Папата Лав XIV мирно ја минал ноќта во болница по операцијата на белите дробови

Здравствената состојба на папата Лав XIV се следи по операцијата на белите дробови, при која лекарите отстраниле канцерозно ткиво. Од Ватикан денеска соопштија дека папата ја минал ноќта мирно во болница, а повеќе информации за неговото закрепнување се очекуваат во текот на денот.

Кај папата вчера бил дијагностициран аденокарцином, најчестиот облик на рак на белите дробови, откако лекарите отстраниле помала израснатина од десното белодробно крило. Тој бил примен во римската болница „Џемели“ откако при рутински преглед била откриена промената.

Операцијата траела околу 90 минути и поминала без компликации, соопштија доцна синоќа хирургот Стефано Маргаритора и личниот лекар на папата, Луиџи Карбоне. Лекарите го отстраниле целиот долен лобус на десното белодробно крило со цел да го отстранат канцерозното ткиво. Човечките бели дробови имаат вкупно пет лобуси – три во десното и два во левото белодробно крило.

— реклама —

Ватикан засега не соопштил колкава била големината на туморот ниту дали ракот се проширил на блиските лимфни јазли. Овие податоци се важни за процена на понатамошниот тек на болеста, објави „Ројтерс“.

Хуанита Мора, лекарка и портпаролка на американската непрофитна организација „Американско здружение за белодробни заболувања“, за АФП изјавила дека охрабрувачки е тоа што туморот настанал во белите дробови, наместо да биде последица на ширење на ракот од друг дел на телото.

Постојат две главни групи рак на белите дробови. Ракот на белите дробови од малите клетки обично се шири брзо и е поагресивен, а опфаќа меѓу 10 и 15 отсто од случаите. Многу почест е ракот на белите дробови од немалите клетки, во чија група спаѓа и аденокарциномот.

— реклама —

„Аденокарциномот е најчестиот облик на она што го нарекуваме рак на белите дробови од немалите клетки“, изјавил за АФП Дејвид Спигел, онколог кој истражува рак на белите дробови во Центарот „Сара Канон“ во Нешвил.

Дејвид Карбон, раководител на онколошки центар при универзитет во американската сојузна држава Охајо, предупредил дека, иако пушењето е најпознатиот фактор на ризик, болеста се дијагностицира и кај луѓе кои никогаш не пушеле или престанале со пушење пред многу години.

„Повеќето случаи на рак на белите дробови што ги дијагностицираме денес се однесуваат на луѓе кои не пушат или престанале да пушат пред многу години“, изјавил Карбон.

Според податоците на Светската здравствена организација, ракот на белите дробови е водечка причина за смрт од малигни заболувања во светот. Сепак, изгледите за лекување значително се разликуваат во зависност од видот на ракот и стадиумот во кој е откриен.

— реклама —

Мора навела дека петгодишното преживување кај пациентите со локализиран аденокарцином на белите дробови изнесува приближно од 63 до 67 отсто. Кога болеста ќе биде откриена во рана фаза, стапката може да достигне од 80 до 98 отсто, особено по хируршко отстранување на туморот.

Според Спигел, во такви случаи пациентот може да биде целосно излекуван, без ракот повторно да му го загрози животот.

Засега не е познато дали на папата по операцијата ќе му биде потребно дополнително лекување, како хемотерапија или зрачење, објави АФП. Одлуката ќе зависи од големината и агресивноста на туморот, неговите генетски карактеристики и од тоа дали болеста се проширила на други делови од телото. Извор од Ватикан навестил дека дополнителните испитувања сè уште се во тек.

Карбон оценил дека е охрабрувачки тоа што папата бил опериран веднаш. Според него, доколку ракот се проширел на лимфните јазли во средишниот дел на градниот кош, најверојатно би била применета терапија пред операцијата. Бидејќи тоа не се случило, тој смета дека станувало збор за тумор откриен во многу рана фаза, што упатува на поволни изгледи за закрепнување.

Тој додал дека лекувањето на ракот на белите дробови значително напредувало во изминатите децении и дека изгледите за пациентите се подобри од кога било досега.