„Парите позајмени од М-НАВ, МЕПСО и Лотарија ќе се користат за отплата на кредит кон кинеска банка“, вели Мицкоски

Премиерот Христијан Мицкоски потврди дека средствата кои Владата ги позајмила од неколку државни претпријатија ќе бидат искористени за отплата на кредит кон кинеска банка за изградба на автопатите.

— реклама —

Одговарајќи на новинарско прашање, Мицкоски рече дека не станува збор само за позајмица од Македонска навигација (М-НАВ), туку и за средства обезбедени од МЕПСО, Државна лотарија и Јавното претпријатие за државни патишта.

— реклама —

„Не се само од М-НАВ. Имаме средства и од Лотарија, МЕПСО и сопствени средства на ЈПДП. Средствата ќе бидат искористени за враќање на кредит кон кинеската банка за автопатите, а во август ќе им бидат вратени на компаниите“, изјави премиерот.

Тој нагласи дека ваквата постапка не е новина и дека, според него, и во минатото повеќепати била применувана.

— реклама —

„Се работи за вообичаена процедура што многупати претходно се правела. Во август средствата ќе бидат вратени и кај М-НАВ и кај Лотарија и кај МЕПСО“, додаде Мицкоски.

Прашањето за позајмицата се отвори откако беше објавено дека Владата позајмила седум милиони евра од М-НАВ, државното акционерско друштво задолжено за контрола на летањето, што предизвика реакции и дилеми околу законската можност компанијата да ѝ позајмува средства на државата.