Светска здравствена организација и шпанските власти денеска планираат да го завршат симнувањето на сите патници од крузерот „MV Hondius“, по епидемијата на хантавирус што предизвика меѓународна здравствена тревога.
Според шпанските медиуми, по заминувањето на две групи патници кон Холандија и Австралија, бродот ќе исплови кон Ротердам со околу 30 лица на бродот, каде што ќе биде извршена целосна дезинфекција.
Шпанските патници ноќта ја поминале во Воената болница „Гомез Уља“ без симптоми, по што ќе бидат префрлени во карантин за понатамошно следење на нивната здравствена состојба.
Досега, според официјалните податоци, евакуирани се 94 патници, а уште 24 лица треба да бидат транспортирани во нивните матични земји. Организирани се седум летови за патници од осум различни држави.
Француската министерка за здравство Стефани Рист изјави дека една француска државјанка, евакуирана во неделата, за време на летот развила симптоми и била позитивна на хантавирус. Нејзината состојба, според министерката, „се влошила преку ноќ“.
Во Франција се идентификувани 22 лица како контакти и тие ќе останат во изолација.
Во меѓувреме, жена од Шпанија која била во контакт со еден од починатите патници е хоспитализирана во карантин во Аликанте, иако два теста биле негативни на вирусот.
На бродот имало патници од повеќе земји, меѓу кои Холандија, Германија, Индија, Белгија, Грција, Украина, Аргентина и Црна Гора.
Според досегашните информации, три лица починале од почетокот на епидемијата, а уште пет лица кои претходно го напуштиле бродот биле заразени со хантавирус.
Хантавирусот најчесто се пренесува преку контакт со урина или измет од заразени глодари, а во ретки случаи е можно и пренесување меѓу луѓе. Симптомите најчесто се појавуваат една до осум недели по изложувањето на вирусот.
