди оние што останале неми пред страдањето на луѓето кои бегаат од војни, сиромаштија и прогон.За време на посетата на Канарските Острови во Шпанија, една од главните мигрантски рути кон Европа, поглаварот на Римокатоличката црква порача дека „човечкото достоинство нема пасош и не ја губи својата вредност со преминување на граница“.Говорејќи во пристаништето Аргинегин на островот Гран Канарија, кое хуманитарните организации го нарекоа „Пристаниште на срамот“ поради условите во кои биле сместувани мигрантите за време на пандемијата, папата ги повика политичарите да преземат поголема одговорност во заштитата на најранливите.Тој истакна дека светот не смее да стане рамнодушен кон секојдневните извештаи за загинати мигранти, потсетувајќи дека Средоземното Море во изминатите години се претвори во една од најсмртоносните мигрантски рути во светот.Обраќајќи се пред споменикот посветен на мигрантите кои ги загубиле животите во обид да стигнат до Европа, Лав XIV предупреди дека еден ден ќе се знае дали државите ги заштитиле човечките животи или дозволиле рамнодушноста да надвладее.Посетата на Канарските Острови е дел од неговата седумдневна турнеја низ Шпанија, во рамки на која тој продолжува да инсистира на почитување и заштита на правата на мигрантите и бегалците.Пораките на папата доаѓаат во период кога Европа повторно води интензивни дебати за миграцијата, безбедноста на границите и хуманитарните обврски кон луѓето што бараат засолниште.

Свет | пред 4 часа

Папата Лав XIV пристигнува на Канарските Острови: „Пристаништето на срамот може да стане пристаниште на надежта“

Папата Лав XIV во четврток ќе ја започне својата историска посета на шпанските Канарски Острови, која ќе биде прва посета на поглавар на Римокатоличката црква на овој архипелаг. Во фокусот на посетата ќе биде мигрантската криза што со години ги погодува островите.Светиот Отец ќе ја посети луката Аргуинегин на Гран Канарија, која во 2020 година беше симбол на тешките услови во кои престојуваа илјадници мигранти. Следниот ден ќе отпатува на Тенерифе, каде што ќе се сретне со повеќе од илјада мигранти, меѓу кои и преживеани од опасната атлантска рута од Африка.Локалните црковни лидери изразија надеж дека посетата ќе придонесе за похуман пристап кон миграцијата и ќе ја поттикне Европа да преземе поактивна улога во решавањето на ова прашање.Канарските Острови во последните години се една од главните влезни точки за нерегуларни мигранти кон Европа. Според податоците на невладината организација „Каминандо Фронтерас“, повеќе од 3.000 луѓе загинале во 2025 година, обидувајќи се да стигнат до островите преку Атлантикот.Папата Лав XIV неодамна предупреди дека недостигот од помош за мигрантите ширум светот ги доведува во прашање „етичките темели на меѓународниот поредок“, а неговата посета се смета за силна порака за човечкото достоинство и солидарноста.

Свет | пред 2 дена

Папата за сексуалните злоупотреби во Црквата: Ова е рана што сè уште не е заздравена

Поглаварот на Римокатоличката црква, папата Лав XIV, најави дополнителни напори и поефикасен одговор во борбата против сексуалното насилство во Црквата, по средбата со жртви на злоупотреби за време на неговата посета на Шпанија.Папата речиси еден час разговараше со шест жртви на сексуално насилство извршено од припадници на свештенството, уверувајќи ги дека нивните предлози ќе бидат основа за понатамошни активности и реформи.Според соопштението на Ватикан, Лав XIV истакнал дека Црквата мора да стане безбедно и духовно здраво место за сите верници.Обраќајќи им се на шпанските бискупи, папата побарал вистина, правда и обештетување за жртвите, како и посилни механизми за спречување на ваквите случаи во иднина.Средбата, сепак, предизвика реакции кај дел од здруженијата на жртви, кои изразија незадоволство што нивните претставници не биле поканети. Тие оценија дека не биле вклучени сите организации кои со години се борат за правата на жртвите.Според извештај од 2023 година, во Шпанија се проценува дека околу 200.000 малолетници биле жртви на злоупотреба од страна на припадници на свештенството од 1940 година наваму.Посетата на папата на Шпанија продолжува со настани во Мадрид и Барселона, по што ќе отпатува на Канарските Острови.

Свет | пред 3 дена

Папата Лав XIV: Мигрантите мора да бидат заштитени, а причините за миграцијата отстранети

Папата Лав XIV во обраќање пред шпанскиот парламент предупреди дека светот минува низ длабока духовна и културна криза, повикувајќи на поголеми напори за мир, дијалог и решавање на причините за миграцијата.Во говорот во Мадрид, папата истакна дека современиот свет се соочува со насилство, поларизација и недоверба, додавајќи дека мирот не е само политичка цел, туку и морална неопходност.„Вистинската безбедност произлегува од правдата, трпеливиот дијалог и почитувањето на меѓународното право, а не од интересите на оние што профитираат од војните“, порача Лав XIV.Голем дел од неговото обраќање беше посветен на миграцијата. Папата нагласи дека државите имаат морална обврска да ги прифатат и заштитат мигрантите, истовремено повикувајќи на создавање безбедни и законски патишта за нивна интеграција.Тој посочи дека милиони луѓе се принудени да ги напуштат своите домови поради војни, сиромаштија, економски нееднаквости и последиците од климатските промени.Во говорот папата се осврна и на прашањата за абортусот и евтаназијата, повторувајќи го ставот на Католичката црква дека секој човечки живот треба да биде заштитен од зачнување до природна смрт.Лав XIV најави и средба со жртви на сексуална злоупотреба од страна на припадници на католичкото свештенство, оценувајќи дека Црквата мора да одговори со вистина, правда и обештетување за погодените.Неговото обраќање во шпанскиот парламент беше поздравено со долготраен аплауз од присутните пратеници и сенатори.

Свет | пред 3 дена

Папата Лав XIV предупреди: Вештачката интелигенција може да го одведе светот во бескрајна војна

Папата Лав XIV во својата прва енциклика упати остри предупредувања за опасностите од вештачката интелигенција, повикувајќи ги светските влади да го забават развојот на оваа технологија и да воведат строги правила и контроли.Во документот „Magnifica humanitas“, папата предупреди дека системите на вештачка интелигенција шират дезинформации, поттикнуваат конфликти и можат да го одведат светот кон „бескрајна војна“.„Потребен е поактивен политички ангажман, кој е способен да ги забави работите кога сè се забрзува“, порача Лав XIV.Тој побара сопственоста врз податоците на вештачката интелигенција да не биде целосно во приватни раце, а политичарите да ги заштитат работниците и децата од негативните последици на технологијата.Папата повика и на „цврсти правни рамки, независен надзор и информирани корисници“.Во енцикликата, која има речиси 43.000 зборови, Лав XIV остро ги осуди и војните во светот, оценувајќи дека човештвото „лизга кон насилна култура на моќ“.Тој порача дека теоријата за „праведна војна“ е застарена и дека употребата на сила и оружје секогаш носи катастрофални последици за цивилното население.„Теоријата за праведна војна, која премногу често се користела за оправдување на каков било конфликт, сега е застарена“, нагласи папата.Лав XIV предупреди и дека некои лидери можат да започнат војни за да го одвлечат вниманието од домашните проблеми.Папата посебно ја осуди употребата на вештачката интелигенција во воени цели и порача дека е „недозволиво“ системи на вештачка интелигенција да носат одлуки за убивање.Во документот тој се осврна и на улогата на Католичката црква во робовладетелството, упатувајќи лично извинување.„Тоа е рана во христијанското сеќавање. Во име на Црквата, искрено барам прошка“, напиша папата.

Свет | пред 2 седмици

Ватикан отвора нов фронт против злоупотребата на АИ: Папата лично ја претставува енцикликата

Папата Лав XIV денеска лично ќе ја претстави својата прва енциклика „Magnifica Humanitas“ („Величествено човештво“), што претставува преседан во историјата на Ватикан.Папите традиционално не учествуваат лично на претставувањето на своите документи, без разлика на нивната важност, но Лав XIV одлучил самиот да ја презентира енцикликата посветена на заштитата на човекот во ерата на вештачката интелигенција.Документот бил потпишан на 15 мај, на 135-годишнината од познатата енциклика „Rerum novarum“ на папата Лав XIII, која го постави темелот на современото социјално учење на Католичката црква.Според информации од Ватикан, „Magnifica Humanitas“ остро ја критикува употребата на вештачката интелигенција во војување и предупредува дека новите технологии сè повеќе ги загрозуваат работничките права и човечкото достоинство.„Во нашето време Црквата мора да одговори на новата индустриска револуција и на развојот на вештачката интелигенција, кои отвораат нови предизвици за правдата, трудот и човековото достоинство“, изјави Лав XIV уште во првите недели од својот понтификат.Папата веќе неколкупати јавно предупреди дека системите базирани на АИ преземаат сè поголема контрола врз создавањето текстови, музика и видеа, со што се доведува во опасност креативната индустрија.Во неодамнешен говор на римскиот универзитет „Сапиенца“, тој ја осуди употребата на вештачката интелигенција во војните во Украина, Газа, Либан и Иран, оценувајќи дека станува збор за „нечовечна еволуција на односот меѓу војната и технологијата“.Според ватиканските аналитичари, енцикликата може да отвори нов судир меѓу Ватикан и администрацијата на американскиот претседател Доналд Трамп, особено поради критиките за воената употреба на АИ и масовниот технолошки надзор.На претставувањето на енцикликата ќе присуствува и Кристофер Ола, коосновач на компанијата „Anthropic“, кој неодамна влезе во конфликт со администрацијата на Трамп поради одбивање неговите системи за вештачка интелигенција да бидат ставени под неограничена воена и безбедносна контрола.Ватиканските познавачи оценуваат дека „Magnifica Humanitas“ е почеток на нова ера во социјалното учење на Католичката црква, насочена кон одговор на глобалните последици од технолошката револуција.

Свет | пред 2 седмици

Африм Гаши се сретна со папата Лав XIV во Ватикан – реафирмирани историските и духовните врски

Собранието на Република Македонија соопшти дека претседателот на Собранието, Африм Гаши, предводи државно-црковна делегација во посета на Ватикан по повод традиционалната манифестација „Во чест на Свети Кирил“.Делегацијата присуствувала на аудиенција кај папата Лав XIV, а во неа биле вклучени и координаторите на пратеничките групи Никола Мицевски, Оливер Спасовски и Беким Ќоку, министерот за култура Зоран Љутков, генералната секретарка на Собранието Марина Димовска, како и поглаварот на Македонската православна црква, Стефан.За време на средбата, Гаши упатил честитки по повод годишнината од изборот на папата и ја истакнал посветеноста на државата за продлабочување на традиционално добрите односи со Светата Столица. Биле реафирмирани историските и духовните врски меѓу двете држави, изградени врз наследството на Светите Кирил и Методиј и делото на Мајка Тереза.На средбите било нагласено значењето на мирот, толеранцијата и меѓурелигискиот дијалог, при што Гаши посочил дека Македонија останува пример за меѓуетнички и мултирелигиски соживот.Во рамките на посетата, Гаши остварил и средба со државниот секретар на Светата Столица, Пјетро Паролин, на која се разговарало за унапредување на билатералната соработка во областа на културата, образованието и зачувувањето на духовното наследство.На папата Лав XIV му биле врачени подароци со силна симболика – скулптурата „Пердув/Перо“ од прилепски мермер, изработена од скулпторот Андреј Митевски, како и кавал изработен од мајсторот Бобан Анакиев.На кардиналот Паролин му бил подарен мозаик со мотив на паун, инспириран од мозаиците во Стоби и Хераклеја.Посетата ќе заврши со концерт во организација на Министерството за култура, на кој ќе настапи квартетот „Консонанс“.

Македонија | пред 2 седмици

(Видео) Папата Лав XIV со деца го повторуваше виралното „6-7“, снимката стана хит

Папата Лав XIV се приклучи на популарниот TikTok тренд „6-7“ за време на средба со деца на плоштадот „Свети Петар“ во Ватикан.Снимката од моментот ја објави италијанскиот свештеник и инфлуенсер Дон Роберто Фишер, а видеото брзо стана вирално на социјалните мрежи.На видеото се гледа како група деца ја изговараат фразата „6-7“ и прават карактеристични движења со рацете, по што папата им се придружува и ги повторува истите движења.Трендот „6-7“ е популарен меѓу децата и тинејџерите на TikTok и претставува интернет-мем без конкретно значење, базиран на повторување на фразата и ритмични движења.На снимката реагираше и американскиот политичар Кристофер Хејл, кој на платформата Икс напиша дека папата Лав XIV „има широко културно влијание“.Папата Лав XIV, роден како Роберт Превост во Чикаго, е првиот американски папа во историјата на Католичката црква.

Магазин | пред 3 седмици

Папата остро против вооружувањето: „Тоа е предавство на дипломатијата“

Папа Лав XIV го осуди растот на воените трошоци во Европа, оценувајќи дека повторното вооружување претставува „предавство на дипломатијата“ и придонесува за зголемување на тензиите и несигурноста во светот.Говорејќи пред студентите на Универзитетот „Сапиенца“, папата изјавил дека повторното вооружување не може да се нарече одбрана, бидејќи ги осиромашува инвестициите во образованието и здравството.„Тоа ги збогатува елитите кои не се грижат за општото добро“, рекол папата.Според податоците на Стокхолмскиот меѓународен институт за истражување на мирот, воените расходи во Европа во 2025 година пораснале за 14 проценти и достигнале 864 милијарди долари, како последица на војната меѓу Русија и Украина и засиленото вооружување на европските членки на НАТО.Американскиот претседател Доналд Трамп претходно повеќепати ги повика европските сојузници да ги зголемат издвојувањата за одбрана, а НАТО оваа година ја поддржа целта за издвојување пет проценти од БДП за одбрана.Папата предупредил и на употребата на вештачка интелигенција во војувањето, наведувајќи ги конфликтите во Украина, Газа, Либан и Иран како пример за „нехумана еволуција на односот меѓу војната и новите технологии во спирала на уништување“.Тој ги повикал студентите „да не се затвораат во идеологии и национални граници“ и да бидат „градители на вистински мир“.

Свет | пред 4 седмици

Папата и Рубио во дијалог за американската надворешна политика во Ватикан

Американскиот државен секретар Марко Рубио ќе се сретне со папата Лав XIV во четврток во Ватикан, при што средбата ќе биде фокусирана на отворен дијалог околу политиките на администрацијата на претседателот Доналд Трамп, соопшти американскиот амбасадор при Светата Столица.Според амбасадорот Брајан Бурч, разговорот ќе се одвива во дух на „братство и искрен дијалог“, а целта е да се надминат разликите меѓу страните преку дипломатска комуникација.Посетата на Рубио се поклопува со првата годишнина од понтификатот на папата Лав XIV и доаѓа во период на засилени политички тензии меѓу Ватикан и делови од американската администрација.Причина за тоа се и претходните критики на папата кон американско-израелската политика кон Иран, особено во врска со воениот конфликт и заканите кон цивилното население, кои Ватикан ги оцени како неприфатливи.Средбата се очекува да отвори прашања поврзани со меѓународната политика, војните на Блискиот Исток и улогата на верските институции во глобалните кризи.

Свет | пред 1 месец

Папата во Ангола: Поседувате богатство што не може да се продаде ниту украде

Папата Лав XIV остро ги осуди „социјалните и еколошките катастрофи“ поврзани со експлоатацијата на материјалното богатство, за време на првиот ден од неговата посета на Ангола, јавува АФП.Во обраќањето до властите во претседателската палата во Луанда, поглаварот на Католичката црква порача дека моќни интереси ги присвојуваат природните ресурси, оставајќи зад себе страдање, смрт и нееднаквост.„Колку страдање, колку смрт, колку социјални и еколошки катастрофи предизвикува оваа логика на искористување“, изјави папата.Тој предупреди дека низ светот сè уште се наметнува модел на развој кој дискриминира и исклучува, претставувајќи се како единствен можен пат.Ангола, земја богата со нафта и минерали, се соочува со длабоки економски разлики, а околу една третина од населението живее под меѓународната граница на сиромаштија.Папата ги повика властите да не се плашат од различни мислења и да не ги задушуваат визиите на младите и соништата на постарите генерации.„Општото добро ставете го пред интересите на партијата“, порача Лав XIV.Тој додаде дека Африка итно треба да ги надмине конфликтите и непријателствата кои го разоруваат општественото и политичкото ткиво на многу земји, продлабочувајќи ги сиромаштијата и исклученоста.

Свет | пред 1 месец

Венс го предупреди папата Лав XIV: „Бидете внимателни со теологијата“

Американскиот потпретседател Џеј Ди Венс упати критики до папата Лав XIV, порачувајќи дека треба да биде „внимателен“ кога говори за теолошки прашања, откако папата ја критикуваше американската надворешна политика.Венс реагираше на изјавата на папата дека Исус „никогаш не е на страната на оние кои некогаш замавнувале со меч, а денес фрлаат бомби“, оценувајќи дека ваквиот став ги занемарува историските конфликти како Втората светска војна.„Дали Бог бил на страната на Американците кои ја ослободија Франција од нацистите? Дали бил на страната на оние кои ги ослободија концентрационите логори и ги спасија преживеаните од Холокаустот? Јас сум убеден дека бил“, изјави Венс на настан на Turning Point USA.Иако нагласи дека ги цени ставовите на папата за прашања како абортусот и миграцијата, Венс истакна дека не секогаш се согласува со него, особено околу темите за војната и мирот.Неговата изјава доаѓа по неколкудневната размена на остри зборови меѓу папата и американскиот претседател Доналд Трамп. Папата го осуди конфликтот со Иран, по што Трамп го нарече „слаб“ и „ужасен во надворешната политика“.Одговарајќи на критиките, папата порача дека „не се плаши“ од администрацијата на Трамп и најави дека ќе продолжи да повикува на мир, нагласувајќи дека неговите ставови се темелат на Евангелието.Судирот предизвика немир меѓу католиците во САД, при што бројни свештеници застанаа во одбрана на папата, оценувајќи ги нападите како непримерни. Дополнителни реакции предизвика и објава на Трамп на социјалните мрежи, во која преку вештачка интелигенција беше прикажан во лик налик на Христос, што подоцна ја избриша по критики од јавноста.

Свет | пред 1 месец

Папата Лав: „Доста се војни, доста се демонстрации на моќ“

Папата Лав во саботата упати силен апел до светските лидери да го прекинат она што го нарече „лудило на војната“, во време кога високи американски и ирански претставници се состануваат во Пакистан за преговори за завршување на шестнеделен конфликт, јавува Ројтерс.На посебно молитвено бдение во базиликата „Свети Петар“, првиот папа Американец остро го осуди користењето на религиозна реторика за оправдување на војната, истакнувајќи дека „заблудата за семоќ која нè опкружува станува сè понепредвидлива“.Тој директно им се обрати на светските лидери со порака: „Престанете! Време е за мир! Седнете на маса на дијалог и посредување, а не на маса на која се планира ново вооружување.“Папата Лав се осврна и на страдањата на цивилите, цитирајќи писма од деца од воени подрачја кои опишуваат „ужас и нечовечност“, нагласувајќи дека човештвото е сериозно нарушено од тековните конфликти.Тој ја критикуваше и злоупотребата на верата за оправдување на насилството, потсетувајќи на ставовите на Црквата против војната во Ирак во 2003 година и порача: „Доста е од идолопоклонство на себеси и на парите! Доста е од демонстрација на моќ! Доста е од војна!“Папата и претходно изјави дека Бог ги отфрла молитвите на оние кои започнуваат војни, нагласувајќи дека човечката рамнотежа е сериозно нарушена кога религијата се користи за оправдување на конфликти.

Свет | пред 2 месеци

Папата Лав XIV тргнува на историска африканска турнеја: прва станица Алжир и порака до исламскиот свет

Се очекува папата Лав XIV да пристигне во Алжир на 13 април 2026 година и да ја отвори, како што се оценува, својата прва голема меѓународна турнеја – патување што ќе трае до 23 април и ќе го однесе и во Камерун, Ангола и Екваторска Гвинеја. Посетата на Алжир се смета за историска затоа што станува збор за прва посета на римски папа на оваа претежно муслиманска држава.Во фокусот на пораките што Лав XIV ќе ги испрати во Алжир се најавува темата на мирното соживување и дијалогот во време на засилени меѓународни тензии. Од Ватикан е посочено дека целта на посетата е обраќање до исламскиот свет, но и соочување со заедничките предизвици на живеењето во мултирелигиски средини.Патувањето има и силна лична симболика за папата роден во Чикаго: во Алжир ќе оди по трагите на свети Августин (354–430), еден од најзначајните христијански мислители, роден на просторот на денешен Алжир, чие духовно наследство се поврзува со понтификатот на Лав XIV.Во деновите пред посетата, повеќе меѓународни невладини организации побараа папата да ги отвори прашањата за човековите права и верските слободи, наведувајќи дека верските малцинства се соочуваат со правни и административни ограничувања. Иако исламот во Алжир е државна религија, уставот гарантира слобода на богослужение, со услови поврзани со одобрување на проповедници и места за богослужба.Во рамките на престојот во главниот град, се најавува средба со претседателот Абделмаџид Тебун, по што папата ќе одржи говор пред властите и дипломатскиот кор. Не се предвидуваат јавни настапи низ градот, а белото папско возило нема да се користи за јавни обиколки.Попладнето, Лав XIV треба да ја посети Големата џамија – една од најголемите во светот – и да се сретне со верниците во катедралата „Богородица Африканска“, која гледа кон Алжирскиот Залив. Најавено е и приватно молење во капела посветена на 19 алжирски маченици, свештеници и монахињи убиени за време на граѓанската војна во земјата (1992–2002).Една од најсимболичните точки на патувањето во Алжир ќе биде посетата на Анаба, древниот Хипо Регис, каде што свети Августин бил епископ. Таму папата се очекува да служи миса во базилика со поглед кон градот, нагласувајќи ја духовната линија што, според негови блиски кругови, го поврзува неговиот понтификат со августинската традиција.

Свет | пред 2 месеци

Папата Лав: Војната на Блискиот Исток е скандал за целото човештво

Папата Лав остро ја осуди војната на Блискиот Исток, оценувајќи дека страдањата и уништувањето претставуваат „скандал за целото човештво“ и упати повик за итен прекин на непријателствата.Говорејќи на неделната молитва „Ангелус“ на плоштадот „Свети Петар“ во Ватикан, поглаварот на Католичката црква истакна дека со загриженост ја следи ситуацијата во регионот, но и во другите делови од светот погодени од насилство и конфликти.„Не можеме да останеме неми пред страдањето на толку многу луѓе, беспомошни жртви на овие судири. Она што ги боли нив, го боли и целото човештво“, порача папата Лав.Тој повторно апелираше до верниците да истраат во молитвите, со цел да се стави крај на конфликтите и да се отвори пат кон мирот.Изјавата доаѓа во момент кога војната меѓу САД, Израел и Иран влегува во четвртата недела, со сè поголем број жртви и разурнувања во регионот.

Свет | пред 2 месеци

Папата Лав: Прекинете го огнот, илјадници невини луѓе се убиени

Папата Лав денеска упати силен апел за итен прекин на огнот во војната поврзана со Иран, предупредувајќи дека ескалацијата на насилството носи огромно страдање за цивилното население на Блискиот Исток.Говорејќи на традиционалната неделна молитва Ангелус на плоштадот „Свети Петар“ во Ватикан, папата истакна дека во изминатите две недели народите во регионот трпат „страшно воено насилство“. Според него, насилството нема да донесе правда, стабилност ниту мир за кои копнеат луѓето во регионот.„Во име на христијаните на Блискиот Исток и на сите луѓе со добра волја, апелирам до оние што се одговорни за овој конфликт: прекинете го огнот“, порача папата.Тој изрази длабоко жалење што, како што рече, илјадници невини луѓе биле убиени, а многу семејства биле принудени да ги напуштат своите домови поради нападите. Папата нагласи дека особена загриженост предизвикува и ситуацијата во Либан, кој е погоден од судирите меѓу Израел и либанското движење Хезболах, поддржано од Иран.Тој изрази надеж дека ќе се отвори пат за дијалог меѓу властите во регионот, со цел да се постигне трајно решение на кризата и стабилност за целиот либански народ.

Свет | пред 2 месеци