Американскиот Пентагон сериозно размислува да се откаже од планот за распоредување крстосувачки ракети „Томахавк“ во Германија, делумно поради загриженост дека Москва би можела таквиот потег да го протолкува како дополнителна ескалација на тензиите, објави „Политико“.
Според медиумот, оваа можност е дел од поширока ревизија на американското воено присуство во Европа и во рамките на НАТО, што вклучува и преиспитување на распоредувањето на американски војници и одредени воени капацитети на европскиот континент.
Врховниот командант на НАТО во Европа, генералот Алексус Гринкевич, оваа недела изјави дека европските сојузници ќе треба да преземат поголема одговорност за сопствената безбедност.
„Европа може да се засили и сега и во блиска иднина“, порача Гринкевич, додавајќи дека САД ќе пренасочуваат дел од своите сили и опрема кон други региони.
Покрај стравувањата од можна реакција на Русија, американските власти се соочуваат и со проблемот на намалени резерви на оружје. Во последните конфликти, особено за време на воените операции против Иран, САД потрошиле голем број ракети „Томахавк“ и системи „Патриот“.
Американскиот министер за одбрана Пит Хегсет неодамна предупреди дека ќе бидат потребни месеци, па дури и години, за обновување на дел од потрошената муниција.
Можноста за откажување на распоредувањето на „Томахавк“ предизвикува загриженост во Берлин, каде што властите вложуваат значителни средства во модернизација на вооружените сили поради растечките безбедносни предизвици во Европа.
Германскиот канцелар Фридрих Мерц минатиот месец изјави дека не е сигурен оти САД ќе можат да ги испорачаат овие ракети поради ограничените залихи.
„Американците во моментов немаат доволно ниту за сопствените потреби“, рече Мерц во интервју за германската јавна телевизија.
Според „Политико“, американските власти неодамна најавиле и дополнителни промени во нивната улога во НАТО, меѓу кои и намалување на бројот на борбени авиони, беспилотни летала и поморски единици распоредени во Европа.
Доколку Вашингтон навистина се откаже од планот за „Томахавк“, тоа би значело повлекување од договор постигнат за време на администрацијата на поранешниот претседател Џо Бајден и би оставило празнина во германските планови за зајакнување на одбранбените капацитети.
Од американското Министерство за одбрана засега нема официјална потврда за конечна одлука, но извори наведуваат дека разговорите за идното американско воено присуство во Европа се во тек.
